MASHABIKI WA SIMBA,YANGA KUVAANA JUMAPILI

 Na Mwandishi Wetu

  Mashabiki wa Simba na Yanga kwenye miji ya Tunduma na Morogoro nao, wanatarajia kupata fursa ya kuburudika katika michezo mbalimbali kupitia bonanza maalumu la Nani Mtani Jembe, lililoandaliwa na Kilimanjaro Premium Lager litakalofanyika Uwanja wa Mwaka mjini Tunduma na Kiwanja cha Ndege mjini Morogoro keshokutwa.

Mratibu wa mabonanza hayo, Lawrence Andrew alisema Dar es Salaam jana kuwa michezo mbalimbali ikiwemo soka la wachezaji saba kila upande, kuvuta kamba na pia mpira wa mezani maarufu kama fussball itapamba mabonanza hayo.

"Burudani mbalimbali pia zitapamba bonanza litakalofanyika Tunduma, ikiwemo muziki kutoka bendi ya High Class pamoja na wasanii mbalimbali wa muziki wa kizazi kipya wa mkoani Mbeya.

Alisema kwa Mkoa wa Morogoro bendi ya mkoani humo ya Beacon Sound, itatoa burudani kwa mashabiki watakaojumuika kushiriki bonanza hilo, huku wasanii wa kundi la dansi GYT wakilishambulia jukwaa.

  Mratibu huyo alisema pia kutakuwa na michezo mbalimbali ya kujifurahisha kama kufukuza kuku wa kienyeji, kukimbia na gunia na mtu kupiga penalti akiwa amefungwa kitambaa usoni.

  Alisema mabonanza hayo yanayotarajiwa kuanza saa 3 asubuhi ni mwendelezo wa kampeni ya Nani Mtani Jembe ambayo ilizinduliwa Oktoba 2, mwaka huu na inafanyika nchi nzima ikiwashirikisha mashabiki wa timu za Simba na Yanga.

  Andrew alisema kupitia kampeni hiyo, Kilimanjaro Premium Lager inayozidhamini Simba na Yanga imetenga sh. milioni 100 na kisha kuzigawa kwa timu hizo, ambapo kila moja inazo sh. milioni 50 ambazo zinashindaniwa na mashabiki wao.

  Naye Meneja wa Bia ya Kilimanjaro, George Kavishe alisema mashabiki wa Simba na Yanga wanatakiwa kushindana kwa kushiriki kwenye kampeni hiyo, ili kuhakikisha kuwa timu mojawapo inapata fedha nyingi zaidi ya timu nyingine.

  Kwa mujibu wa Kavishe matokeo ya uwiano wa fedha zinavyopungua kutoka Simba au Yanga, yatatangazwa kila siku hadi siku ya mwisho wa mashindano hayo Desemba 14, mwaka huu.