Watanzania watakiwa kutumia vizuri marekebisho ya katiba

Na John Gagarini, Kibaha

HAKIMU Mkazi Mfawidhi wa Mahakama ya Mkoa wa Pwani, Bi. Sekelela Mwaiseje amewataka Watanzania kutumia vyema marekebisho ya
katiba ili yasije yakatoa mwanya kwa mafisadi kutumia vibaya rasilimali za nchi.

Bi. Mwiseje aliyasema hayo wakati wa siku ya sheria nchini iliyofanyika hivi karibuni Mjini Kibaha kwenye viwanja vya mahakama hiyo.

Alisema kwa kuwa kipindi hichi ni cha kuirekebisha katiba ya nchi umefika wakati sasa mafisadi kubanwa ili wasitumie vibaya rasilimali za wananchi.

"Endapo tutatumia vizuri marekebisho ya katiba ni dhahiri vipengele hivyo havitawapa nafasi mafisadi kutumia vibaya rasilimali za wananchi hali ambayo imesbabisha  watu kulalamika kuwa mafisadi wameleta hali mbaya kimaisha," alisema Bi Sekelela.

Hakimu huyo alisema ili ufisadi udhibitiwe lazima wananchi watengeneze katiba ambayo itaweka usawa katika suala la rasilimali kutumika kwa usawa.

"Katiba ikiwa nzuri watu wa namna hiyo watadhibitiwa na hawataweza kutumia vibaya nafasi zao bali watawajali wananchi ambao wanawategemea katika kuwawekea mipango mizuri ya kiuchumi," alisema Bi. Mwaiseje.

Aliwataka wananchi kufuata sheria ili haki ikiweze kutendeka katika masuala mbalimbali hasa katika kupata haki zao na kuacha kujichukulia sheria mkononi.