Chenge amvaa Spika Sitta.

*Adai amejenga bunge la chuki, husuda, uzushi, kutoaminiana
*Adai aliliongoza bunge kwa nia ya kujitafutia umaarufu
*Asema bunge lililopita lilijaa majeruhi, yeye anakwenda kutibu
*Sitta asema hana cha kusema, wananchi wanajua ukweli wataamua

Na Tumaini Makene
MBUNGE mteule wa Jimbo la Bariadi Magharibi kwa tiketi ya Chama Cha Mapinduzi (CCM), Bw. Andrew Chenge amemshambulia
spika wa zamani Samuel Sitta, akiweka wazi sababu zake za kuwania kiti cha uspika, ikiwamo wa kwenda kuondoa husuda, chuki, hasira, uzushi na kutibu majeraha na kutoaminiana miongoni mwa jamii, alivyodai vilivyojitokeza katika bunge lililopita.

"Ninawania kiti cha uspika nikiamini kwamba nina uwezo wa kutibu majeraha makubwa yaliyoliumiza bunge na taifa, wananchi na chama changu kwa sababu tu ya kuwa na kiongozi aliye tayari kujitafutia na kujitwalia umaarufu au ushujaa wake binafsi kwa njia ya kuwahujumu, kuwaumiza na kuwachafua wengine kwa kutengeneza tuhuma za kashfa za kila namna...tiba ya uongozi wa aina hii ni kuchagua kiongozi bora wa bunge...kiongozi mbadala mwenye uwezo na nia njema.

"Ni hatari kuendelea kuliacha bunge likiongozwa na mtu ambaye ubora wake unapimwa kwa umahiri wake wa kuwapaka matope wengine, kuwazushia wengine huku yeye akijitwalia ushujaa ambao gharama zake ni chuki, husuda na kutoaminiana, matokeo yake wananchi ambao siku zote wamekuwa na imani kubwa na viongozi wao, wamelishwa sumu mbaya, hilo limechochea chuki, hasira na kutoaminiana miongoni mwa jamii," alisema Bw. Chenge na kuongeza.

"Mimi kama walivyo wengi wengine, ni miongoni mwa majeruhi wa aina hiyo. Kama bunge, hatuna budi kukabiliana nalo kwa nguvu kubwa...bunge letu limekuwa na changamoto kubwa ya uongozi katika kipindi cha miaka mitano iliyopita, viongozi ambao wajibu wetu wa msingi ni kuonesha njia, badala yake tumekuwa vinara wa uzushi, uongo, fitina na majungu.

Bw. Chenge ambaye kwa muda mrefu amekuwa katikati ya shutuma kali, akituhumiwa katika kashfa kadhaa za ufisadi, amesema kuwa anaamini kuwa kutokana na uzoefu alionao katika utumishi wa muda mrefu serikalini na ndani ya CCM, ana uwezo wa kutibu majeraha makubwa, aliyodai yaliliumiza bunge, taifa, wananchi na chama chake, kwa miaka mitano iliyopita.

Akizungumza na waandishi wa habari jana Dar es Salaam juu ya nia yake ya kuwania uspika, Bw. Chenge alisema kuwa moja ya sababu iliyomfanya agombee ni kuwa anazo sifa na uzoefu wa kuongoza, akisema kuwa atakuwa daraja imara la kuunganisha shughuli za bunge na serikali, kusaidia chombo hicho kuisimamia serikali, wala si kutoa maagizo.

Akilazimika kujibu maswali mengi kutoka kwa waandishi wa habari walioonesha shauku ya kumtaka aeleze kwa kina tafsiri ya maneno yake hayo ya 'chuki, husuda, hisia, kutoaminiana, kutibu majeraha' iwapo hayatokani na hisia zake, pia yakionesha kuwa anawania nafasi hiyo kwa nia ya kulipiza kisasi akiwakilisha kundi la wabunge watuhumiwa wa ufisadi, Bw. Chenge alitumia nafasi hiyo kukanusha tuhuma za ufisadi ambazo zimekuwa zikielekezwa kwake kwa muda mrefu sasa.

