Usalama wa Taifa wamjibu Dkt. Slaa.

* Wasema madai yake ya uongo, yanalenga kuvuruga amani
* Rostam ajitetea tuhuma za kupanga uchakachuaji kura
* Yeye ataka wasijibu kisiasa bali wafanyie kazi madai
Grace Michael na Tumaini Makene

IDARA ya Usalama wa Taifa imejitokeza kujibu tuhuma mbalimbali zinazotolewa na mgombea urais kupitia Chama cha Demokrasia na Maendeleo (CHADEMA),
Dkt. Willibrod Slaa na kusema kuwa taarifa anazotoa kwa wananchi ni za uongo zenye lengo la kuvuruga amani ya nchi.

Hivi karibuni, mwanasiasa huyo alikaririwa akiihusisha Idara hiyo na uchakachuaji matokeo ya kura za urais kwa nia ya kumsaidia mgombea kupitia Chama Cha Mapinduzi (CCM), Rais Jakaya Kikwete.

Hatua ya kujitokeza hadharani viongozi waandamizi wa Idara ya Usalama wa Taifa kujibu hoja za wanasiasa, ni ya kwanza katika historia ya mfumo wa vyama vingi nchini na zaidi tangu nchi ipate uhuru.

Akijibu tuhuma hizo, Naibu Mkurugenzi wa Idara ya Usalama, Bw. Jacky Zoka aliwataka wananchi kupuuza kauli hizo na kueleza kuwa Dkt. Slaa anatumia taarifa za uongo kuwachochea. Alisisitiza kwamba idara hiyo haiwezi na wala haiko kwa ajili ya kukisaidia chama chochote kwa maslahi ya nchi.

“Tangu kampeni za Uchaguzi Mkuu zilipoanza, kumekuwa na tuhuma mbalimbali kuwa Idara imekuwa ikiwasaidia baadhi ya wagombea,  hususan  CCM na tuhuma hizo zimekuwa zikitolewa na  Dkt. Slaa, tuhuma hizo zimekuwa hazijibiwi kwa sababu si utaratibu wa idara kujibu mambo ya namna hiyo lakini imefika mahala idara imeona itoe tamko,” alisema Bw. Zoka.

Alisema kuwa Idara imefikia hatua ya kujibu kutokana na kuona kwamba kimya chake kinachukuliwa kama sababu ya kumfanya Dkt. Slaa azidi kutoa tuhuma za uongo hasa anapoona matokeo yanayoendelea kutolewa, hayamwendei vizuri.

“Kwa mfano jana (juzi), alizungumza na vyombo vya habari na kudai kuwa matokeo yanayotangazwa na Tume ya Taifa ya Uchaguzi ni yaliyotengenezwa na Idara ya Usalama hivyo hatayakubali...tuhuma hizi ni nzito na zisipojibiwa wananchi wanaweza kuamini kuwa viongozi watakaopatikana si wale waliowachagua bali ni wale ambao idara ilitaka wawe,” alisema.

Kutokana na hali hiyo, alisema kuwa Idara inachukulia tuhuma hizi kama jitihada zilizopangwa makusudi kwa nia ya kuichonganisha na wananchi na kuwahakikishia kuwa tuhuma hizo ni za kuzua zenye lengo maalum la kuchochea au kutaka aonewe huruma na wananchi.

Alisema kuwa utaratibu wa kupiga kura ni wa wazi unaoendeshwa kwa kanuni ambazo hazihusishi Idara ya Usalama na kura zinapopigwa na kuhesabiwa, hakuna ofisa usalama anayekuwepo hivyo idara haihusiki kwa namna yoyote ile katika mchakato mzima.

Bw. Zoka alisema kwa utaratibu huo haiingia akilini ni sehemu gani ambapo ofisa usalama anaweza kupata nafasi ya kuchakachua kura hizo hivyo tuhuma hizo zina lengo pia la kuipaka matope idara hiyo.

