Simba Tishio yaipa tano Simba B

Na Omary Mngindo, Kibaha

UONGOZI wa tawi la Simba la Kibaha Kwamfipa (Simba Tishio), umeipongeza timu ya vijana ya chini ya miaka 20 ya klabu hiyo, kwa kutwaa ubingwa wa michuano Kombe la Uhai, iliyomalizika mwishoni mwa wiki.
Akizungumza kwa niaba ya uongozi, Msemaji Mkuu wa tawi hilo Fahimu Lardhi, alisema hatua hiyo ni furaha kwa wana-Simba ambao wameupokea ubingwa huo kwa faraja kubwa.

Alisema kitendo cha vijana hao kuiwakilisha vyema timu yao ni dalili kwamba, msimu huu timu ya wakubwa itautwaa ubingwa wa Ligi Kuu ya Vodacom Tanzania Bara.

"Tayari vijana wameshaanza kuonesha njia, kilichobaki ni kwa wachezaji wanaoitumikia klabu yetu, kuhakikisha wanacheza kwa bidii na hatimaye kutwaa ubingwa wa Ligi Kuu," alisema Lardhi.

Alisema wanauomba uongozi wa klabu hiyo, kuhakikisha wanawalea vyema vijana hao ili siku za usoni waje kuwa nguzo imara ya Simba.

"Tunauomba uongozi wa Simba chini ya Mwenyeiti Ismail Rage, kuhakikisha wanawalinda vijana hao pamoja na kuwapatia mechi za kirafiki kwa ajili ya kuwaendeleza, ili wasitawanyike kwani ni nguzo ya siku za soni," alisema msemaji huyo.