CHADEMA: Hatukusudii kuipindua Serikali

Na Tumaini Makene

CHAMA Cha Demokrasia na Maendeleo (CHADEMA) kimesema kuwa hakina nia, ajenda wala lengo la kuipindua serikali iliyoko madarakani kwa njia ya
maandamano, bali hofu na woga alionao Rais Jakaya Kikwete na viongozi wengine inatokana na kushindwa kutekeleza ahadi na kuwajibika kwa wananchi.

Kimesema kuwa pamoja na kuenezwa propaganda hiyo ya kupindua serikali, na nyingine kama za kuvuruga amani ya nchi, ukabila, udini na kufadhiliwa, hakitaacha kufanya kazi yake ya siasa ya kuiwajibisha serikali, kwa kusimamia hoja za wananchi juu ya mwenendo wa nchi na viongozi wao.

Kimesema maandamano ya amani yanayotumika kuishinikiza serikali kuwajibika kwa wananchi si kuhatarisha amani ya taifa, "bali kwa viongozi wabovu wa CCM na serikali yake wanaohofia nguvu ya umma ya Watanzania wanaoanza kuamka, kuelimika na kuhoji juu ya mwenendo wa serikali na viongozi wao".

Kimesema pia kuwa kamwe hakitakubaliana na hila za aina yoyote zinazofanyika kulitia taifa aibu ikiwemo kutaka kubadilisha Sheria ya Manunuzi ya Umma (PPRA) ili serikali inunue vifaa chakavu na kuingia biashara ya aina yoyote na kampuni tata ya Dowans.

CHADEMA kimesema kuwa kitaendelea kutumia 'majukwaa' yote mawili, ndani na nje ya bunge, kutetea maslahi ya Watanzania na nchi kwa ujumla, kikisema kuwa hayo ni muhimu zaidi kuliko kitu chochote kile, hasa katika eneo la nishati ya umeme, ambako kimedai kuwa kuna miradi ya kitapeli inaibuliwa kila kukicha kwa faida ya 'wachache wanaotengeneza mabilioni ya bure.'

Hayo yamesemwa jana na Mwenyekiti wa chama hicho, Bw. Freeman Mbowe alipokuwa akitoa tamko la Kamati Kuu ya CHADEMA, ambapo alisema "kauli za Rais Kikwete kwamba maandamano haya yalilenga kuiondoa serikali iliyo madarakani kwa njia zisizo za kidemokrasia ni uzushi na uwongo."

Alisema kuwa amani wanayozungumzia viongozi waandamizi wa serikali akiwemo Rais Kikwete kuwa itavurugwa, wakihofia kazi ya kisiasa inayofanywa na CHADEMA "ni amani ya CCM na viongozi wake ambao kwa miaka yote walizoea kuishi kana kwamba nchi ni mali yao, badala ya kujiona kuwa ni watumishi wa wananchi waliowachagua kuongoza".

Tamko la Kamati Kuu ya CHADEMA lilisomwa na Bw. Mbowe akisaidiana na Katibu Mkuu wake, Dkt. Willibrod Slaa katika kujibu maswali ya waandishiwa habari, lilijikita katika maeneo kadhaa, ambayo ni kuhusu maandamano ya mikoa ya Kanda ya Ziwa, maandalizi ya ziara na maandamano mengine katika mikoa mitano ya Nyanda za Juu Kusini na Uchaguzi wa Baraza la Vijana wa CHADEMA (BAVICHA).

Maeneo mengine yalikuwa ni kuhusu vitisho vya kuuawa kwa Dkt. Slaa na viongozi wengine wa kisiasa nchini, suala la uchaguzi wa Meya Arusha, tatizo la umeme nchini, suala la mabomu ya Gongolamboto, janga la tsunami huko Japan, uamuzi wa serikali kuandaa mswada wa kubadili Sheria ya Manunuzi ya Serikali;

Pia azma ya serikali kuwekeza katika uchimbaji wa uranium, mikakati ya kukabiliana na janga la njaa linaloikabili nchi kwa sasa na suala la kupanda kwa deni la taifa kwa kiwango cha asilimia 18 ndani ya mwaka mmoja.

"Kamati Kuu imesisitiza kuwa CHADEMA ni chama cha kidemokrasia na kitaendelea kutafuta ridhaa ya wananchi ya kuunda serikali kwa njia ya kidemokrasia na kwa mujibu wa sheria za nchi na wala haina dhamira ya kuiondoa serikali kwa njia zisizo za kidemokrasia.

"Kamati Kuu ilipokea na kujadili kwa umakini tathmini ya maandamano yaliyofanyika kanda ya ziwa, pamoja na matamko yaliyotolewa na viongozi wa serikali na CCM, wakiwemo Rais Kikwete, mawaziri Bernard Membe, Stephen Wasira, Sophia Simba na John Chiligati...Kamati Kuu imesikitishwa na kauli zilizotolewa na viongozi hao wa serikali na CCM.

