CUF waunga mkono Jukwaa la Katiba nchini

Goodluck Hongo na Mariam
Mziwanda

 CHAMA cha Wananchi (CUF), kimeunga mkono uamuzi wa Jukwaa la Katiba nchini kutaka kuifikisha mahakamani Tume ya Mabadiliko ya Katiba.

Mwenyekiti wa chama hicho, Profesa Ibrahim Lipumba, aliyasema hayo Dar es Salaam jana wakati akizungumza na waandishi wa habari.

Alisema chama hicho kinasubiri rasimu ya Katiba ili waweze kutoa msimamo wao juu ya mchakato huo.

Aliongeza kuwa, Jukwaa la Katiba lipo huru kuifikisha tume hiyo

mahakamani kutokana na sababu zao lakini CUF inasubiri rasimu hiyo, kuipitia na kutoa msimamo wao.

Aliongeza kuwa, chama hicho kinaungana na Watanzania wengi wanaoonesha shaka juu ya mchakato huo kwani katiba ambayo haitakuwa na misingi imara ya kidemokrasia na isiyotokana na maoni ya Watanzania, lazima ikataliwe.

“Kama itatokea hivyo, CUF tutawahamasisha Watanzania nchi nzima kuikataa katiba isiyotokana na maoni yao, hata sisi tulichakachuliwa wakati mgombea wetu akiwa ameongoza wagombea wengine saba,” alisema.

Alisema Baraza Kuu la CUF linaitaka tume hiyo kuweka utaratibu wa kuyafikia makundi yote yenye mahitaji maalumu wakiwemo walemavu na wanawake.

Akizungumzia maazimio ya baraza hilo ambalo lilikutana kwa siku mbili, alisema lilijadili mambo mbalimbali ukiwemo uchaguzi mdogo Jimbo la Chambani- Pemba.

“Baraza limekubaliana kwa kauli moja kumteua Bw. Yusuf Salum Hussein kuwa mgombea wetu katika uchaguzi uliopangwa kufanyika Juni 16, mwaka huu, awali walijitokeza watu 12 kuwania nafasi hii ili wateuliwe na baraza kugombea,” alisema.

Wakati huo huo, Kamati Maalumu ya Katiba Mpya ya Kituo cha Sheria na Haki za Binadamu, imeitakaSerikali kuwa sikivu na kufanyia marekebisho kasoro zilizopo katika Sheria ya Mabadiliko ya Katiba kuhusu Bunge la Katiba.

Kufanyika kwa marekebisho hayo, kutaiwezesha nchi kupata Katiba Mpya ambayo itakidhi matakwa ya Watanzania.

Mwenyekiti wa kamati hiyo, Dkt. Khoti Kamanga, aliyasema hayo Dar es Salaam jana wakati akizungumza na waandishi wa habari na kuongeza kuwa, kama kasoro hizo zitarekebishwa, Katiba Mpya yenye masilahi ya wananchi itapatikana.

Alisema kamati hiyo imebaini uundwaji wa Bunge la Katiba lenye wajumbe 166 sawa na theluthi moja ambalo halizingatii masilahi ya nchi na watu wake kwa kuwa na Bunge la asilimia 72 ya wabunge kutoka Bara na Zanzibar.

Aliongeza kuwa, kutokana na hali hiyo mfumo uliopo unaondoa dhamira ya kupata katiba bora ambapo mfumo uliopo wa uundwaji Bunge hilo unawaondolea haki ya kushiriki walio nje ya mfumo wa vyama vya siasa na ambao si wabunge.

“Kama marekebisho yatafanyika, tutapata Katiba Mpya waitakayo wananchi ambao watakuwa walinzi ambapo watawala au viongozi waliochaguliwa na kuteuliwa kwa mujibu wa katiba, watakuwa wanyenyekevu wa kutosha kwa wananchi.

Dkt. Kamanga alisema, uundaji wa Bunge hilo unaweza kufanyika kwa kufanya uchaguzi wa kidemokrasia na kupata wajumbe ambao watachujwa na vyombo vingine au kutumia makundi ya kijamii yanayowakilisha masilahi ya aina zote ili kupata mwafaka wa kitaifa.

Kamati hiyo imeshauri Bunge la Jamhuri na Baraza la Wawakilishi kutoa wajumbe wasiozidi theluthi moja na theluthi mbili zilizobaki kuwaachia wananchi walio nje ya mfumo wa vyama vya siasa kwa utaratibu utakaoruhusu uchaguzi miongoni mwa makundi ya kiraia.

Aliwaomba wananchi kuunga mkono mapendekezo hayo ili kutoa kipaumbele kwa Serikali kuwapatia raia wake haki ya kuandaa katiba waitakayo.