"Nimeomba kukutana na ninyi baada ya kuendelea kusumbuliwa na baadhi yenu mkiniuliza nia yangu ya kuamua kuchukua fomu ya kugombea kiti cha uspika...madhumuni ya kugombea uspika ni kuwa kwa mujibu wa katiba ya nchi, kiti hicho kiko wazi mara rais anapoitisha mkutano wa kwanza wa bunge jipya...lakini pia sifa za kugombea nafasi hiyo ninazo...pia uzoefu wa kuongoza bunge ninao kwa sababu nimeshikilia nafasi mbalimbali serikalini na ndani ya bunge kwa muda mrefu.

Huku akiziita jina la 'makandokando' tuhuma za ufisadi ambazo amekuwa akituhumiwa kwazo, Bw. Chenge alizungumzia suala la kashfa ya kumiliki akaunti ya bilioni 1 nje ya nchi, ambayo ndiyo ilimsababisha akajiuzulu uwaziri mwaka jana baada ya kuziita kuwa ni vijisenti, alisema kuwa fedha hizo ni mali ya mfuko wa kusaidia watoto yatima, ambao hata hivyo hakuutaja jina wala uongozi unaousimamia, ingawa alisema wadhamini wake ni yeye na mke wake, Tina Chenge.

"Kumekuwepo na makandokando yaani maneno au hisia dhidi yangu kuwa nimelisababishia taifa hasara kubwa kupitia mikataba mibovu, hasa kwenye sekta ya madini, ubinafsishaji wa mashirika ya umma, IPTL na kadhalika...kuwa nachunguzwa na makachero wa SFO (Taasisi ya Kuchunguza Ufisadi ya Uingereza), kuhusiana na ununuzi wa rada...jameni napenda kuwaambia kuwa kuhusu mikataba mikubwa...mkataba wowote una aspect (nyanja) mbalimbali kwa kutegemea na subject matter (suala husika) yenyewe.

"Inaweza kuwa commercial (biashara), financial (masuala ya fedha), technical and legal (na kisheria), role (jukumu) ya mwanasheria mkuu ni kuhakikisha mikataba hiyo inakidhi sheria na kanuni za nchi basi. Si masuala ya nchi inapata kiasi gani au fedha kiasi gani, lakini pia mjue waziri mwenye dhamana husika hawezi kutia sahihi mkataba bila ruksa ya rais kwa kuufikisha katika Baraza la Mawaziri na kuidhinishwa...kuhusu suala la rada, kwa ufahamu wangu mimi, SFO walishamaliza uchunguzi na kufunga jalada lao. Hapa nyumbani TAKUKURU na DPP (mkurugenzi wa mashtaka) walishafanya uchunguzi na kufunga majalada yao."

Akijivunia rekodi yake ya kuwa Naibu Mwanasheria Mkuu wa Serikali (1991-1993), Mwanasheria Mkuu wa Serikali (AG, 1993-2005), na uzoefu wa kuwa mbunge kwa miaka takribani 20, huku akiwa ameshikilia pia nafasi za uwaziri katika serikali ya Rais Jakaya Kikwete, kabla hajalazimika kujiuzulu kutokana na msukumo wa vyombo vya habari, Bw. Chenge alisema kuwa bunge atakalolisimia iwapo atachaguliwa, litazingatia dhana ya wengi wape, akisisitiza nidhamu na utii kwa chama.

Aliongeza kuwa atasimamia kwa mujibu wa utawala wa mfumo wa demokrasia ya kibunge, akisema kuna pande mbili za bunge, upande wa serikali na wabunge wa chama tawala na upande wa wabunge wa upinzani, huku wale wa chama tawala wakikosoa serikali kwa kuzingatia kauni zilizowekwa na wabunge wa chama hicho, hivyo wanapaswa kujitofautisha na wale wa upinzani ambao wanaikosoa kwa nia ya kuidhoofisha ikiwezekana kuiondoa. Alikataa dhana ya wabunge wote bila kujali vyama kuungana kuwa kitu kimoja, dhidi ya serikali.

Akizungumzia madai hao jana, Spika Sitta alisema, "sina la kusema, nawaachia wananchi, maana ndio wanaoujua mambo haya, wanaujua ukweli, wanatujua sote wawili na ushindi wangu uko mikononi mwa wabunge. Utasema nini juu ya mtu anayeamua kukutuhumu mambo mengi namna hiyo."