Simba yaidungua Polisi

*Yaitimulia vumbi Yanga FC

Na Mwandishi Wetu, Dodoma

MABINGWA watetezi wa Ligi Kuu Tanzania Bara, Simba jana waliifunga Polisi Dodoma mabao 2-0 katika mchezo wa
ligi hiyo katika mechi iliyopigwa Uwanja wa Jamhuri mjini hapa na kuishusha Yanga Kileleni.

Simba sasa inaongoza ligi hiyo kwa kufikisha pointi 33 na kuiacha Yanga ikiwa na pointi 32.

Katika mechi ya jana timu zote ziliunza mpira kwa kasi huku zikishambuliana kwa zamu ambapo lakini hata hivyo washambuliaji wa pande zote hawakuwa makini katika ufungaji.

Patrick Ochan alikosa bao dakika ya pili baada ya kubaki na kipa ambaye alipiga shuti lililomlenga kipa wa Polisi.

Polisi nayo walijibu shambulizi hilo baada ya kuliandama lango la Simba, lakini hata hivyo kipa Juma Kaseja alikaa imara kupangia mashuti yaliyoelekezwa mshambuliaji Juma Semsue.

Dakika ya 42 Mussa Hassan 'Mgosi', alifunga bao kwa shuti kali lakini hata hivyo, mwamuzi alilikataa kwa madai kuwa kabla ya kufunga alikuwa ameotea.

Kipindi cha pili kilianza kwa Simba kuingia na uchu wa kupata mabao na dakika ya 53, Mgosi alifunga bao hilo kwa mkwaju wa adhabu iliyotolewa na mwamuzi baada ya mabeki wa Polisi kumwangusha Mbwana Samatta wakati akielekea langoni.

Katika kipindi hicho Simba ilimtoa Nico Nyagawa na kumwingiza Shija Mkina, wakati Polisi iliwatoa Detha na Sihaba Mathias, wakaingia Admin Bantu na Pascal Maige.

Polisi ilipata pengo katika kipindi hicho baada ya mshambuliaji wake tegemeo, Semsue kutolewa nje kwa kadi nyekundu na mwamuzi Alex Mahagi baada ya kumkwatua Juma Maftah, wakati awali alikuwa na kadi ya njano.

Simba iliongeza bao lake la pili dakika ya 84, lililofungwa na Mgosi kwa mpira wa kichwa baada ya kuunganisha krosi ya Haruna Shamte.