Yanga kumuaga Babi Zanzibar leo

Na Elizabeth Mayemba

TIMU ya soka ya Yanga, inatarajia kumuaga rasmi mchezaji wake Abdi Kassim 'Babi', wakati wa mechi yao ya dhidi ya Mafunzo ya Zanzibar, ya kuwania Kombe la
Mapinduzi  itakayochezwa kesho katika katika Uwanja wa Amaan mjini Zanzibar.

Babi alifuzu majaribio katika klabu ya Thang Long ya Vietnam, na uongozi wake, umemalizana na klabu hiyo.

Yanga, kesho itacheza mechi yake ya pili usiku kwenye Uwanja wa Aman mjini Zanzibar, mechi ya kwanza dhidi ya Ocean View,  walitoka sare ya bao 1-1.

Akizungumza Dar es Salaam jana,  Msemaji wa klabu ya Yanga Louis Sendeu, alisema wameamua watumie mechi hiyo kwa kuwa,  Babi ni mchezaji wao aliyeitumikia timu hiyo kwa uaminifu mkubwa.

''Tumeona ni vizuri tukimuaga kwa mchezo wetu wa kesho dhidi ya Mafunzo, kwani muda wowote kuanzia sasa, ataondoka,'' alisema Sendeu.

Alisema katika mchezo huo, Babi atacheza dakika 15 za mwisho, ambazo atatumia kuwaaga mashabiki wa Yanga, viongozi, wanachama na wachezaji wenzake, na tayari kocha anataarifa kuhusu suala hilo.

Sendeu alisema mchezaji huyo anatarajia kuondoka muda wowote kuanzia sasa, ndio maana alishindwa kuunga na timu ya taifa 'Taifa Stars', kwenye nchini Misri kushiriki michuano ya Nile Basin.