Sitta kuigharimu CCM 2015.

Na John Daniel

MCHUANO wa nafasi ya uspika ndani ya Chama Cha Mapinduzi (CCM), umezidi kufichua mengi baada ya baadhi ya wabunge na wanazuoni wa chama hicho kutoboa siri kuwa kauli za
kejeli dhidi ya Spika Samuel Sitta ni maumivu yanayotokana na majeraha ya vita vya ufisadi.

Wabunge hao wameonya kuwa iwapo CCM kupitia Kamati Kuu (CC) itamwangusha Bw. Sitta katika kinyang'anyiro hicho, chama hicho kitajutia kitendo hicho katika uchaguzi Mkuu mwaka 2015.

Wakizungumza na Majira kwa nyakati tofauti jana, baadhi ya wabunge hao wateule na wanazuoni waliojipambanua kuwa ni wana-CCM walisema wanasikitishwa na hali iliyojitokeza juzi, ya mmoja wa wagombea, Bw. Andrew Chenge kumshambulia Bw. Sitta bila sababu za msingi zinazoeleweka kwa wananchi.

"Mhe. Chenge ni mzoefu ndani ya chama, anajua taratibu zote za kumjadili na kumwonya mtu ndani ya chama kupitia vikao. Inasikitisha na kuzua maswali mengi inakuwaje anamrushia mjumbe mwenzake wa Kamati Kuu shutuma za kizushi kiasi kile," alihoji mmoja wa wabunge CCM.

Mbunge huyo aliyekuwa akizungumza na Majira kutoka Dodoma, alisema kitendo hicho ni dalili mbaya ya mpasuko mkubwa ndani ya CCM.

Alisema kama angekwepo Baba wa Taifa hayati Mwalimu Julius Nyerere angechukua maamuzi mazito dhidi ya Bw. Chenge na kumaliza tatizo hilo.

"Shutuma zote na vita vikali vinavyoelekezwa kwa Sitta ni kutokana na majeraha ya vita vya ufisadi, watu hao wanatafuta njia ya kujisafisha na kudanganya Watanzania kwa malengo yao binafasi hapo baadaye.

Kama angekwepo Baba wa Taifa angechukua fomu ya Chenge na kuitupa kwenye shimo la takataka, tena angefanya hivyo kwenye Kamati Kuu mbele ya wajumbe, alichofanya ni jambo la aibu na ameonesha ishara na dalili mbaya sana kwa chama mbele ya jamii," alidai mbunge mwingine.

Baadhi ya wanazuoni walisema baada ya uchaguzi Mkuu Mwenyekiti wa chama hicho Rais Jakaya Kikwete, anapaswa kuwa makini zaidi na kutambua kuwa ndani ya chama chake kuna kundi linalotaka kumwangusha kwa kuharibu mipango yake mziuri kwa Watanzania.

"Nadhani hawa jamaa sasa wanataka kumvuruga rais ili wananchi wachukie CCM kisha wao wajidai kuwa wanamsaidia kuimarisha chama kwa uwezo wao wa kifedha, hii ni hatari sana. Iwapo CCM itamwacha Sitta katika nafasi ya spika wa Bunge madhara yake makubwa zaidi yataonekana mwaka 2015," alisema Mbunge mwingine.

Walisema wamebaini mbinu zinazosukwa na kundi hasimu dhidi ya Bw. Sitta kuongeza nguvu kuhakikisha jina lake linakatwa kwenye Kamati Kuu kwa kuwa ikiingizwa bungeni litapita kutokana na kupendwa na wabunge wengi.

Vyanzo vyetu vilieleza kuwa Bw. Sitta anaandaliwa Wizara moja jina linahifadhiwa kwa sasa, iwapo hatapata nafasi ya uspika huku kundi hilo likimwekea mtego wa kumchafua katika wizara hiyo baadaye.

Ilielezwa kwamba kundi hilo linafanya mpango kupitia kwa watu walio karibu na Rais Kikwete ili kumpa wizara hiyo na kwamba wataandaa mtego kupitia bunge kumchafua ili kummaliza kisiasa.

Habari zaidi zilieleza kwamba kundi hilo hasimu linamwohofia Bw. Sitta kuwa iwapo hawatamdhibiti kwa mbinu chafu anaweza kuwa tishio kwao katika kinyang'anyiro cha urais mwaka 2015.

Katika hatua nyingine, mkazi mmoja wa Dar es Salaam aliyejitambulisha kama Cathy, alipiga simu chumba cha habari na kueleza masikitiko yake kwa kitendo cha Taasisi ya Kuzuia na Kupambana na Rushwa (TAKUKURU) kuibuka na kumsafisha Bw. Chenge wakati huu ambapo anawania uspika.

"Hivi hii TAKUKURU ilikuwa wapi siku zote hadi isubiri wakati huu anapowania uspika ndipo itoe taarifa kumsafisha?" alihoji Bi. Cathy na kuongeza:

"Hii TAKUKURU ni ya matajiri, si ya maskini. Wanatuamuliwa mtu wanayemtaka. Inaendeshwa kwa maslahi ya watu fulani, si ya wananchi.

"Kinachonisikitisha ni kwamba hata chama chenyewe kimeshindwa kuwawajibisha watu wake, wameachwa kulindwa na TAKUKURU. Hata Mungu amekasirika ndio maana wamepata asilimia 61 licha ya mabango yao kuwekwa kila sehemu nchi nzima," alisema Bw. Cathy.