Uingereza sasa yairuka Takukuru kuhusu Chenge.

Yasema kashfa ya rada haijafika mwisho
*Kesi yake kuanza kunguruma Novemba 23

Na Tumaini Makene
SAKATA la tuhuma za mlungula linazomkabili aliyekuwa Mwanasheria Mkuu wa Serikali, Bw. Andrew Chenge juu ya ununuzi wa rada linaonekana
bado bichi, baada ya Serikali ya Uingereza kuweka bayana kuwa kwa sasa haiwezekani kuhitimisha suala hilo na kutoa uamuzi kuwa mtu yeyote kuwa ana makosa au la.

Taarifa hiyo ambayo inaonekana kuwa ni sawa na kukanusha taarifa nyingine ya Taasisi ya Kuzuia na Kupambana na Rushwa (TAKUKURU) juu ya kashfa ya ununuzi wa rada, iliyotolewa juzi ikimsafisha Bw. Chenge, imeweka wazi kuwa katika hatua iliyofikiwa sasa katika uchunguzi, suala hilo halijafikishwa mahakamani kwa uamuzi.

Taarifa ya TAKUKURU iliyotolewa hivi karibuni ilimsafisha Bw. Chenge ambaye pia ni mbunge mteule wa Bariadi Magharibi ikisema kuwa uchunguzi uliofanywa na wao pamoja na Taasisi ya Makosa Makubwa ya Jinai ya Uingereza (SFO), umegundua kuwa mwanasheria mkuu huyo wa serikali ya awamu ya tatu, hakuhusika.

Lakini Ubalozi wa Uingereza jijini Dar es Salaam ulikata mzizi wa fitna na kusema, "Serikali ya Uingereza inatambua taarifa ya TAKUKURU iliyotolewa Novemba 8, mwaka huu juu ya kesi inayohusu kampuni ya BAe (British Aerospace Systems) ya suala la rada. Suala hilo bado halijafikiwa uamuzi mahakamani, hivyo haiwezekani kutoa uamuzi wa aina yoyote kwa wale wote waliohojiwa wakihusishwa na tuhuma hizo," ilisema sehemu ya taarifa hiyo ya Serikali ya Uingereza

Taarifa hiyo iliongeza kuwa, Februari 5 mwaka huu, SFO  ilitoa taarifa ya kufikia makubaliano na kampuni ya BAE, baada ya uchunguzi katika mkataba na serikali ya Tanzana.

Ilisema katika makubaliano hayo, kampuni ya BAe ilikiri kufanya makosa katika taarifa sahihi za hesabu zake hapa nchini, na iko tayari kukiri kosa hilo na kulipa kiasi cha paundi ya Uingereza milioni 30 (sh bilioni 72) kama adhabu na fidia kwa Tanzania.

"Makubaliano hayo, baina ya SFO na BA yalihitimisha shughuli za uchunguzi zilizokuwa zinafanywa na taasisi ya SFO. Hata hivyo, kwa kuwa makubaliano hayo hayajathibitishwa na mahakama si sahihi kwa sasa kusema kuwa uamuzi huo umepitishwa," ilisema taarifa hiyo.

Taarifa hiyo iliongeza kuwa usikilizwaji wa kesi hiyo utaanza Novemba 23 mwaka huu ambapo uamuzi wa kuthibitisha makubaliano hayo utatolewa.

Hivi karibuni, Bw. Chenge akizungumza na waandishi wa habari Dar es Salaam, kuhusu hatua yake ya kuwania uspika wa bunge, kupitia CCM, alisema kuwa hahusiki na tuhuma za rushwa katika ununuzi wa rada unaohusishwa na umiliki wa akaunti nje ya nchi yenye kiasi cha sh. bilioni 1, akisema kuwa kwa ufahamu wake jalada hilo lilishafungwa ndani na nje ya nchi.

Badala yake Bw. Chenge alisema akaunti hiyo ni ya asasi isiyo ya kiserikali inayohusika na misaada kwa watoto yatima na kujigamba kuwa taasisi za uchunguzi zikiwamo TAKUKURU na SFO, zilibaini kwamba haina harufu ya rushwa kama ambavyo amekuwa akituhumiwa kwa muda mrefu sasa, hata kupekelea kujiuzuru uwaziri wa miundombinu mwaka jana.

Lakini hata hivyo Bw. Chenge aligoma kutaja jina la asasi hyo wala uongozi wake, zaidi ya kusema kuwa wadhamini wa taasisi hiyo ni yeye na mkewe, aliyemtaja kwa jina la Tina Chenge.