Filamu za This is It, Huba zatwaa tuzo

Na Amina Athumani, Zanzibar

FILAMU ya This is it ya msanii Stiven Kanumba na Huba, zimepata tuzo ndogo za ZIFF zinazotolewa na Zanzibar Internation Film Festival,  zitaiwakilisha nchi katika tamasha
kubwa la filamu la bara la Afrika la Fespaco litakalofanyika nchini  Burkina Faso.

Filamu hizo zilikuwa miongoni mwa filamu nane za Kitanzania zilizokuwa zikioneshwa katika ukumbi wa Ngome Kongwe mjini Zanzibar,  ambapo filamu ya This is It na Huba,  ndizo zilizoonekana kuwa, filamu bora na zenye mvuto wa kipekee.

Pia, mhusika mkuu wa filamu ya This is it, Hanifa Daudi, mwenye miaka chini ya miaka 12, alipata tuzo ya muingizaji bora kutokana na umahiri mkubwa aliouonesha katika filamu hiyo.

Kwa ushindi huo, filamu hizo zitaiwakilisha nchi kwenye tamasha ambalo linatarajiwa kufanyika  Februari mwaka huu nchini Burkina Faso, ambapo litashirikisha nchi mbalimbali za bara la Afrika.

Akifunga tamasha hilo juzi,   Mwenyekiti wa ZIFF, Hassan Mitawi,  alisema soko la filamu nchini,   litatakiwa kuchukua sura mpya,  ikizingatiwa kwamba, baadhi ya nchi kwa sasa zinategemea uchumi wa soko la filamu.

Tujitahidi tuwe kama Nigeria, nchi hii kwa sasa inategemea filamu katika uchumi, tupige hatua ili filamu zetu  zionekane hadi Ulaya, tuweze kuongeza pato la taifa kupitia filamu, alisema Mitawi.

Alisema awali, alikuwa akienda Ulaya akiwa amebeba nyanya chungu, kwani kule hakuna, lakini alipokuwa akiwapa, wao walikuwa wakimpa saa.

Mwenyekiti huyo alisema hivi sasa anapeleka filamu ambazo wameanza kuzikubali, hivyo waongeze nguvu ili wapate manufaa zaidi.

Alisema ZIFF itaendelea  kuunga mkono zaidi filamu za kitanzania,  kwa kuziandalia mazingira mazuri ya kuoneshwa nje ya nchi kama ilivyo kwa Nigeria, ambao soko lao limekuwa kubwa hivi sasa.

Tamasha hilo dogo la ZIFF, lilikuwa maalumu la siku tatu kwa ajili ya kuonesha filamu za kibongo na kuzipata mbili bora zitakazoshiriki tamasha la Afrika.

Filamu zilizogombania nafasi hiyo ni Nani, Divorce, Best Wife, Don't Cry, This is it, Huba na  Black Sunday,  ambapo tamasha kubwa la ZIFF litakalohusisha filamu kutoka nchi mbalimbali za majahazi, litafanyika  Julai mwaka huu mjini Zanizibar.