Umeme waiangusha CCM Bumbuli

Na Yusuph Mussa, Lushoto

UMEME kupita juu ya Kijiji cha Wanga kilichopo Kata ya Mgwashi wilayani Lushoto na wao kushindwa kuwekewa trasfoma ili wapate huduma hiyo kumekigharimu Chama Cha Mapinduzi (CCM) kwa wananchi kuamua kumchagua Mwenyekiti wa Serikali ya Kijiji hicho kupitia CHADEMA.

Wakizungumza juzi kwenye mkutano wa hadhara ulioandaliwa na Naibu Waziri wa Mawasiliano, Sayansi na Teknolojia na Mbunge wa Bumbuli, January Makamba wananchi walisema kupitisha nyaya za

umeme juu na kuwapelekea wanakijiji wenzao wa Mgwashi ni kuonesha Serikali ya CCM haiwajali.

"Umeme kupita juu kwa juu kwenda Kijiji cha Mgwashi na kutuacha sisi, tumeona Serikali haitujali. Lakini pia tunachangishwa michango mara mbili mbili, kwani tulikamilisha boma (darasa) la Shule ya Sekondari Handeni.

"Awali tulijenga likakamilika kwa kutoa kila mtu sh. 5,000, lakini kwa vile lilijengwa chini ya kiwango ikabidi tuchangishwe tena sh. 3,000. Wananchi wananyanyaswa kwa kuambulwa (kushikwa faini) kuku ili kujenga tena boma hilo," alisema Athuman Amir.

Makamba aliwataka wananchi wawe na subira kwani ipo mikakati ya kufikisha umeme kwenye kata kadhaa kwenye Halmashauri ya Bumbuli ikiwemo eneo hilo.

Pia alisema kwa kupata halmashauri wataweza kuipandisha barabara ya Mbelei- Mgwashi- Milingano- Mashewa kuwa chini ya Wakala wa Barabara (TANROADS).