'Wabunge wa Yanga' wakabidhiwa Kombe la Kagame

Na Amina Athumani

WACHEZAJI wa Klabu ya Yanga pamoja na viongozi wao wameondoka jijini Dar es Salaam jana mchana, kwenda mjini Dodoma kwa ajili ya kukutana na wabunge wa Bunge la Jamhuri ya Muungano wa Tanzania.

Wachezaji hao watakutana na wabunge leo ambapo watawakabidhi kombe hilo ambalo wamelitwaa kwa mara ya pili mfululizo.

Akizungumza Dar es Salaam jana, Katibu Mkuu wa Yanga,Selestine Mwesigwa alisema pamoja na kupatiwa pongezi na wabunge hao pia Yanga itawafanyia sherehe wachezaji hao ambapo itafanyika mara baada ya kumalizika kwa mfungo wa mwezi mtukufu wa Ramadhani.

Alisema wametwaa ubingwa huo katika fainali za Kombe la Kagame iliyowakutanisha dhidi ya Azam FC katika mchezo uliofanyika Uwanja wa Taifa, Dar es Salaam na kuibuka na ushindi wa mabao 2-0.

Wakati huohuo, Klabu ya Yanga imesema imeunga mkono tamko la Shirikisho la Mpira wa Miguu Tanzania (TFF) juu ya kuwepo kwa chombo huru cha kuendeshea Ligi Kuu ya soka Tanzania Bara.