Shein adaiwa kuwalinda mafisadi

Na Mwajuma Juma, Zanzibar

VYAMA vitatu vya upinzani vimesema Rais Dkt. Shein anawalinda mafisadi wanaotuhumiwa kuuza majengo yaliyomo katika hifadhi ya Mjikongwe kinyume na
sheria.

Tamko hilo wamelitowa kufuatia kauli ya Rais Dkt. Shein kudai serikali haikuwa na ulazima wa kutangaza zabuni katika uuzwaji wa majengo hayo, kwa sababu imeuza mali yake.

Wakizungumza katika ukumbi wa Idara ya Habari Maelezo viongozi wa vyama hivyo TADEA, NCCR-Mageuzi na Chama cha Wakulima (AFP), wamesema mkataba huo uvunjwe ili kulinda sheria namba 9 ya mwaka 2005 ya ununuzi wa Mali za Serikali.

Katibu Mkuu wa TADEA, Bw. Juma Ali Khatib alisema kwamba Serikali ni ya wananchi na mali inayouzwa ni ya Wazanzibari wote na haikuwa muafaka kukodishwa miaka 99 bila kutangazwa zabuni, kama masharti ya sheria yanavyoelekeza.

“Rais alikula kiapo kuwa atalinda katiba na sheria, na mawaziri wake pia walikula kiapo inakuaje serikali inashindwa kuheshimu sheria za nchi,” alisema Katibu huyo.

Alisema kwamba nchi inaendeshwa kwa kuzingatia katiba na sheria na majengo hayo yalistahili kutangazwa zabuni badala ya kuuzwa kienyeji kwa vile sio majengo ya mtu au Ikulu, ni mali ya Wazanzibari wote.

Hata hivyo, alisema kwamba imefika wakati Wazanzibari wakafahamu haki zao za msingi za kikatiba ili kuepusha tabia ya mali za serikali kuuzwa bila ya kuzingatiwa taratibu za sheria.

Naye Mwenyekiti wa AFP, Bw. Said Soud alisema inashangaza Serikali ya Umoja wa Kitaifa imeshindwa kusimamia misingi ya utawala bora kwa vitendo tangu kuundwa kwake Novemba mwaka jana.

Alitoa mfano alisema sheria za kazi zinasema mtu atastaafu kwa lazima baada ya kufikisha umri wa kati ya miaka 50 na 60, lakini badala yake watu waliostaafu na kulipwa mafao yao wamerejeshwa tena katika utumishi wa umma.

Aidha alisema kwamba hivi karibuni Chama cha Wanasheria Zanzibar, kimekuwa kikilalamika kuhusu uteuzi wa majaji uliofanywa bila ya kuzingatia maamuzi ya tume ya utumishi na maadili.

Alisema kwamba kwa kuwa serikali imeshindwa kuzingatia utawala wa sheria hakuna sababu ya kuwa na Baraza la Wawakilishi na badala yake livunjwe kutokana na serikali kushinda kuzingatia sheria zinazotungwa na baraza hilo.

“Katiba ya nchi inasema mamlaka ya kuendesha nchi ya wananchi wenyewe, tunashauri rais avunje Baraza la Wawakilishi badala ya kupoteza fedha kwa kutunga sheria zisizozingatiwa na serikali,” alisema.

Akizungumza na waandishi wa habari juzi, Dkt. Shein katika Uwanja wa Ndege wa Zanzibar juzi baada ya ziara yake ya Uturuki, alisema kuwa serikali haikufanya makosa kuuzwa majengo hayo bila kutangaza zabuni kwa vile mali iliyouzwa ni ya serikali.

“Serikali haifanyi makosa, ina uamuzi wake hasa kwa mali zake hakuna anayeweza kuhoji, tukiamua kuuza jengo tutauza, Mambo Msiige ni ya Serikali hatujauza mali ya mtu,” alisema Dkt. Shein.

Tangu kuuzwa kwa majengo hayo Oktoba mwaka jana na Serikali ya Awamu ya Sita wanaharakati na wanasheria Zanzibar, wamekuwa wakidai majengo hayo yameuzwa kinyemela kwa dola za Marekani milioni 1.5, bila ya kutangazwa zabuni.