Dkt.Shein awaapisha viongozi Zanzibar

Na Mwandishi Maalum, Zanzibar
RAIS wa Zanzibar na Mwenyekiti wa Baraza la Mapinduzi Dkt. Ali Mohamed Shein amemwaapisha Katibu wa Baraza la Wawakilishi, Bw.Yahya Khamis Hamad na Luteni Kanali Mohammed Mwinjuma Kombo kuwa Mkuu wa Kikosi cha Valantia Zanzibar.
Hafla hiyo ilifanyika Ikulu mjini Zanzibar na kuhudhuriwa na viongozi mbali mbali jana akiwemo Makamu wa Kwanza wa Rais kupitia Serikali ya Umoja wa Kitaifa, Bw. Maalim Seif Sharif Hamad, Makamu wa Pili wa Rais Balozi Seif Ali Idd, Spika wa Baraza la Mapinduzi, Bw. Pandu Ameir Kificho, Jaji Mkuu wa Zanzibar, Bw. Omar Othman Makungu na Mwanasheria Mkuu wa Zanzibar, Bw. Othman Masoud.

Wengine ni Waziri wa Nchi Ofisi ya Rais na Mwenyekiti wa Baraza la Mapinduzi Dkt. Mwinyihaji Makame, Waziri wa Nchi Ofisi ya Makamu wa Pili wa Rais, Bw. Mohammed Aboud, Mkuu wa Mkoa wa Mjini Magharibi, Bw. Abdalla Mwinyi Khamis, Meya wa Manispaa ya Mji wa Zanzibar, Mstahiki Khatib Abdulrahman Khatib, Wakuu wa vikosi vya Ulinzi na Usalama pamoja na viongozi wengine.

Viongozi hao waliteuliwa jana pamoja na viongozi wengine ambapo kabla ya hapo, Bw.Hamad alikuwa Mwanasheria wa Baraza la Wawakilishi hivyo ameteuliwa kujaza nafasi ya, Bw. Ibrahim Mzee alieteuliwa kuwa Mkurugenzi wa Mashitaka (DPP).

Wengine walioteuliwa jana ni, Bw. Abdulghani Himid Msoma kuwa Mwenyekiti wa Bodi ya Mamlaka ya Viwanja vya ndege Zanzibar na, Bi.Saada Thani kuwa Mwenyekiti wa Baraza la Elimu Zanzibar.