Samuel Sitta atemwa rasmi.

Anna Makinda, Anna Abdallah, Kate Kamba wapeta
Makamba asema lengo ni mwanamke aongoze bunge

Emmanuel Kwitema na Tumaini Makene
ULE mkakati uliokuwa ukisemwa muda mrefu wa kutaka kumng'oa Spika wa Bunge, Bw. Samuel Sitta umepata baraka za
Chama Cha Mapinduzi (CCM) kwa kumuweka kando na kuwapitisha wanawake watatu kuwania nafasi hiyo.

Wanawake waliopitishwa ni aliyekuwa Naibu Spika katika bunge lililopita, Bi. Anna Makinda, mwenyekiti mstaafu wa Umoja wa Wanawake Tanzania (UWT), Bi. Anna Abdallah na mbunge mstaafu wa Afrika Mashariki, Bi. Kate Kamba.

Akizungumza na waandishi wa habari mara baada ya kikao cha Kamati kuu ya CCM mjini Dodoma jana, Katibu Mkuu wa CCM, Bw. Yusuf Makamba alisema lengo la uamuzi huo ni kutoa fursa kwa mhimili huo kuongozwa na mwanamke kwa mara ya kwanza tangu uhuru.

Kwa uamuzi huo, waliotemwa na Spika Sitta, Mbunge mteule wa Bariadi Magharibi, Bw. Andrew Chenge, Bw. Job Ndugai,  John Maurice, Bw. Salim Kungulilo, Bw. Samuel Sitta, Bw. Benedict Lukwembe na Bw. Kazimbaya Makwega.

Awali, habari zilizolifikia gazeti hili zilisema kuwa  mpambano wa kuwania kugombea nafasi za uspika na unaibu spika ndani ya CCM ulikuwa umesukiwa mikakati mikali ikitawaliwa na maslahi binafsi ya baadhi ya viongozi wa chama huku sifa kama vile uzoefu, utendaji kazi kwa maslahi ya nchi na wananchi vikiwekwa kando.

Ilielezwa kuwa kwa makusudi ya mikakati hiyo ni kuhakikisha wagombea wote katika nafasi hizo wanapatikana kwa maelekezo ya kundi fulani, ili kuweka watu wanaowataka kulinda maslahi yao na yale ya chama na serikali, hasa wakati wa mijadala mikali inayoihenyesha serikali, mara bunge likapoanza kukutana.

Kutokana na mikakati hiyo inayosemwa kuwa ni ya hali ya juu, ikiwa imepata baraka za uongozi wa juu ndani ya CCM, lengo likiwa ni kupata spika atakayeweza kulinda maslahi ya CCM zaidi, hususan kundi husika na kufanya nafasi ya Bw. Sitta kuwa ndogo kukosekana kabisa.

Habari zilizolifikia Majira jana wakati vikao vya ndani vya CCM vikiendelea na mchakato wa kuchuja majina hatimaye kupata matatu yatakayowasilishwa kwenye kamati wa wabunge wa CCM ili kupata moja litakalochuana na wagombea wa upinzani bungeni, zilihabarisha kuwa kuna kundi lilikuwa limejipanga kuhakikisha jina la Bw. Sitta halipenyi katika vikao vya chama na badala yake anachaguliwa mgombea mwingine.

Vyanzo mbalimbali vya habari kutoka ndani ya CCM vimelijuza Majira kuwa mkakati unaosukwa kwa uratibu wa baadhi ya viongozi waandamizi wa CCM, umeshafanikiwa kujenga ushawishi kuwa mgombea uspika wa chama hicho anapaswa kuwa mwanamke, ambaye ameandaliwa (jina tunalo).

Kwa mujibu wa vyanzo hivyo mikakati iliyokuwepo ilikuwa kuhakikisha Bw. Sitta hapitishwi na CCM kugombea uspika, bali nafasi hiyo ama iende kwa Bw. Andrew Chenge au mmoja wa wagombea wanawake ambao walikuwa wameandaliwa tayari, ikiwa ni pamoja na kushawishiwa kuchukua fomu, kisingizio kikiwa ni kupata mtu ambaye atarejesha utulivu ndani ya chombo hicho na zaidi kujali nafasi ya mwanamke.

Lakini kwa upande mwingine, mkakati wa kundi hilo ulikuwa umepata sababu ya kusema kuwa upande wa Sitta na Chenge zina mvutano, hivyo kutoa sababu ya kutafuta mtu wa tatu wa kusawazisha hali hiyo.

