Azam Marine kutoa usafiri B'moyo-Dar miundombinu ikikamilika

Na Kassim Mahege

KAMPUNI ya Azam Marine inayojishughulisha na usafirishaji wa abiria na mizigo kwa njia ya Boti,kutoka Dar es salaam,Unguja na Pemba imesema kuwa ipo tayari kupeleka boti kutoka Bagamoyo kuja Dar es salaam,iwapo Serikali itajipanga na kutengeneza miundo mbinu.


Akizungumza na gazeti hili jana Meneja Mkuu wa Kampuni hiyo, Bw.Hossein Mohamed Said alisema Serikali inatakiwa ijipange kwa kutengeneza miundombinu halafu baada ya hapo sio Azam tu isipokuwa hata kampuni nyingine zitakuja kuwekeza huko.

“Kwanza kabisa  serikali  wajipange,watengeneze miundombinu kwanza halafu baada ya hapo sio sisi tu bali hata makampuni mengine yatakuja kuwekeza .”alisema Bw.Said.
Alisema,serikali inatakiwa  isome hali halisi ya mtanzania  wa hali ya chini na kuongeza kuwa wasikurupuke,kwa kufanya  hivyo   wawekezaji  nao watakuwa  pamoja katika suala hilo.
Akibainisha kuhusiana na hali  ngumu ya maisha,alisema,katika nchi  yetu kuna matabaka matatu,tabaka la juu ambao  ni  matajiri ambapo wanaweza kuamuwa hata kusafiri kwa helkopta kutoka Bagamoyo  hadi Dar es salaam,tabaka la  kati    ni wale ambao  wanaweza kusafiri  kwa  kutumia   magari yao na tabaka la  tatu ni watanzania masikini na kuongeza kuwa tabaka hili ndio tabaka  lenye wananchi  wengi kuliko matabaka yote.alisema Bw.Said
Alitolea mfano kuwa  nauli kutoka  Bagamoyo hadi Dar es salaam ni shilingi 1800,kama tutapeleka  Boti tunaweza kuchaji shilingi 5000, je mwananchi gani ataacha  kupanda  Gari ambayo  nauli yake rahisi   na kupanda Boti?alihoji Bw.Said.