"...zinaashiria kuwa viongozi wa CCM hawajui maana na kazi za vyama vya upinzani...Kamati Kuu inapenda umma uelewe kuwa maandamano ya CHADEMA Kanda ya Ziwa yalifanyika kwa taratibu zote za nchi na yalikuwa ya amani tele. Kamati Kuu inapongeza Jeshi la Polisi pale ambapo halikuingilia maandamano hayo pasipo lazima. Malengo ya maandamano yaliainishwa waziwazi kabla, wakati na baada.

"Operesheni zote za kisiasa za CHADEMA hugharamiwa kwa njia ya michango ya viongozi na wanachama pamoja na ruzuku ambayo chama hupokea kutoka Serikali Kuu. CHADEMA haijawahi na wala haina mpango wa kupokea fedha kutoka mataifa ya nje kwa ajili ya maandamano...mbinu za kisiasa kama hizi ni chafu na haziwezi kuiponya CCM magonjwa inayougua.

Bw. Mbowe alisema kuwa CCM imechokwa na wananchi na kuondoka kwake madarakani ni suala linalosubiri muda uamue, akisema kuwa Kamati Kuu hiyo imetambua kuwa Rais Kikwete ameanza kutekeleza walau kwa 'maneno' madai ya msingi yaliyotolewa na chama hicho, ikiwemo kuchukua hatua za kushusha bei ya sukari na gharama za umeme.

"Rais Kikwete na serikali yake wasiwe wazito wala wasione aibu kutekeleza yale yote ambayo CHADEMA inawashauri yenye manufaa kwa nchi lakini wayatekeleze kwa ukamilifu na ufanisi badala ya kufanya kiini macho. Watanzania wana haki ya kudai maisha bora kwa kuwa wameahidiwa muda mrefu na serikali.

"Ni wajibu wa serikali kufanya hivyo kwa kuwa inawatoza kodi wananchi. Kodi ni lazima ziendane na huduma inayolingana, na rasilimali za taifa lazima kwanza ziwanufaishe wananchi wenyewe na si vinginevyo," alisema Bw. Mbowe.

Alisema pia kuwa kamati kuu ya chama hicho imepokea kwa tahadhari na maskitiko taarifa za kuwepo njama za mauaji dhidi ya Katibu Mkuu wa CHADEMA, Dkt. Willibrod Slaa, pamoja na wanasiasa wengine nchini, zilizotolewa na Naibu Waziri wa Ujenzi, Dkt. Harrison Mwakyembe.

Mbali ya kuitaka serikali kuharakisha kufanya uchunguzi wa taarifa hizo zilizotolewa na kiongozi mwandamizi serikalini, kisha kutoa tamko juu ya hilo, CHADEMA wamelitaka Jeshi la Polisi nchini kuhakikisha usalama wa Dkt. Slaa pamoja na viongozi wengine waliotajwa, kama ambavyo linapaswa kulinda wananchi wote.

"Kamati Kuu imepokea taarifa juu ya uamuzi wa serikali wa kuandaa muswada mpya wa Sheria ya Manunuzi...imezingatia kuwa lengo kuu la muswada huo ni kuiwezesha serikali na taasisi zake kununua bidhaa zilizotumika...hiki kitakuwa kisima cha wizi, hatutaunga mkono mabadiliko ya sheria yanayotaka kukidhi mahitaji ya watu, ikiwemo kununua mitambo chakavu.

"Tunatambua sana kuwa kuna mikataba mingi ya nishati hapa nchini tunataka yote itathminiwe...sasa hivi serikali ina mpango wa kukodi mtambo wa megawati 260 kwa takribani dola milioni 260...huu ni utapeli mkubwa...kwa nini wasinunue mitambo yetu wenyewe...wala hatutaki waingie katika biashara yoyote kinyemela na kampuni ya Dowans.

"Kwa nini mitambo hiyo isitaifishwe kwa maslahi ya umma kwa sababu iliingizwa kwa rushwa, hatuwezi kukubali biashara ya kuingia mkataba na Dowans, itumike sheria kutaifisha mitambo hiyo."

Aliongeza kuwa kwa sasa ni hatari Tanzania kutaka kujikita katika uzalishaji wa uranium, wakati haina hata sera za uvunaji wa madini hayo, akisema 'kama nchi imeshindwa hata kuhimili mitambo ya umeme na milipuko ya mabomu, itakuwaje uranium. Tuwaulize wenzetu huko Japan au Marekani sasa hivi hawalali, si kitu cha kukimbilia.

Kwa upande wake Dkt. Slaa alisema kuwa Rais Kikwete ametoa tamko kinyume na katiba ya nchi kwa kuitaka hazina ipunguze kodi katika baadhi ya maeneo, kwani hiyo ni kazi ya bunge na serikali ilipaswa kupeleka mswada bungeni ili hilo lifanyike.