Walimu kugoma

*Wasema wamechoka kunyanyaswa na serikali
*Walaani posho za wabunge, wadai huo ni usaliti
*Wasisitiza maadhimisho uhuru hayana tija kwao

Na Anneth Kagenda

WAKATI joto la mchakato wa Katiba Mpya likiendelea kutikisa nchi, Chama cha Walimu Tanzania (CWT), kimetangaza mgomo isio na kikomo wa
kutoingia darasani ifikapo Januari 2012 hadi Serikali itakapolipa madeni yote ya walimu ya sh. bilioni 49.6.

Akizungumza na waandishi wa habari Dar es Salaam jana, Rais wa chama hicho Bw. Gratian Mukoba, alisema wamechoshwa na unyanyasaji unaofanywa na Serikali pamoja na kushindwa kuwalipa fedha zao kwa muda mrefu sasa.

“Ndugu zangu waandishi, baada ya kupitia na kuhakiki madai ya walimu, CWT tulipeleka serikalini madai ya walimu tangu Juni mwaka huu, pia tumefanya vikao kadhaa na Serikali na hatimaye ikakubali kutatua kero hizo Novemba na Desemba mwaka huu.

“Kwa kuwa Novemba umeisha, Serikali haijasema lolote kuhusu madai haya, CWT tunafahamu kuwa Serikali inaona mgomo wa walimu wakati huu hauna madhara kwa sababu wanafunzi wamemaliza mitihani na shule zinaelekea kufungwa lakini ukweli ni kwamba, hakuna mgomo usio na madhara,” alisema.


Alisema kwa kuwa Serikali imeshindwa kuheshimu makubaliano yao, shule zikifunguliwa Januari 2012, walimu tutaendelea kuwa likizo hadi kero zao zitakapotatuliwa.

Alitaja baadhi ya kero za walimu kuwa ni kulipwa madeni yao yaliyohakikiwa sh. bilioni 49.6, pamoja na kufutwa kwa waraka kandamizi unaowarudisha nyuma walimu walio jiendeleza kielimu.

Alisema wapo walimu waliojiendeleza kielimu lakini bado hawajapandishwa madaraja, kuongezwa mishahara na stahili nyingine kutokana na waraka huo.

“Kufutwa kwa waraka huu, itakuwa suluhisho la mgogoro kati yetu na Serikali kama mwajiri, kero nyingine ni baadhi ya walimu kutolewa katika mfumo wa ulipaji mishahara, walimu kukatwa mapato yao kinyume na taratibu, baadhi yao kutoongezwa mishahara kwa wakati na madai ya posho za kusimamia mitihani mbalimbali,” alisema Bw. Mukoba.

Alitoa wito kwa walimu wote kuwa na mshikamano kwa kuonesha ushirikiano wa hali ya juu katika kutekeleza maamuzi hayo muda utakapofika ili waweze kuvuka salama na kuwataka wazazi  kuwaelewa na kuungana nao katika kudai haki zao ili watoto wao wapate elimu bora.

“Mtakubaliana nami kuwa kila mmoja wetu ni shahidi wa kero zinazowakumba walimu, lazima zifikie mwisho ili baadaye walimu wafanye shughuli zao katika mazingira mazuri na kuacha kunyanyaswa,” alisema.

Akizungumia maadhimisho ya miaka 50 ya Uhuru wa Tanzania Bara, Bw. Mukoba alisema CWT haioni sababu ya sherehe hizo wakati madai ya walimu yanaendana na miaka hiyo.

“Fedha nyingi inapotea katika maadhimisho ya miaka 50 ya Uhuru, lakini watoto wanasoma shule tangu asubuhi hadi mchana wakiwa na njaa, hakuna vitabu vya kutosha, madarasa mabovu na hakuna vifaa vya kufundishia, sasa tunasherekea kitu gani au ili iweje,” alihoji Bw. Mukoba.

Akizungumzia posho za wabunge, Bw. Mukoba aliweka wazi kuwa inasikitisha kuona wakati walimu wengi hawapati sh. 200,000 baada ya makato, mbunge analipwa sh. 330,000 kwa siku jambo ambalo alilifananisha na wawakilishi hao kuwaibia Watanzania.

“Wabunge waache wizi, huu ni usaliti na dharau, nasema hivi kwa sababu hawaoni hata aibu kusaini posho nyingi wanapokuwa katika vikao vya Bunge wakati walimu wanalala kwenye nyumba mbovu na kunyeshewa mvua.

“Idadi ya wabunge ni 357, wanapokuwa kwenye vikao na kusaini posho hizi kila mmoja, malipo hayo yanafikia sh. milioni 117.8, ukizigawa unapata milioni tisa sawa na nyumba 13 za walimu, kwa siku 10 utapata nyumba 130, hamuoni kwamba huu ni usaliti wa hali ya juu,” alihoji.

Akitoa takwimu za makato ya walimu, Bw. Mukoba alisema wanakatwa sh. 5,000 na 3,000, michango maalumu sh. 2,000, Mfuko wa Pensheni kwa Watumishi wa Umma (PSPF) sh. 16,285 na Michango ya CWT sh. 6,514.

Alitaja michango mengine kuwa ni kodi sh. 25,330.06, michango ya kuendeshea akaunti katiba benki, sh. 46,654, Mwenge wa Uhuru sh. 500, Bima ya Afya sh. 9,771 na kufafanua kuwa jumla ya fedha anazokatwa hadi kufikia Oktoba 31 mwaka huu, itakuwa ni sh. 210,645,94.