“Lengo la Idara ni kuhakikisha nchi inakuwa na amani na sikuwa chanzo cha kuhatarisha usalama kwani ina jukumu la kufanya kazi kwa maslahi ya Taifa hivyo hawana sababu ya kuchakachua kura kwa kuwa suala hilo halina maslahi kwa taifa,” alisema.

Akizungumzia utendaji  kazi ya Idara hiyo, alisema ni chombo kinachofanya kazi kwa misingi ya maadili yaliyoainishwa kisheria na misingi hiyo haina sehemu ya kupendelea chama chochote na utaratibu wa kufanya kazi zake kwa siri usiwe chanzo cha watu kama Dkt. Slaa kuituhumu kwa mambo ya uongo yasiyo na nia njema kwa Taifa.

“Kama ana ushahidi kuwa Idara inahusika na anayoyasema atoe autoe na kila mtu athibitishe bila shaka yoyote ...tunasisitiza kwamba kwa makusudi au kwa kudanganywa na wanaojiita maofisa wa usalama, Slaa mejikuta akitumia taarifa za uongo kutoa matamshi ya kuwadanganya Watanzania ili kuwachochea kuvunja amani kwa lugha ya kawaida, ameingizwa mjini na yeye akaingia kichwa kichwa,” alisema Bw. Zoka.

Alisisitiza kuwa  Idara haihusiki kwa njia yoyote kuingiza taifa kwenye mgogoro wa kisiasa kama anavyotaka wananchi waamini.

Wakati huo huo Dkt. Willibrod Slaa ameeleza kushangazwa kwake na hatua ya Idara ya Usalama wa Taifa kuamua kujibu hoja kama wanasiasa badala ya kufanyia kazi taarifa na kuliokoa taifa katika ufisadi unaolitafuna taifa.

Akizungumza na waandishi wa habari juu ya tamko la Usalama wa Taifa, lililotolewa mapema jana na Naibu Mkurugenzi wa Idara Bw. Zoka,  Dkt. Slaa alisema kwa kawaida Idara hiyo ilipaswa kufanyia kazi taarifa za ukiukwaji wa taratibu za uchaguzi kwa maslahi ya nchi na wananchi ambao ndiyo waajiri wao, si kukanusha kuwa hawakuhusika na uchakachuaji wa matokeo.

"Nimeshasema mimi sitishiki...katika principle (masuala ya msingi) mimi sitishiki na mtu yeyote...nimeshasema kuchakachua kura ni ufisadi kama ufisadi mwingine na nitauita hivyo hivyo, Usalama wa Taifa walipaswa kufanyia kazi taarifa nilizozitoa jana si kujibu kama wanasiasa, kama wanataka basi nao waingie kwenye siasa ili wajue maana ya kile ninachokizungumza juu ya wizi wa kura.

"Mimi nina uzoefu nao tangu wakati wa ufisadi wa EPA nilipata barua yao wakizuia hoja za ufisadi wa EPA, isiende bungeni, wanamweleza Waziri Mkuu kuwa serikali haina majibu ya hoja ya ufisadi huo...nilitegemea wafanyie kazi taarifa si kukana kuwa hawahusiki nilichokisema," alisema Dkt. Slaa na kuongeza;

"Nafurahi kwa mara ya kwanza Usalama wamejibu tuhuma, tena wameandika, maana mtu akiandika unamjua vizuri...nilitegemea kwa mfano Dkt. Slaa anasema kura zake zilizoko vituoni ni elfu ishirini lakini zimetangazwa elfu tatu, wazitafute hizi wajue zimeenda wapi, ndiyo kazi yao walipaswa kuwa wa kwanza kujua...wajue kuwa Usalama wa Taifa si Usalama wa CCM, wala chama chochote kingine, bali taifa."

Alisema kuwa Idara hiyo imeajiriwa kwa kodi ya Watanzania wote hivyo wanapaswa kulinda maslahi ya nchi na kudai kuwa kwa sasa haifai, kwani imeshindwa mara kadhaa kulinda maslahi ya na haki za watu."

