Nyerere: Mkapa aombe radhi wananchi

*SAU kushinikiza Tendwa ajiuzulu kwa kushindwa kazi
Queen Lema na Pamela Mollel, Arumeru

MAMENEJA Kampeni wa Chama cha Demokrasia na Maendeleo (CHADEMA), katika uchaguzi mdogo Jimbo la Arumeru Mashariki, mkoani Arusha, Bw. Vincent Nyerere, amemtaka Rais mstaafu wa Awamu ya Tatu Bw. Benjamin Mkapa, awaombe radhi wananchi wa jimbo hilo kwa kuwadanyanya juu ya uhusiano wake na familia ya Baba wa Taifa Hayati Mwalimu Julius Nyerere.

Akizungumza na waandishi wa habari jana, Bw. Nyerere alisema katika msiba wa Mwalimu Nyerere, Bw. Mkapa alimpa rambirambi kama mwanafamilia sasa anaposema hana uhusiano na Mwalimu Nyerere ni kuudanganya umma na wakazi wa jimbo hilo.


“Kutokana na matamshi ya Bw. Mkapa ni wazi kuwa ameudanganya umma na wakazi wa jimbi hili hivyo anapaswa kuomba radhi kwani jamii kubwa itamshangaa kama atashindwa kufanya hivyo kama kiongozi mstaafu.

“Ni vyema akaja jimboni Arumeru na kueleza ukweli kuhusu uhusiano wangu na familia ya Mwalimu Nyerere ili kusahihisha usemi wake,” alisema Bw. Nyerere.

Kwa upande wake, Mbunge wa Karatu kwa tiketi ya CHADEMA, Mchungaji Israel Natse, alisema kama Bw. Mkapa atashindwa kuomba radhi kwa wakati, watapita maeneo yote ya jimbo hilo kukanusha uongo huo.

Alisema chama hicho kipo tayari kupokea msamaha wake kama atakiri kufanya makosa ya kuudanyanya umma.

Wakati huo huo, kampeni za uchaguzi mdogo katika jimbo hilo zimezidi kuchukua sura mpya baada ya Chama Cha Mapinduzi (CCM), kuwataka wananchi kutoichagua CHADEMA kwa madai makada wa chama hicho walishangilia msimba wa aliyekuwa mbunge wa jimbo hilo, Marehemu Jeremiah Sumari.

Mratibu Mkuu wa kampeni za CCM jimboni hapa, Bw. Mwigulu Nchemba, aliyasema hayo jana wakati akihutubia wananchi wa Kata ya Makiba, eneo la Valeska.

Alisema miongoni mwa makada walioshagilia kifo hicho ni pamoja na mbunge wa Arusha Mjini, Bw. Godbless Lema na kusisitiza kuwa, CHADEMA haina huruma na wakazi wa jimbo hilo hivyo mgombea wao Bw. Joshua Nassari hapaswi kupewa uongozi.

“Naomba niwaulize, mtu mwenye huruma anaweza kuja msibani na kushangilia wakati mna machungu ya kuondokewa na mbunge wenu, msiwape kula kwani hawana ubinadamu,” alisema.

Mwisho.