Millya ahamia CHADEMA

*Adai CCM ni gari yenye pancha lukuki
*Nape: Alikuwa mzigo ndani ya chama
*Shigela: Amejivua gamba, bado wengine

                            

                  Bw.James Ole Millya
Na Pamela Mollel, Arusha
HAYAWI hayawi sasa yamekuwa, ndivyo unavyoweza kusema baada ya aliyekuwa Mwenyekiti wa Umoja wa Vijana wa Chama Cha Mapinduzi (UVCCM), mkoani Arusha, Bw. James Ole Mallya, kutangaza kukihama chama hicho na kuhamia Chama cha Demokrasia na Maendeleo (CHADEMA).
Bw. Mallya alitangaza nia hiyo mjini Arusha jana katika mkutano wake na waandishi wa habari uliofanyika kwenye Hoteli ya Kibo Palace na kudai kuwa, CCM imepoteza imani kwa wananchi baada ya kukosa mvuto kama ilivyokuwa zamani.

Alisema kutokana na hali hiyo, hawezi kuendelea kupanda gari lenye pancha lukuki, hivyo ameamua kupanda gari salma lenye kutoa matumaini mapya kwa Watanzania.

“Leo natangaza rasmi kuihama CCM na kuachia nyadhifa zote nilizokuwa nazo kuanzia Mkoa hadi Taifa, najiunga na chama chenye dhamira ya kuwakomboa Watanzania ambacho ni CHADEMA.

“Naomba kunukuu maneneo ya Baba wa Taifa Mwalimu Julius Nyerere ambaye aliwahi kusema kuwa, CCM sio mama yake na mimi sio mama yangu, najiunga CHADEMA ambacho ndicho chenye kuleta tumaini jipya Watanzania,” alisema Bw. Millya.

Aliongeza kuwa, nafasi alizoachia ni pamoja na ile ya Mjumbe wa Kamati ya Utekelezaji UVCCM Taifa, Mjumbe wa Kamati ya Siasa Mkoa na Mjumbe Halmashauri Kuu CCM Mkoa.

“Kabla sijachukua uamuzi wa kuhama CCM, nilijitahidi sana kurekebisha baadhi ya mambo ndani ya chama lakini nilipuuzwa hivyo nikaamua kubadili mwelekeo kwa manufaa ya Watanzania.

“Vijana wengi walioko ndani ya CCM wanaishi kwa matumaini ya kusubiri kuteuliwa nafasi ya Mkuu wa Wilaya au Mkoa ila mimi siwezi kuishi kwa matumaini,” alisema Bw. Mallya.

Alitoa wito kwa vijana wote wenye nia na mapenzi mema ya Tanzania, kumfuata CHADEMA ambako ndio kwenye ukombozi wa kweli na tumaini la maisha ya Watanzania.

Bw. Millya ambaye alichaguliwa kuwa Mwenyekiti wa UVCCM mwaka 2008 hadi sasa alipotangza kujiuzulu, aliwashukuru vijana kwa kumpa ridhaa hiyo na ataendelea kuwashukuru.

Alisema ameamua kwa ridhaa yake kuondoka CCM na kuachia nafazi zote alizokuwa nazo kwa sababu ya ukombozi wa kweli.

Hivi karibuni, Bw. Millya alijitosa kuwania ubunge wa Afrika Mashariki kwa tiketi ya CCM lakini jina lake liliondolewa.

Wakati Bw. Mallya akitangaza kuhama chama hicho, vijana mbalimbali ambao ni wanachama wa CCM mkoani hapa, hawakuamini walichokisikia wakionesha dalili za kumfuata.

Akizungumza kwa niaba ya vijana wenzake, Bw. Hamisi Bakari, alidai kusikitishwa na hatua iliyochukuliwa na Bw. Mallya kuhama CCM na kukifanya chama hicho kionekane hakifai hivyo kilichobaki ni wao kumfuata aliko.

Katika hatua nyingine, Katibu wa Itikadi na Uenezi wa CCM, Bw. Nape Nnauye, amempongeza Bw. Mallya kwa kuchukua uamuzi huo ambao umekisaidia chama hicho kwa sababu alishakuwa mzingo ndani ya chama.

Bw. Nnauye aliyasema hayo kupitia mtandao wa kijamii (facebook),na kudai itakumbukwa kuwa, Bw. Mallya alikuwa afukuzwe kwenye chama kutokana na mambo aliyokuwa akifanya.

Alisema CCM ilimpa karipio ili apate muda wa kurekebisha tabia yake hivyo ameondoka akiwa na karipio hilo.

“Kajivua gamba, tunampongeza kwa kuitikia wito, kila la kheri aendako ni kijana ambaye bado ana mengi ya kujifunza,” alisema Bw. Nnauye katika facebook.

Wakati huo huo, Mwandishi Pendo Mtibuche, anaripoti kutoka mjini Dodoma kuwa, Katibu Mkuu wa UVCCM Taifa, Bw. Martine Shigela, kujiuzulu kwa Bw. Mallya na kutangaza kukihama chama hicho ni ukomavu wa kisiasa na utekelezaji wa maamuzi yaliyotolewa na NEC ya kujivua gamba.

Bw. Shigela aliyasema hayo mjini Dodoma jana wakati akizungumza na waandishi wa habari na kuongeza kuwa, kuondoka kwa Bw. Mallya ndani ya CCM, kumepokelewa kawaida kwani NEC ilishatoa maamuzi kuwa viongozi wa chama hicho na wanachama, wajipime, kujitathimini na kujiondoa wenyewe.

Alisema kitendo kilichofanywa na Bw. Milya kimeonesha ukomavu katika kutekeleza maazimio ya NEC ya kujivua gamba kwa wanachama wake hivyo anastahili pongezi kwa hatua hiyo.  

Aliongeza kuwa, viongozi wengine ambao wanajiona ni mzigo kwa  kwa chama hicho, wanapaswa wajiondoe kama alivyofanya Bw. Mallya kwani dhana ya kujivua gamba ndani ya CCM Ni mchakato kwani haikumtaja mtu bali kila mmoja kwa wakati wake anatakiwa kujitathimini mwenyewe.

Bw. Shigela alisema kujiuzulu kwa Bw. Mallya, kutaisaidia UVCCM mkoani Arusha kujipanga upya ili kuendeleza utekelezaji wa Ilani ya Uchaguzi ya CCM.

Alisema sababu alizotoa Bw. Mallya kuwa ndiyo zilizomfanya ajiunge CHADEMA, si za msingi bali amejiona ni mzigo ndani ya jumuiya hiyo.