Chadema watangaza mgogoro na Kikwete

* Wasema amevunja makubaliano waliofikia Ikulu
* Walituhumu Bunge kupenyeza vifungu 'kinyemela'
* Wajipanga kuhamasisha wananchi kuwaunga mkono

Na Benjamin Masese

SIKU moja baada ya Rais Jakaya Kikwete, kusaini muswada wa sheria ya mabadiliko ya Katiba Mpya 2011, Chama cha
Demokrasia na Maendeleo (CHADEMA)  kimeibuka na kupinga hatua hiyo kwa madai kuwa amekiuka makubaliano yao waliyofikia Ikulu Novemba 28, mwaka huu.

Pia chama hicho kimesema haitashiriki kwa namna yoyote wala kutoa ushirikiano katika mchakato wa kukusanya maoni ya wananchi na wadau wengine juuya Katiba Mpya kwa madai kuwa sheria iliyosainiwa na Rais Kikwete ni haramu.

Akizungumza na Waandishi wa Habari Makao Makuu ya CHADEMA Dar es Salaam jana,
Kaimu Katibu Mkuu wa chama hicho Bw. John Mnyika, alisema wamesikitishwa na hatua ya Rais Kikwete kukiuka makubaliano yao na kuamua kusaini muswada huo kabla ya kufanyiwa marekebisho.

Alisema kutokana na hali hiyo wametangaza rasmi kuanza mikutano ya hadhara na ya ndani kupinga maamuzi hayo hadi hapo marekebisho yatakapofanyika kama walivyokubalianoa Ikulu.

“Rais amesaini muswada wa sheria jana kabla ya kutekeleza makubaliano yetu, kuanzia sasa itakuwa sheria, sisi kama CHADEMA hatuko tayari kushiriki kwa kuwa sheria ni haramu.

Kamati kuu imewaagiza wabunge, viongozi na wananchi kuanza kufanya mikutano ya ndani na ya hadhara mpaka kieleweke, pia bunge lijalo kitaeleweka,”alisema Bw.Mnyika.

Alidai kuwepo kwa uwezekano wa uvunjifu wa amani kutokea kwa kile alichodai kuwa ni bunge kuongeza kifungu cha 18 na 19 katika muswada huo na kupitishwa  na bunge huku ikimkataza mwananchi au mtu yeyote kufanya shughuli au kuratibu au kutoa elimu juu ya mchakato wa Katiba Mpya wakati huu.

Alisema kifungu hicho kinatamka adhabu kati ya sh. milioni tano hadi 15 au kifungo jela kwa miaka mitatu hadi saba au vyote kwa pamoja na kwamba kifungu hicho kinakwenda kinyume na Katiba ya sasa ya nchi.

Alisema kifungu hicho kinakizana na ibara ya 18 katiba ya sasa inayompa mwananchi uhuru wa kutoa uhuru maoni sehemu yoyote juu ya jambo lolote na kudai kuwa wako tayari kwenda jela wote kwa ajili ya kutetea watanzania wote  ili washirikishwe kupata katiba mpya waliyoipendekeza.

“Serikali imesaini muswada wa sheria, inakwenda kwa wananchi, na sisi CHADEMA  tunakwenda kwa wananchi, tutakutana huko huko ndipo kitakapoeleweka na hata bungeni kitawaka, hatufanyi hivyo kwa maslahi ya chama chetu hapana, ni maslahi ya wote hata nyie waandishi mmenyimwa fursa pia ifahamike hatutafanya maandamano lakini mikutano lazima ifanyike,” alisisitiza.

Hata hivyo wamemtaka Rais Kikwete kutounda Tume ya kukusanya maoni ya wananchi juu ya Katiba Mpya hadi hapo watakaporekesha kasoro zilizopo katika sheria na kutishia kuwa bila kufanya hivyo ni kukaribisha vurugu nchini.

Alisema kuanzia sasa watasambaza waraka uliokabidhiwa kwa Rais Kikwete na kile alichokiita kuwa ni maamuzi yaliyofikiwa nchi nzima ili wananchi wapate kusoma na kuona nani aliyekiuka makubaliano na kutoa maamuzi yao.

Bw. Mnyika ambaye pia ni Mbunge wa Ubungo Dar es Salaam alisema katika waraka waliomkabidhi Rais Kikwete ulimtaka kufanya mambo mawili ikiwa ni pamoja na kutumia mamlaka aliyonayo kwa mujibu wa ibara ya 97 ya katiba kutosaini muswada huo pamoja na iwapo mabadiliko ya msingi hayatafanyika hawako tayari  kushiriki katika mchakato wa Katiba Mpya.

Kwa mujibu wa taarifa ya IKulu iliyotolewa kwa vyombo vya habari juzi jioni, kusainiwa kwa muswada huo ni hatua muhimu katika mchakato mzima wa Katiba Mpya.

Rais Kikwete aliweka wazi kuwa serikali ipo tayari kusikiliza na kupokea mawazo kwa lengo la kuboresha sheria hiyo. Pia katika mazungumza kati yake na Kamati ndogo ya CHADEMA Rais Kikwete aliwahakikishia kuwa serikali itaendelea  kupokea maoni mbalimbali ya wadau ili kuboresha sheria hiyo kwa maslahi ya Taifa.

Rais Kikwete alisaini muswada huo kuwa sheria siku 11 baada ya kupitishwa na Bunge Novemba 18 mwaka huu mjini Dodoma huku wabunge wa CHADEMA wakiwa wameususia tangu mjadala wa muswada huo uliodumu kwa muda wa siku tatu na kutoka nje ya ukumbi wa bunge kwa maelezo kuwa hakubaliani nalo.

Baadaye CHADEMA waliomba kukutana na Rais Kikwete Ikulu kujadili suala ombi iliyojibiwa kwa kiongozi huyo kukubali na kukutana na ujumbe wa chama hicho ulioongozwa na Mwenyekiti wa Bw. Freeman Mbowe, kwa muda wa siku mbili kisha pande hizo mbili kusaini makubaliano ya pamoja.

Pia hatua ya Rais kusaini muswada huo kuwa sheria baada ya kusikiliza maoni ya CHADEMA na kukubaliana nao huku akiweka wazi kuwa serikali ipo tayari kusikiliza maoni ya kuboresha zaidi sheria hiyo ilipongezwa na wasomi na wananchi mbalimbali kuwa ni hatua nzuri kwa maslai ya nchi.

Desemba 31, mwaka jana katika salamu zake za kufunga mwaka Rais Kikwete aliwaahidi watanzania Katiba Mpya kabla ya kumaliza muda wake wa utawala Kikatiba mwaka 2015 hivyo hatu iliyofikiwa sasa ni sehemu ya utekezaji wa ahadi hiyo.

Kusainiwa kwa muswada huo na kuwa sheria inatoa nafasi kwa Rais Kikwete kuunda Tume ya Kukusanya maoni ya wananchi kwa kushirikiana na Rais wa Zanzibar Dkt. Ali Mohamed Shein.

Tayari Jeshi la Polisi lilikwishatangaza kutoruhusu maandamano au mikutano yoyote ya kisiasa kutokana na tishio la Kigaidi la kundi hatari la Al Shabab.