4 wafariki katika matukio tofauti Dar

Na Zubeda Mazunde

WATU wanne wamefariki dunia katika matukio tofauti jijini Dar es Salaam, likiwemo la mkazi wa Mbagala Charambe, Abdallah Salum (18), kujinyonga kwa kutumia kamba ya manila.

Akizungumza na Majira Dar es Salaam jana, Kamanda wa Mkoa wa Kipolisi Temeke, Engelbert Kiondo, alisema tukio hilo lilitokea juzi saa 10:30 ahsubuhi eneo la Charambe Mianzini.

Alisema marehemu alikutwa chumbani kwake akiwa amejinyonga kwa kutumia kamba ya manila aliyokuwa ameitundika kwenye kenchi na kuacha ujumbe unaosema “ugonjwa wa UKIMWI umenisumbua sana”.

Aliongeza kuwa, mwili wa marehemu umehifadhiwa katika  hospitali ya Temeke kwa uchunguzi.

Wakati huo huo Kamanda Kiondo alisema, mkazi wa Mtongani Relini aliyefahamika kwa jina la Bibi Rose (80), amefariki dunia
baada ya kuangukiwa na ukuta wa nyumba.

Tukio hilo limetokea juzi saa 11:35 jioni eneo ya Mtongani Relini, ambapo marehemu alikuwa na shangazi yake Bi. Grace Petro (52) ambao waliangukiwa na ukuta wa nyumba jirani na kusababisha
kifo cha Bibi Rose papo hapo.

Kamanda Kiondo alisema, katika tukio hilo Bi. Petro aliyejeruhiwa na amelazwa Hospitali ya Temeke kwa matibabu zaidi na mwili
wa marehemu umehifadhiwa hospitlini hapo.

Katika tukio la tatu, mkazi wa Magomeni Makuti, Endrew Charles anayekadiriwa kuwa na miaka (25-30), amekutwa ndani ya gari akiwa amefariki dunia.

Kamanda wa Mkoa wa Kipolisi Kinondoni, Charles Kenyela alisema tukio hilo lilitokea juzi saa tisa jioni ambapo marehemu alikutwa ndani ya gari aina ya BMW yenye namba ya usajili T 585 AFP, ambapo chanzo cha kifo chake hakijafahamika.

Alisema mwili wa marehemu umehifadhiwa katika Hospitali ya Taifa Muhimbili kwa uchunguzi zaidi.

Kamanda Kenyela alisema katika tukio jingine, mkazi wa
Boko CCM, Humfrey Stanley (35), amefariki dunia baada
ya kujinyonga kwa kutumia mkanda wa begi.

Alisema tukio hilo lilitokea jana saa moja asubuhi eneo la Boko ambapo marehemu alikutwa chumbani kwake akiwa amejinyonga kwa kamba ya begi aliyoitundika kwenye kenchi na mwili wake umehifadhiwa Hospitali ya Mwananyamala.