Nape afichua siri za CHADEMA *Akanusha tuhuma dhidi ya CCM, Mwakyembe *Adai chama hicho sasa kinatumiwa na mafisadi

Na Gladness Mboma

CHAMA Cha Mapinduzi (CCM), kimesema tuhuma zinazotolewa na Chama cha Demokrasia na Maendeleo (CHADEMA), dhidi ya chama tawala ni matokeo ya chama hicho kulishwa uongo na
mafisadi wanaotaka kushika dola kwa gharama yoyote.

Alisema madai ya CHADEMA kuwa Kampuni ya Chama cha Jitegemee Trading Company, inayomilikiwa na CCM kuingia mkataba na Mamlaka ya Bandari nchini (TPA), kwenye mradi wa umanuzi wa bandari kavu kwenye eneo la SUKITA,
hazina ukweli wowote.

Katibu wa Halmashauri Kuu ya Taifa (NEC), Itikadi na Uenezi,
Bw. Nape Nnauye, aliyasema hayo Dar es Salaam jana wakati akizungumza na waandishi wa habari juu ya madai hayo.

Alisema eneo la SUKITA ni mali ya CCM lakini PTA na Jitemegee, hawajaingia mkataba wowote kama inavyodaiwa na CHADEMA kupitia gazeti moja linalotoka kila siku (si Majira), kuwa kampuni hiyo imepewa zabuni ya kupanua bandari kavu.

Bw. Nape alisema, gazeti hilo limemnukuu Mkurugenzi wa Oganaizesheni na Mafunzo wa CHADEMA, Bw. Benson Kigaila, ambaye aliishutumu Wizara ya Uchukuzi na Waziri wake Dkt. Harrison Mwakyembe, akidai kiongozi huyo amekiuka taratibu
na kutoa zabuni ya upanuzi wa Bandari ya Dar es Salaam kwa
CCM kinyume na taratibu za manunuzi.

“Eneo la SUKITA limeombwa na wawekezaji wengi wakiwemo TPA, masharti waliyopewa waombaji wote ni kuleta mapendekezo ya mipango yao ya kibiashara kabla ya kufikia uamuzi wa nani anayewekeza kwa ubia na Jitegemee katika eneo hilo.

Alisema CHADEMA wanapitia wakati mgumu kisiasa kwa kuanza kuvuna walichopanda muda mrefu katika siasa za nchi, kukosa uwezo wa kufikiri na kushindwa kutofautisha barua ya maombi
ya ushirikiano ili kuendeleza eneo la SUKITA na mkataba.

“Wanacholalamikia CHADEMA ni barua ya TPA kwenda Jitegemee wakiomba ridhaa ya kushirikiana ili kuliendeleza eneo la kampuni lenye ukubwa wa zaidi ya ekta 100 katika mfumo wa ushirikiano ambao ni wa kawaida kwani unafuata taratibu na sheria zote.

“Jitegemee imekuwa ikitekeleza shughuli za uwekezaji muda
mrefu kwa kufuata taratibu zote za sheria na nchi kwa ujumla,
CCM inatambua tabia ya viongozi wa CHADEMA kudandia
kila gari linalopita bila kujua linakokwenda kwa kugeuza kila kinachofanyika nchini ili mradi hakifanywi na wao,” alisema.

Aliongeza kuwa, CHADEMA kina uwezo mkubwa wa kutunga
uongo na kupanga machafuko na ndio sababu ya Watanzania kuwakataa kila kukicha na chama hicho kufa kwani njia ya
muongo ni fupi.

“Tunazo taarifa kuwa uongo huu wamelishwa na baadhi ya mafisadi waliotaka kutumia eneo hili la CCM kujaribu kukaa katikati ya mwekezaji yeyote ambaye atajitokeza na Jitegemee ili waweze
kujinufaisha kwa masilahi binafsi.

“Huu ni mwendelezo wa CHADEMA kutumiwa na mafisadi katika mambo yao, Watanzania tuwapuuze na kuwaepuka, umbumbumbu wa iina hii unatia mashaka juu ya uwezo wao wa kufikiri na kupambanua mambo,” alisema Bw. Nnauye.

Alisema CCM inatambua na kumpongeza Dkt. Mwakyembe na Wizara yake kwa kazi nzuri ya kuongeza ufanisi katika Bandari ya Dar es Salaam hivyo wasikatishwe tamaa na mafisadi wachache.