Kuna mahali huyu Naibu Mkurugenzi ameandika juu ya Sheria ya Uchaguzi, hii haina haja, anazungumzia nadharia, sisi tunataka vitendo, tuko kwenye siasa haya ya Sheria za Uchaguzi tunayajua vizuri...kwa mfano ninazo taarifa kuwa walikwenda Karatu wakaingia vituoni wakitoa maelekezo, msimamizi akawakatalia akisema hawaruhusiwi kuwa vituoni, wala hakuna taarifa ya uwepo wao.

Mapema, mgombea ubunge Jimbo la Kinondoni, Bw. Philip Mugendi alidai kuwa yeye na wagombea wengine wa vyama vya upinzani walikamata masanduku 25 ya kura katika nafasi ya urais na ubunge, ambayo yalikuwa hayajahesabiwa lakini yalikuwa katika eneo la kujumlishia matokeo.

Akitoa namba ya masanduku hayo 25, alidai kuwa yalikuwa mengi zaidi lakini wakanakiri idadi hiyo wakiamini ni ushahidi wa kutosha, Bw. Mugendi alisema kuwa matokeo ya Jimbo la Kinondoni katika nafasi zote za udiwani, ubunge na urais, yamechakachuliwa kwa kiasi kikubwa ambacho yanatia shaka kuaminika, kwani kulikuwa na ukiukwaji mkubwa wa taratibu za uchaguzi.

Wakati huo huo, Mbunge mteule wa Jimbo la Igunga, Bw. Rostam Aziz amekanusha tuhuma zilizotolewa na Dkt. Slaa kuwa alishiriki kikao cha kupanga kuhujumu uchaguzi huko Mwanza.

Katika taarifa yake aliyoitoa kwa vyombo vya habari jana, Bw. Rostam alisema taarifa hizo ni za uongo kwani tarehe iliyotajwa alikuwa safarini Afrika Kusini na alirejea, Oktoba 19 mwaka huu.

"Tarehe anazotaja Dkt. Slaa,mimi nilikuwa Afrika Kusini na nimerejea nchini usiku wa Oktoba 19, 2010. Kwa maana hito nisingeweza kuwa Mwanza , Napenda kuambatanisha nakala ya pasipoti yangu na nakala ya tiketi  ikionesha siku nilipoondoka kwenda afrika Kusini na siku niliporejea,"  alisema Bw. Rostam na kuongeza ;

Hata kama ningekuwepo nchini  kwa mfumo wetu wa uchaguzi  uwezekano wa mtu , kikundi au taasisi kuiba kura haupo. Wasimamizi wa Uchaguzi wa Kimataifa wamesifia mfumo wetu  na wameeleza utaratibu mzima ulivyokwenda  vizuri na wameeleza kuwa uchaguzi huu ulikuwa huru na wa haki"

Alimshambulia Bw. Slaa na kumwelezea kuwa ni mwongo na mkurupukaji na kwamba anazusha jambo hilo kwa lengo la kuwapotosha Watanzania.

" Dkt. Slaa ni mtu mzushi, mwongo na mkurupukaji, hata historia yake inathibitisha kuwa si mtu mkweli. Watanzania ni vizuri wamemfahamu Dkt. Slaa kuwa amekuwa mtu asiyeaminika  katika maisha yake yote  na kwa ajili hiyo wamemnyima fursa ya kuongoza taifa letu. Amedanganya katika kampeni  na kabla ya kampeni ana historia ya kumdanganya hata Mungu, hivyo haiwezi kuwa kazi ngumu kwake kumzushia mtu yeyote na kuwapotosha Watanzania" alisema Bw. Rostam na kuongeza;

"Slaa na CHADEMA tangu mwanzo wa kampeni walijua watashindwa  na wamejiandaa kukataa matokeo na kusababisha vurugu kutishia nyau  waingizwe serikalini  kama ilivyotokea Zanzibar . Uongo huu umethibitisha nia yao hiyo. Watanzania tukatae hila zao , uchaguzi umekwisha, wananchi wameamua."