Nafasi ya Pinda yazua hofu mpya.

Vigogo CCM waanza kuimezea mate, wajipanga.
Kikwete kuunda baraza 'dogo' la mawaziri.
Na Tumaini Makene
WAKATI duru za siasa za Tanzania zikielekezwa mjini Dodoma ambako wiki hii itajulikana mbivu na mbichi juu ya nani atakuwa spika, naibu wake na waziri mkuu, wachambuzi wa
mambo wameanza kudodosa Baraza la Mawaziri la Rais Jakaya Kikwete, katika awamu yake ya pili na ya mwisho ya utawala, huku nafasi ya waziri mkuu ikimezewa mate na vigogo.

Duru ndani ya serikali iliyomaliza muda wake, hususan sehemu ya baraza la mawaziri na katika mtandao wa Chama Cha Mapinduzi (CCM) zinasema kuwa kuna uwezekano mkubwa wa Rais Kikwete kuja na kile walichokiita 'Baraza la Mawaziri la Slaa', wadodosaji hao kutoka ndani wamelijuza Majira kuwa baraza la namna hiyo litakuwa na sifa kuu tatu.

Wamezitaja sifa hizo kuwa ni; Kwanza baraza dogo likiwa na mawaziri wachache huku kazi nyingi za serikali zikifanywa na watendaji kama vile makatibu wakuu na wakurugenzi wa idara na taasisi mbalimbali, pili likipatikana kwa kutegemea utendaji kazi wa mtu zaidi, bila kujali eneo anakotoka mhusika wala ukaribu wake na raia, lakini kwa kujali uzoefu wa mtu katika masuala ya uendeshaji wa serikali.

Itakumbukwa kuwa wakati akitafuta wadhamini ili ateuliwe na chama chake kuwa mgombea urais na hata wakati wa kampeni, Dkt. Willibrod Slaa CHADEMA alikuwa akisema moja ya vipaumbele vyake ni kupunguza ukubwa wa serikali, ambapo alitaka katiba ya nchi iwe na kipengele cha idadi ya mawaziri, huku yeye akiahidi mawaziri wasiozidi 20 kwa baraza zima.

Alipata kusikika akisema kuwa uwaziri haupaswi kugawiwa kwa kufuata kanda, ili kuwaridhisha watu wote wa kila eneo nchini, bali msingi mkubwa unapaswa kuwa ni uwezo wa utendaji kazi wa mtu.

Wachambuzi hao wameliambia Majira kuwa kuna uwezekano mkubwa Rais Kikwete akaamua kuepuka kuteua mawaziri wake wa awamu hii kwa misingi ya kujuana au urafiki kama ilivyokuwa inaelezwa katika baraza lililopita, wakidai kuwa hali hiyo ilimgharimu katika utendaji kazi wa serikali yake na yeye mwenyewe kwa miaka mitano iliyopita.

"Huyu bwana anaweza kuja na baraza la mawaziri la Slaa, maana kwa kweli hii staili ya kuchagua mawaziri wengi, kwa kujuana, hata serikali ikaitwa ya kishikaji au kutaka kila kanda au mkoa nchi hii utoe waziri umeligharimu taifa kwa kuwa na mawaziri wasiokuwa na uwezo kabisa, kama...(anataja jina la mmoja wa mawaziri vijana ambaye pia amepita ubunge).

"Lakini hiyo itategemea na msimamo wake, maana tayari kumeanza kusikika minong'ono kuwa kuna watu wanapigana, hawalali usiku na mchana kuhakikisha baadhi ya mawaziri hawarudi katika baraza au wasirudi katika wizara walizokuwa nazo awali hata kama wana uwezo.

"Hii yote ni mikakati ya kundi la wana mtandao wanaopanga safu zao sasa serikalini kujiandaa na uchaguzi mkuu 2015," kilisema chanzo chetu kikiomba kuhifadhiwa jina kutokana na ukaribu wake na watu serikalini na CCM.

Aliongeza "Hawa watu (wana mtandao) mpaka sasa wanapigana na wanatoa mbinyo kweli kweli kuhakikisha Kikwete haendelei na Pinda (Mizengo, waziri mkuu aliyepita) katika nafasi yake, wanataka akae mtu wao hapo, wakishaweka itakuwa rahisi pia kuweka baadhi ya mawaziri katika sehemu fulani fulani, hasa inayolengwa ni Wizara ya Mambo ya Nje na Ushirikiano wa Kimataifa.