Vyanzo vya habari vya Majira vilizidi kuongeza kuwa mwangwi wa kutokubalika kwa Bw. Chenge ulisababisha wapanga mikakati waamue kujipanga upya kwani matazamio ya kupeleka wagombea wawili, mgombea wa mwanamke na mwanaume yalikuwa yameshindikana kwani uwezekano wa mwanamke kuchaguliwa ungelikuwa mkubwa kuliko mwanaume waliyemtaka, ambaye tayari ilishaonekana hakubaliki na umma ungeshangaa iwapo angechaguliwa kuwa spika.

"Isingekuwa tatizo, lakini mambo yamegongana...imetokea kuwa katika nafasi ya unaibu spika kwa CCM amejitokeza mgombea mmoja pekee, Bi. Jenista Mhagama, hivyo wakapiga mahesabu kuna uwezekano wa kupoteza moja ya nafasi hizo au zote kabisa, kwa sababu ingekuwa vigumu vikao vya CCM kuchagua spika na naibu wake, wote wawe jinsia moja, hasa kwa nyakati kama hizi za masuala ya usawa wa kijinsia.

"Sasa ukapangwa mkakati mwingine wa kuhakikisha mmoja wa wagombea mwanaume kati ya waliojitokeza kuwania uspika ambaye anaonekana kuwa ni tishio kwa yule mwanamke waliyemuandaa, ashuke chini na achukue fomu ya unaibu spika apambane na Jenista Mhagama, huko watampitisha huyo mwanaume, hivyo yule mwanamke anayewania uspika apita bila mgogoro," kilisema moja ya vyanzo vyetu vilivyo karibu na kinachoendelea ndani ya CCM.

Wakati hayo yakielezwa, taarifa kwa vyombo vya habari kutoka Idara ya Itikadi na Uenezi ya CCM, iliyotumwa jana kwa vyombo vya habari ilisema kuwa Sekretarieti ya Halmashauri Kuu ya Taifa ya chama hicho iliyokutana Novemba 9, mwaka huu chini ya Uenyekiti wa Katibu Mkuu, Bw. Yussuf Makamba, imeongeza muda wa wanachama wa CCM kuchukua fomu za kuwania nafasi ya unaibu spika.

Taarifa hiyo ilisema kuwa muda wa mwisho sasa utakuwa ni Novemba 13 saa 10.00 jioni ambazo zitapatikana katika ofisi ya wabunge wa CCM iliyopo katika Ofisi ya Bunge mjini Dodoma.

"Awali muda wa mwisho ulikuwa tarehe 8/11/2010 saa 10.00 jioni. Majina ya walioteuliwa na vyama vya kugombea nafasi hiyo yanatakiwa kuwasilishwa Ofisi ya Katibu wa Bunge tarehe 15/11/2010. Kamati ya Wabunge wote wa CCM itakutana tarehe 14/11/2010 kuchagua jina moja la mgombea wa nafasi hiyo," ilisema sehemu ya taarifa hiyo ya CCM.

Wakati huo huo, Mkurugenzi wa Bunge na Halmashauri wa Chama cha Demokrasia na Maendeleo (CHADEMA), Bw. John Mrema aliliambia Majira kuwa chama hicho kimempitisha mmoja wa waasisi wa siasa za mageuzi na wakili maarufu, Bw. Mabere Marando kuwania uspika.

Bw. Marando ni Mjumbe wa Kamati Kuu ya CHADEMA, akiwa amejiunga na chama hicho mwaka huu, akisema kuwa aliamua kuahirisha kustaafu siasa za jukwaani na kuamua kurudi baada ya kufurahishwa na uamuzi wa Dkt. Willibrod Slaa kugombea urais wa Tanzania, kwa tiketi ya CHADEMA.

Amewahi kuwa mbunge wa Jimbo la Rorya kwa miaka mitano, mwaka 1995 hadi 2000, kisha akawa mmoja wa wabunge wa mwanzo katika baraza la kwanza la kutunga sheria, Afrika Mashariki.

Jitihada za kupata jina la nani atasimama kuwania kiti hicho kwa upande wa Chama cha Wananchi (CUF) hazikufanikiwa baada ya kuwasiliana na mmoja wa viongozi walioko Dodoma, lakini akasema hawezi kuzungumza na akaomba apewe muda mpaka atakapomaliza kikao alichokuwa akihudhuria.