Viongozi wa dini wadaiwa kujipenyeza kwenye siasa

Na Charles Mwakipesile, Mbeya

MKUU wa huduma ya Sauti ya Uponyaji ya Mjini Morogoro, Bw. Joshua Mwantyala amewaonya viongozi wa dini wakiwemo maaskofu kutokana na kile alichodai tabia yao
ya kuacha kuhubiri injili na kuamua kujiingiza kwenye siasa kutokana na matamshi yao yenye utata ambayo amesema mwisho wake ni maafa makubwa.

Akizungumza na Mwandishi wa habari hizi, Bw. Mwantyala anayejitaja kama nabii,alisema kuwa hatari kubwa kuona katika siku za sasa viongozi wa dini wamevamia siasa.

"Mungu alinionyesha maono mengi kwa ajili ya Tanzania ambapo alisema wazi kuwa amechukizwa na viongozi wengi wa kanisa kujiingiza kwenye siasa na kujificha na mgongo wa kujifanya wao ni viongozi wenye kuaminika, na hivyo kila wanachosema kitapokelewa na watu wengi nawataka waacha tabia hiyo," alisema Bw. Mwantyala ambaye hivi karibuni amekuwa akikusanya mamia ya watu katika maombezi yake anayotumia maji ya kunyunyiza kinywani kwa ajili ya kuondoa magonjwa sugu ukiwemo Ukimwi.

Akionesha kuumizwa na tabia hiyo alisema kuwa viongozi wa kanisa hawana budi kurudi makanisani na kuendelea na kazi yao ya kuhubiri injili tofauti na ilivyo sasa ambapo wameonekana dhahiri kuwa wao ni sehemu ya matatizo yaliyopo nchini.

Alisema kuwa ni wazi kuwa viongozi wa dini wanayo dhamana kubwa  ya kuhakikisha kunakuwa na amani na utulivu mkubwa nchini  kutokana na maombi na makalipio yanayotolewa na viongozi safi wa Kanisa ambao wanaaminika kuwa wakisema kitu wanakuwa wanamaanianisha jambo kubwa kulingana na maono na unabii  wanaokuwa wameagizwa na Mungu.

Bw. Mwantyala alisema kuwa Mungu alimwambia wazi kuwa wapo viongozi wengi wa dini wamejiingiza kwenye vyama vya siasa kwa siri ambapo wamekuwa nyuma ya viongozi watendaji wa vyama hali ambayo alisema kuwa ni hatari kubwa kwa ajili ya kutunza amani na utulivu na hivyo Watanzania kushinda umaskini na kupata maisha bora.

Alisema kuwa kinachotakiwa kwa sasa ni kwa walengwa hao kuamua kurudi makanisani na kufanya kazi waliyoitiwa na kisha kubaki kuwa washauri wa viongozi wa siasa ili wawe na subira katika kila wanalolifanya sanjali na kuachana na maamuzi yanayoweza kulipeleka Taifa kwenye umwagaji wa damu.

Hata hivyo, alisema kuwa ni wazi kabisa kuwa kama Nabii alioneshwa wazi kuwa kama viongozi hao wa dini watakaidi kuachana na siasa na kurudi madhabahuni, alisema kuwa iko hatari kubwa ya Taifa kuingia katika machafuko makubwa ambapo alisema kuwa vurugu zinazoanzia kanisani zina maafa makubwa.

Alisema kuwa yeye alipewa ufunuo  na Mungu  kuhusu  uongozi wa Rais Kikwete ambapo kila anapopata nafasi amekuwa akifanya kazi ya kuufikisha  kwa njia anazoona zinafaa na hivyo aliwashauri  viongozi wenzake wa dini kuhakikisha wanatumia wadhifa wao  kushauri serikali kila inapobidi.

"Hii ni nchi yetu hawa wenzangu wamejichanganya wenyewe kwa kuacha kufanya kazi isiyo ya kwao ambayo ni hata kubwa wao nio wahubiri kama mimi kama wakitulia ni wazi kuwa Mungu atawapa ufunuo kwa ajili ya taifa ambao ukitolewa kwa hekima ni msaada mkubwa kwa Taifa, waache siasa, warudi makanisani," alisema bila kutaja jina hata moja.

Alisema vyama vya siasa vinapaswa kufanya mambo yao kwa hekima  kwa kutambua kuwa thamani ya Tanzania ni pamoja na mtanzania  ambaye amewekwa na Mungu ili afaidi amani na utulivu vilivypo nchini, si vurugu na hali ngumu ya Maisha ambayo watu wengi wanapitia.