Wanamichezo watatu waula CCM

Na Omari Mngindo, Bagamoyo

WANAMICHEZO watatu wilayani Bagamoyo Mkoa wa Pwani, wamefanikiwa
kuchaguliwa kushika nafasi mbalimbali za uongozi ndani ya Chama Cha
Mapinduzi (CCM) wilayani hapa.


Wanamichezo hao ni  John Bolizozo Katibu anayemaliza muda wake wa uongozi
ndani ya Chama Cha Mpira wa Miguu wilayani hapa (BFA),  Mousin Bharwan
mlezi wa timu zinazotoka ndani ya kijiji cha Vigwaza na Yussuf Kikwete
mdau wa michezo Bagamoyo mjini.

Katika uchaguzi huo uliofanyika kwenye Ukumbi wa Chuo Cha Sanaa na
kusimamiwa na Mbunge wa Jimbo la Kibiti Abdul Marombwa, pia
ulishuhudiwa na Mbunge wa Jimbo la Bagamoyo Dkt. Shukuru Kawambwa na
Katibu wa (CCM), Joyce Massi ambapo Bolizozo ameshinda nafasi ya Uenezi
akiwaacha wapinzani wake Emmanuel Panduka na Kassim Gogo.

Bharwan ameibuka kidedea nafasi ya Mkutano Mkuu Taifa ambaye ameshinda
nafasi hiyo kwa kujinyakulia kura 753 na kuwaongoza wenzake wanne
ambao ni Shumina Sharif, Yussuf Kikwete, Aeshi Khatibu na Issa Kibwana
nao wamechaguliwa nafasi hiyo iliwaniwa na wagombea 15.

Wakizungumza baada ya matokeo hayo, Bharwan alianza kwa kuwashukuru
wajumbe wa Mkutano huo kwa kuweza kumchagua na kwamba atatumia nafasi
hiyo kuhamasisha michezo ikiwa ni kutekeleza ilani ya chama hicho.

“Katika Ilani ya chama chetu inagusia michezo, nitatumia nafasi hii
kuhamasisha michezo mbalimbali ndani ya wilaya yetu kwa kuwapatia
vijana fursa ya kimichezo kwani utakumbuka kuwa michezo kwa sasa ina
nafasi kubwa ya ajira,” alisema Bharwan.

Naye Bolizozo alisema baada ya mafanikio makubwa yaliyopatikana ndani
ya BFA akiwa Katibu atageuzia makali hayo katika nafasi ya Uenezi ili
kuhakikisha vijana wanapata nafasi nzuri ya kushiriki michezo sanjali
na kuhamasisha kujiunga na chama hicho.

“Nitatumia nafasi hii kuchagiza uendelezwaji wa michezo ndani ya
Wilaya ikiwa ni kuunga mkono ilani ya CCM inayotaka kuendelezwa kwa
michezo kwa wananchi bila kubagua itikadi za kisiasa,” alisema
Bolizozo.