Kenyela mgeni rasmi pambano la Mashali

Na Mwandishi Wetu

KAMANDA wa Polisi mkoa wa kipolisi wa Kinondoni, Charles Kenyela anatarajiwa kuwa mgeni rasmi katika pambano la kuwania Ubingwa wa Afrika Mashariki na kati ya  Thomas Mashali wa Tanzania na Medi sebyala wa Uganda litakalopigwa Oktoba 14, mwaka huu Friends Corner Manzese, Dar es Salaam.

Akizungumza na Waandishi wa habari Dar es Salaam jana, Mratibu wa pambano hilo, Regina Gwae linalosimamiwa na Oganaizesheni ya Ngumi za kulipwa Tanzania (TPBO) alisema  mbali Kenyela kutakuwa na wageni wengine maalum akiwemo Mbunge wa Kinondoni, Iddi Azan.

Alisema wanashukuru kwa ushirikiano wa viongozi hao katika maandalizi na hatimaye wamethibitisha ushiriki wao katika pambano hilo ambalo linavuta hisia za watu wengi na wapenzi wa ngumi jijini.

Alisema mapambano manne ya utangulizi ni Abdul Awilo atapambana na Shedrack Juma, Selemani Shaaban atapambana na Hamisi Mohamed,  Jonas Segu atapambana na Ibrahim Class wakati Charles mashali atapambana na Teacher Aron.

Regina alisema Sebyala wa Uganda na mwalimu wake wanatarajiwa kuwasili nchini Oktoba 11 na maandalizi ya safari yao yamekamilika ikiwemo kuwatumia tiketi na tayari wameshazipokea.