Mbunge wa Tarime apopolewa Nyamongo

*Katibu Mkuu CCM aahirisha mikutano yake
*Serikali kugharamia mazishi ya waliouawa

Veronica Modest na Timothy Itembe, Tarime

WAKATI Mbunge wa Tarime, Bw. Nyambari Nyangwine amepopolewa kwa mawe na wapiga kura wake wa Nyamongo wilayani Tarime ambao ndugu
zao watano wameuawa na polisi katika Mgodi ya Nyamongo, Katibu Mkuu wa CCM, Bw. Wilson Mukama ameahirisha mikutano ya hadhara ambayo ilitegemewa kufanyika katika eneo hilo.

Ingawa, Bw. Mukama hakuhusiaha na mbunge huyo wa CCM kurushiwa mawe na wananchi kwa madai ya kutokutoa kauli juu ya unyanyasaji wa polisi dhidi yao, wachunguzi wa mambo wanasema sababu hiyo imechangia kwa kiasi kikubwa.

Akiwa katika ziara yake ya kwanza katika mkoa wa Mara baada ya kuchaguliwa, Bw. Mukama alisema kuwa si vema kufanya mkutano wa hadhara jirani na eneo lenye msiba.

"Kwa desturi yetu sisi waafrika hatuwezi kufanya mkutano wa hadhara hapa karibu na eneo lenye msiba kwani hao waliokufa ni binadamu wenzetu hivyo yatupasa kuheshimu msiba," alisema Mukama.

Uamuzi huo umekuja baada ya Bw. Nyangwine akiwa na mwenyekiti wa Halmashauri ya Wilaya ya Tarime, Bw. Amos Sagara kunusurika kujeruhiwa baada ya kupopolewa kwa mawe wakati wakiwa kwenye mkutano wa hadhara.

Habari kutoka eneo la tukio zinasema kuwa mbunge huyo alipata tetesi kuwa watu waliofiwa na jamaa zao wamekataa kuzika miili ya marehemu hao mpaka serikali itoe tamko, hivyo alikwenda katika eneo la tukio ili kufanya  mkutano wa hadhara na kutoa 'tamko la serikali' juu ya mauji yanayoendelea kutokea katika mgodi huo mara kwa mara.

Akiwa katika mkutano huo baadhi ya watu walianza kurusha mawe na kuponda magari na kupasua vioo ambapo Mbunge huyo alifanikiwa kukimbia, huku mwenyekiti wa halmashauri akichaniwa shati na kukimbia kifua wazi.

Hali hiyo ilijitokeza baada ya wananchi kukasirishwa na mauaji yanayotokea mgodini hapo mara kwa mara ambapo warifikiri kuwa mbunge huyo angeweza kukomesha mauji hayo, lakini hajafanya lolote.

Wakati vurugu zinaendelea Mkuu wa Wilaya ya Tarime, Bw. John Henjewele aliyekuwa eneo hilo aliomba aongezewe nguvu kutoka Jeshi la Polisi ili kunusuru maisha ya viongozi pamoja na watu aliokuwa ameongozana nao, wakiwamo waandishi wa habari.

Mbunge azungumza

Mbunge wa Tarime Bw. Nyambari Nyangwine amekiri kushambuliwa kwa mawe yeye kwa msafara wake ambao ulikuwa na lengo la kwenda kutoa tamko dhidi ya mauaji yaliyotokea Nyamongo, anaripoti Grace Michael.

Msafara wake ambao ulikuwa umeongozana na waandishi wa habari pamoja na viongozi wa CCM ulipata msukosuko huo jana mara baada ya kufika eneo hilo ambapo mkutano huo ulitarajiwa kufanyika.

"Tulipofika eneo hilo, tukawasikia wananchi wakisema kuwa hawataki serikali wala mbunge na mbaya zaidi wakaanza kuhoji kwa nini baadhi ya viongozi wa chama niliokuwa nao wamevaa nguo za chama...nilipoona kuna kila dalili ya hatari walinzi wangu waliniondoa na kunipandisha kwenye gari na kuondoka," alisema.

Alisema kuwa msafara wake ulikuwa na magari manne na kutokana na vurugu zilizotokea hapo, magari mawili yalishambuliwa na mawe na kuharibika vibaya.

Alisema kuwa magari ambayo yalishambuliwa kwa mawe ni yale ambayo yaliwabeba waandishi wa habari na wengine waliokuwa wameongozana naye lakini gari alilokuwamo yeye halikuathirika.

Bw. Nyangwine alitupa mzigo huo kwa wanasiasa, akisema kuwa vijana waliofanya vurugu hiyo waliandaliwa na Diwani wa Chama cha Demokrasia na Maendeleo (CHADEMA).

Serikali kugharamia mazishi

Naye Agnes Mwaijega anaripoti kuwa serikali imeahidi kushughulikia na kugharamia shughuli za mazishi ya watu waliouawa wakati akipora mchanga wa dhahabu katika mgodi wa Nyamonge.

Pia imeunda timu maalumu inayojumuhisha wawakilishi kutoka katika wizara hiyo na Jeshi la Oolisi kwa ajili ya kufuatilia mauaji hayo.

Naibu Waziri wa Wizara ya Mambo ya Ndani, Balozi Khamis Kagasheki alisema serikali inachukua jukumu hilo kwa sababu waliokufa katika tukio hilo ni Watanzania.

Alisema kuwa sheria itachukua mkondo wake dhidi ya wale wote waliohusika katika tukio hilo.

"Sisi kama wizara tutafuatilia kwa ukaribu zaidi ili kupata taarifa kamili juu ya tukio hilo. Tuna imani kwamba timu tuliyounda itafanya uchunguzi na italeta majibu yatayotusaidia," alisema.