"Wizara hiyo sasa inaonekana kuwa ni 'dili', maana wanahisi kila mtu anayekaa pale kwa muda mrefu anakuwa njia pana ya kwenda ikulu kuwa rais, kama ilivyotokea kwa Mkapa (Rais Mstaafu Benjamin) na kisha kwa Kikwete. Wanajipanga kuhakikisha wanaweka mtu wao, kama si hivyo basi atakayepewa asiwe na ambition (tamaa) ya kwenda ikulu, ndiyo maana hawako radhi Membe arudi hapo lakini wako tayari apewe hata Profesa Anna Tibaijuka," alisema kwa kirefu mtu huyo.

Kwa mujibu wa chanzo hicho, Wizara ya Mambo ya Nje na Ushirikiano wa Kimataifa, sasa imegeuka kuwa lulu, ikionekana kuwa ni ngekewa au ngazi ya kupandia kwenda ikulu, ikitokea mtu amekaa katika wizara hiyo kwa muda mrefu, hivyo inapiganiwa huku kundi la wanamtandao lililoasisiwa na Rais Kikwete na rafiki zake tangu mwaka 1995, lililoko ndani ya serikali na CCM, likiimezea mate.

Mwanazuoni wa Chuo Kikuu cha Dar es Salaam, Bw. Bashiru Ally alisema uteuzi wa baraza la mawaziri unategemea mambo kadhaa ukiwemo uzoefu, uadilifu, jinsi, usikivu wa mtu na agenda ya rais katika kipindi husika.

"Suala la uadilifu limekuwa likiachwa na CCM katika suala la uteuzi na tumekuwa na chaguzi mbili ndani ya serikali moja. Yaani wakati tunasubiri uteuzi wa rais, kuna watu wanajipanga pembeni kutaka nani akae sehemu gani ili kujipanga na uchaguzi wa mwaka 2015," alisema Bw. Ally ambaye aliweka wazi kuwa hatashangaa kuona baraza hilo linakuwa na wanawake wengi, kwa kuwa wameonesha kuweza.

Msomi huyo alizungumzia nafasi 10 anazoepewa rais kuteua wabunge kuwa mantiki yake ni kumsaidia rais kupata watu ambao hawawezi kuomba kura na wakapewa lakini ni watu wazuri kwa utendaji, hivyo zikitumika vizuri zinaweza kutoa mawaziri wazuri.

Mbali na Bw. Ally, vyanzo zaidi vimesema kuwa wengine 'watapewa' wizara kwa lengo la kuwamaliza kisiasa.

"Iko mikakati ya kuhakikisha baadhi ya watu ambao watakuwa tishio kwa kundi la wanamtandao kwa urais mwaka 2015, wanapewa uwaziri katika wizara zenye kashfa au zitakazoundiwa zengwe la kashfa, kisha wachafuke katika jamii na watemwe serikalini.

Huku jina la mtu atakayekuwa waziri mkuu likianza kudodoswa zikiwepo tetesi kuwa kuna 'mbinyo' Bw. Pinda asiendele, huku upande mwingine hasa wa wanaotaka Rais Kikwete amalize 'salama', ukitaka aendelee na waziri mkuu wake huyo kwa miaka mingine mitano kama alivyofanya mtangulizi wake, Mkapa. Tayari kuna majina yameanza kutajwa kuwa yanaweza kuingia barazani.

Ingawa majina yamekuwa hayaendi na vigezo, walau mpaka sasa vipo vigezo kadhaa ambavyo kutokana na kauli na mwenendo wa Rais Kikwete kwa miaka mitano iliyopita haviwezi kuepukika, kama vile ujana, usawa wa kijinsia. Suala la uzoefu serikalini limekuwa likiwekwa kando katika teuzi kadhaa kwa muda mrefu sasa serikalini.

Mpaka sasa majina yanayotajwa yanatokana na ama uhodari wa kuchapa kazi au ukaribu na Rais Kikwete, kama vile Profesa Anna Tibaijuka, Bernard Membe, Lawrence Masha, Edward Lowassa, Emmanuel Nchimbi, Zakia Meghji, Samuel Sitta, Rostam Aziz, Profesa Juma Kapuya, Dkt. John Magufuli, Profesa Mwandosya na Pinda.