Nyama yenye sumu yaua 2

Na Masau Bwire, Kibaha

 WATU wawili wakazi wa Kijiji cha Nyeziguni, Kata ya Magindu, Tarafa ya Kibaha, Wilaya ya Kibaha, mkoani Pwani, wamefariki dunia na wengine saba kulazwa katika Kituo cha Afya Chalinze, baada ya kula nyama ya mbuzi iliyokuwa imechanganywa na dawa ya mitishamba.

Tukio hilo la aina yake limetokea juzi baada ya watu hao kuchinja mbuzi na nyama yake kupikia supu waliyokuwa wameichanganya na dawa ya mitishamba inayohisiwa kuwa ni sumu ambayo imesababisha vifo hivyo.

Waliokufa katika tukio hilo ni Kitandu Madeni (31) na Chiti Ningwa (30), waliolazwa ni

Kilendu Kobero, Balosina Tembo, Renalwa Kobero, Sokoi Sikanyi, Samso Nganyigwa, Ole Kajikali na Yuas Juakali, ambao hali zao ni mbaya.

Taarifa zilizopatikana eneo la tukio ambazo zimethibitishwa na Kamanda wa Polisi mkoani Pwani, Urlich Matei, zilisema watu hao walikula nyama hiyo saa mbili asubuhi.

Ilidaiwa kuwa, jamii ya kimasai inaamini nyama ya mbuzi ikichanganywa na mitishamba inawapa nguvu, kusisimua mwili na kuondoa maradhi mbalimbali mwilini.

Hali hiyo ndio iliyowafanya watu hao kufanya kitendo hicho ili wapate nguvu na kuondoa maradhi mwilini ambapo baada ya kula supu hiyo, marehemu hao walikwenda kuchunga mifugo yao asubuhi na kurejea nyumbani jioni.

Ilipofika saa mbili usiku, Madeni alielekea katika eneo ambalo huoneshwa Ligi ya Uingereza katika televisheni ambapo akiwa njiani, alianza kuharisha, kutokwa na jasho mwilini hivyo alilazimika kurudi nyumbani haraka.

Alipofika nyumbani aliingia ndani na kulala ambapo ilipofika saa nne usiku alifariki dunia na muda mfupi baadaye, Ningwa alianza kuharisha, kutokwa jasho na kufariki.

Watu wengine saba ambao nao walikula supu hiyo walianza kuharisha, kutokwa jasho lakini walikimbizwa Kituo cha Afya Chalinze kwa matibabu zaidi.

Kamanda Matei alisikitishwa na kitendo cha miili ya marehemu hao kuzikwa haraka kabla ya uchunguzi wa kidaktari ili kubaini sababu ya vifo vyao.

Alikemea tabia ya baadhi ya watu kutumia mizizi na majani ya porini bila kuthibitishwa na wataalamu hivyo aliwataka waache tabia hiyo mara moja kwani ni hatari kwa maisha yao.