TIC yahamasisha utalii wa mijini

Na Mwandishi Wetu

KITUO cha Uwekezaji nchini (TIC) kwa kushirikiana na Manispaa za Jiji la Dar es Salaam ziko katika mpango wa kuanisha vivutio vya utalii wa
mjini kwa ajili ya kuviendeleza ili visadidie kuongeza mapato ya waliowekeza, serikali na kuongeza ajira.

Mkurugenzi Mtendaji wa Kituo cha Uwekezaji nchini (TIC), Bw. Emmanuel Ole Naiko alisema hayo jana katika kikao kilichojadili uendelezaji Utalii Mijini ambao unalenga kuinua utalii katika Jiji la Dar es Salaam.

“Nimefurahi leo tumekutana hapa sisi na viongozi wa Manispaa za Ilala, Temeke na Kinondoni ili tujadili suala hili muhimu la utalii mijini tukianza na Jiji la Dar es Salaam,” alisema.

Viongozi wengine waliokuwepo ni pamoja na Mkuu wa Mkoa wa Dar es Salaam na pia viongozi wa halmashauri za wilaya ya Kisarawe, Kibaha na Bagamoyo mkoani Pwani.

Alisema viongozi hao walikubali kuainisha vivutio vya utalii katika manispaa zao ili katika kikao kitakachofuata wapendekeze namna ya kuanza utekelezaji wake na pia TIC iweze kuvinadi vivutio hivyo kwa wawekezaji wa ndani na nje.

Naye Kaimu Mkuu wa Mkoa wa Dar es Salaam, Bw. Said Sadik alisema mkoa wake unahitaji kuanzisha vivutio vya utalii vingi kwa kuwa inamaeneo mengi ambayo yakifanyiwa ubunifu yataongeza watalii wa ndani na nje.

“TIC imeanzisha jambo nzuri, hivyo kila manispaa ihakikishe haibaki nyuma katika kuainisha vivutio hivyo kwa lengo la kufanyiwa kazi ili jiji la Dar es Salaam liweze kutembelewa na watalii badala ya kuwa njia tu ya kwenda kwenye mikoa mingine yenye utalii,” alisema Bw. Sadick.

Alisema kwa sasa jitihada zinafanyika kuhakikisha mradi wa mabasi yaendayo kwa kasi unatekelezwa ili kuondoa msongamano kwa lengo la kuwezesha utalii kufanyika jijini Dar es Salaam bila usumbufu.

Naye Mkurugenzi wa Wilaya ya Temeke, Bi. Chiku Gallawa alisema eneo lake tayari limeanza kuendeleza baadhi ya vivutio vya watalii ambapo tayari kuna sehemu ya kuangalia wanyama mbalimbali ambao ni kivutio kwa watalii wa ndani na nje ya nchi.

Naye Mkurugenzi Mtendaji wa Bodi ya Utalii Nchini (TTB), Dkt. Aloyce Nzuki alisema katika kipindi fedha za bajeti zikiwa zinaanza kutengwa kwenda katika miradi mbalimbali wahusiaka wanatakiwa pia kutenga fedha kwa ajili ya kuendeleza utalii katika manispaa hizo.