Mrema: Posho zitatugombanisha na wananchi

*Amshangaa Rais Kikwete kumnyima nishani

 Na Gift Mongi, Moshi

CHAMA cha Tanzania Labour Party (TLP), kimesema nyongeza ya posho za wabunge kutoka sh. 70,000 hadi sh.200,000, haiendani na hali halisi ya uchumi wa Mtanzania hivyo kama zitatolewa,
zitamchonganisha mbunge na wananchi waliomchagua.

Mwenyekiti wa chama hicho Taifa, Bw.Augustino Mrema, aliyasema hayo mjini Moshi, mkoani Kilimanjaro jana wakati akizungumza na waandishi wa habari.

Alisema msimamo wa chama hicho ni kupinga nyongeza hiyo kwani Watanzania wanakabiliwa na changamoto nyingi hivyo ni bora fedha hizo zikatumika kuharakisha maendeleo ya sekta mbalimbali.

Bw. Mremba ambaye pia ni Mbunge wa Vunjo, alisema wazo la kuongeza posho za wabunge limetolewa kwa kukurupuka bila kuangalia madhara yanayoweza kumpata mbunge husika.

“Mtu aliyetoa wazo hili amekurupuka, fedha hizi ni nyingi sana bora ingekuwa sh. 100,000, kimsingi nchi yetu ina matatizo mengi, baadhi ya watumishi serikalini wanalipwa mishahara midogo hivyo fedha hizi wangeongezwa wao pamoja na walimu,” alisema.

Katika hatua nyingine, Bw. Mrema amesema nishani zilizotolewa na Rais Jakaya Kikwete kwa baadhi ya viongozi kama ishara ya kutambua mchango wao katika kilele cha maadhimisho ya miaka 50 ya Uhuru wa Tanzania bara ni unafiki mtupu.

“Hadi sasa sijui Rais Kikwete ametumia vigezo gani kutoa nishani hizi, baadhi ya viongozi waliopewa bado hawajamalizia muda wao wa utumishi serikalini na mchango wao hauonekani.

“Inashangaza kuona kiongozi amedumu katika nafasi hiyo mwaka mmoja tu lakini anapewa nishani kwa mchango upi?...miaka ijayo akiharibu itakuwaje kama sio unafiki hivyo ni bora hizi nishani zikapigiwa kura na wananchi,” alisema Bw. Mrema.

Aliongeza kuwa, wapo baadhi ya viongozi ambao mchango wao unaonekana katika jamii lakini hawakupewa nishani hizo akiwemo yeye mwenyewe ambaye aliwahi kushika nyadhifa mbalimbali serikalini, Waziri wa Afrika Mashariki, Bw.Samuel Sitta na Waziri Mkuu mstaafu, Bw. John Malecela.

“Mheshimiwa Spika Bi. Anne Makinda hana muda mrefu katika uongozi lakini kapewa nishani, hii inashangaza sana ni bora wananchi wapewe nafasi ya kupiga kura ili kuchagua viongozi wanaostahili kupewa heshima hii,” alisema.

Alisema hata kama Rais Kikwete ameshindwa kumpa nishani kutokana na mchango wake kwa Taifa hili, hakuwa na sababu ya kuwanyima viongozi wengine ili kuondoa dhana kuwa, nishani hizo zimetolewa kwa kujuana.

Wakati huo huo, Mwandishi Pamela Mollel, kutoka Arusha anaripoti kuwa, baadhi ya wasomi, wanaharakati na viongozi wa dini nao wametangaza msimamo wa kupinga nyongeza ya posho za wabunge na kudai kuwa, gharama za maisha hazijapanda kwa Mkoa wa Dodoma pekee bali katika mikoa yote nchini.

Wakizungumza na Majira kwa nyakati tofauti, walisema nyongeza hiyo imelenga kuboresha maisha ya wabunge badala ya kuangalia hali halisi ya maisha ya Watanzania.

Walisema makundi mbalimbali yamekuwa yakiishi katika maisha magumu hususan askari polisi, magereza, watumishi wa sekta ya afya pamoja na walimu.

Katibu Mtendaji wa Mtandao wa Mashirika yasiyo ya
kiserikali mkoani Arusha (Angonet,) Bw. Peter Bayo, alisema ongezeko hilo haliwezekani kwani utetezi wa Spika wa Bunge, Bi. Anne Makinda kuwa gharama za maisha zimepanda mjini Dodoma, hauna tija kwani gharama hizo zimepanda nchi nzima.

“Ongezeko hili linapaswa kutazamwa kwa mapana hasa kwa kuangalia uhalisia wa maisha ya Mtanzania badala ya kuangalia kundi moja la wabunge pekee.

“Bunge lina wajibu wa kutazama hali ya maisha ya Watanzania wote na kuporomoka kwa shilingi badala ya kuangalia maisha yao,” alisema Bw. Bayo.

Kwa upande wake, Mchungaji wa Kanisa la Blessing Alter, liliopo Sanawari, Isaya Sizya, alisema haoni tatizo la nyongeza hizo lakini ongezeko hilo ni linapaswa kuwagusa na watumishi wa idara
mbalimbali serikalini.

Alisema ni vyema Bunge likawa na sababu za msingi juu ya ongezeko hilo kwani katika jamii kuna makundi muhimu kama watumishi wa sekta ya afya, walimu na askari ambao nao wanastahili nyongeza ya posho za kujikimu.

“Mimi napendekeza ongezeko la posho za vikao vyao iendelee kubaki sh. 70,000 au sh. 100,000 kwani sh. 200,000 ni nyingi sana ukilinganisha na makundi mengine ya watumishi ndani ya jamii.

“Sio kwamba tunawaonea wivu wabunge wetu ila kuna makundi muhimu ya watumishi ambayo yanapokea posho kiduchu,” alisema.

Mkuu wa Kitivo cha Sheria kutoka Chuo Kikuu cha Makumira, kilichopo nje kidogo ya Jiji la Arusha, Elfuraha Laltaika, alipinga ongezeko hilo na kudai kuwa, sababu zilizotolewa na Bi. Makinda hazina tija.

Alisema wapiga kura wamechagua wawakilishi wa kwenda kuwasemea sio kuongezeana posho za vikao badala ya kuyatizama makundi mbalimbali ndani ya jamii.

“Huu ni ubadhirifu mkubwa wa fedha za umma kama ulivyo unadhirifu mwingine, wabunge wametuangusha sisi tuliowachagua wakatutetee badala yake wanataka kuongezeana posho,” alisema.