DCI Manumba atoa somo kwa makachero

Na Frank Geofray, Jeshi la Polisi

 WAKURUGENZI wa Upelelezi wa Makosa ya Jinai kutoka nchi 25 barani Afrika, wametakiwa kutumia vizuri mafunzo ya operesheni za pamoja ili kukabiliana na uhalifu.

Uhalifu huo ni pamoja na vitendo vya ugaidi na uhamiaji haramu ambavyo vinajitokeza kwa kasi katika nchi za Afrika Mashariki na Kusini mwa Afrika.

 Mkurugenzi wa Upelelezi wa Makosa ya Jinai nchini, DCI Robert Manumba, aliyasema hayo jana wakati akizungumza na waandishi wa habari baada ya kufungua Mafunzo ya

Wakurugenzi wa Upelelezi wa Makosa ya Jinai.

Washiriki wa mafunzo hayo ni kutoka Umoja wa Wakuu wa Polisi Kusini mwa Afrika (SARPCCO) na Umoja wa Wakuu wa Polisi Afrika Mashariki (EAPCCO).

Lengo la mafunzo hayo ni kufanya operesheni za pamoja ili kukabiliana na uhalifu unaovuka mipaka.

DCI Manumba alisema, uhalifu unaofanyika nchini na ukanda wa Afrika Mashariki ndio huo huo unaotokea katika nchi nyingine hivyo kunahitajika ushirikiano na kubadilishana taarifa ambazo zitasaidia kutambua na kuweka mikakati thabiti ya kudumisha amani na usalama barani Afrika.

“Kwa mfano, suala la wahamiaji haramu hatuwezi kupambana nalo sisi wenyewe...wahamiaji hawa wanatoka nchi nyingine na hapa wanapita tu kwenda katika nchi tofauti hivyo lazima tubadilishane taarifa, kuwa na mkakati wa pamoja ili kuwabaini wanaofanya vitendo hivi,” alisema.

Kwa upande wake, Mkuu wa Polisi wa Kimataifa (Interpol), Kanda ya Afrika Mashariki kutoka nchini Kenya, Bw. Rego Francis, alisema Jeshi la Polisi katika nchi husika zina wajibu wa kutoa elimu ya kutosha kwa wananchi.

Alisema elimu hiyo itawawezesha kutoa taarifa za uhalifu kwa vyombo vya usalama mapema ili ziweze kufanyiwa kazi haraka kabla matukio hayajatokea.

Mkuu wa Kitengo cha Interpol nchini, Kamishna Msaidizi wa Polisi Gustavus Babile, alisema lengo la mafunzo hayo ya siku mbili ni kubadilishana uzoefu, kupeana mbinu, kuweka mikakati ya kufanya operesheni zitakazoweza kuutokomeza uhalifu.

Alisema kupitia mafunzo hayo wataweza kuandaa operesheni zenye mafanikio ambazo zitaweza kushirikisha nchi nyingi ili kukabiliana na ugaidi, dawa za kulevya, wahamiaji haramu, wizi wa magari na uhalifu wa aina nyingine unaotokea barani Afrika.

Mafunzo hayo yanafanyika baada ya kumalizika mkutano wa 18 wa Wakuu wa Polisi Kusini mwa Afrika (SARPCCO), ambao waliazimia kufanya operesheni za pamoja.