Mbunge: Hakuna atakayekufa na njaa Jimbo la Solwa

Na Suleiman Abeid, Shinyanga

MBUNGE wa Jimbo la Solwa wilayani Shinyanga, Bw. Ahmed Salum amewahakikishia wakazi wa jimbo lake kwamba hakuna mtu atakayekufa kwa
njaa baada ya serikali kuahidi kulishughulikia suala la uhaba wa chakula katika jimbo hilo.

Bw. Salum alitoa tamko hilo juzi wakati wa kilele cha maadhimisho ya miaka 34 ya kuzaliwa kwa Chama Cha Mapinduzi (CCM) ambayo kimkoa yalifanyika katika Kata ya Mwamala wilayani Shinyanga.

Alisema tayari ameishawasilisha tatizo la uhaba mkubwa wa chakula katika jimbo lake ambao unatokana na hali ya ukame uliojitokeza katika msimu wa mwaka huu na kusababisha mazao mengi kukauka kabla hayajakomaa.

"Ndugu zangu wakazi wa Jimbo la Solwa, naomba msiwe na wasiwasi wowote kuhusu suala la ukame uliojitokeza mwaka huu na kuashiria kuwepo kwa hali ya uhaba mkubwa wa chakula, kilio chenu tayari nimekiwasilisha kwa viongozi wahusika serikalini, na wameahidi kutusaidia.

"Lakini hata hivyo ninawasihi na kuwaomba wale wote wenye akiba ndogo ya chakula wakitumie vizuri, hali si nzuri, na inabidi tuweke mkazo katika kilimo cha mazao yanayostahimili ukame na kukomaa mapema kama vile mtama na jamii ya mikunde, haya yatatusaidia," alisema Bw. Salumu.

Kwa upande wake mlezi wa CCM mkoani Shinyanga na ambaye pia ni Katibu wa Siasa na Uenezi wa Taifa, Kapteni John Chiligati aliwataka wakazi wa mkoa wa Shinyanga kuachana na utamaduni wa kulima zao la mahindi.

Kapteni Chiligati aliyekuwa mgeni rasmi katika maadhimisho ya CCM kutimiza miaka 34, alisema mvua katika eneo kubwa la Mkoa wa Shinyanga huwa ni chache na hivyo kutoweza kustawisha zao la mahindi ambayo wakulima wengi hupendelea kulima zao hilo na badala yake aliwataka wajengee mazoea ya kulima mazao yanayostahimili ukame kama vile mtama.

Naye mkuu wa Mkoa wa Shinyanga, Brigedia Jenerali Dkt. Yohana Balele alisema tayari Halmashauri zote katika mkoa huo zimeishaleta mbegu za kutosha za zao la mtama na kwamba  wakulima wengi wameishauziwa na wamezipanda.

"Ndugu mgeni rasmi, ni kweli eneo kubwa la Mkoa wa Shinyanga hali yake ya hewa huwa siyo nzuri, na sisi kama viongozi wa serikali tumeweka mkazo wa kulimwa kwa zao la mtama ambalo ndilo linastahilimili ukame, mbegu tunazo za kutosha, na tumewashauri wakulima kila kaya ilime ekari mbili za mtama" alisema  Dkt. Balele.