Askofu Laizer ampongeza Lema kufanikisha harambee

Na Richard Konga, Arusha

ASKOFU Mkuu wa Kanisa la Kiinjili la Kilutheri KKKT Dayosisi ya Kaskazini Kati Thomas Laizer amempongeza Mbunge wa Jimbo la Arusha mjini Bw. Godbless Lema kwa
kufanikisha harambee ya
ujenzi wa shule ya Kanisa hilo.

Akizungumza wakati wa Ibada ya harambee ya ujenzi wa Shule ya Msingi ya Kimandolu Lutherani mkoani Arusha Askofu Laizer alisema ukarabati wa shule hiyo utagharimu sh. milioni 85

Alisema kwamba tayari dayosisi  hiyo inazo shule za sekondari 12 zenye  wanafunzi 6700 hivyo unahitajika moyo wa uzalendo kusaidia kuinua kiwango cha elimu nchini.

Naye Mgeni rasmi katika harambee hiyo,Bw. Godbless Lema alisema hatadharau jitihada zinazolenga kuinua maendeleo ya jamii na badala yake ofisi yake itakuwa bega kwa bega kuhakikisha mafanikio yanapatikana

Aliongeza kuwa suala la elimu ni muhimu katika maendeleo ya nchi na kwamba kiasi hicho cha sh
milioni 85 si fedha ya nyingi iwapo wataamua kwa dhati kushikamana kwa pamoja.
Katika harambee hiyo zimepatikana fedha taslimu pamoja na ahadi jumla ya zaidi ya sh milioni 20

Kwa upande wake Askofu Mkuu msaidizi wa Dayosisi hiyo Solomoni Masangwa amemshukuru Bw Lema kwa kuendesha shughuli hiyo  kwa moyo mwema.