Taarifa za Wikileaks ni uzushi-Ikulu

Na Grace Michael

OFISI ya Rais (IKULU) imekanusha madai yaliyoandikwa katika mtandao wa kimataifa wa Wikileaks ya kuwa Rais Jakaya Kikwete, aliwahi kununuliwa suti tano na
mmiliki wa Hoteli ya zamani ya Kempinski Kilimanjaro na kueleza kuwa ni za kumchafua kiongozi huyo.

Taarifa hiyo inanayotokana na ripoti ya aliyekuwa Balozi wa Marekani nchini Bw. Michael Retzer, pamoja na mambo mengine pia inadai kuwa Chama Cha Mapinduzi (CCM) kilichangiwa dola za marekani milioni moja katika uchaguzi wa mwaka 2005.

Akizungumza na waandishi wa habari Dar es Salaam jana, Mkurugenzi wa Mawasiliano Ikulu, Bw. Salvator Rweyemamu, alisema habari hizo si za kweli kwa kuwa zimejaa uongo na viashiria vinavyolenga kuchafua jina la Rais na Taifa.

“Ni jambo la kusikitisha na la kukatisha tamaa kuwa balozi mwenye heshima kiasi hiki
anaweza kushiriki katika uzushi wa aina hii hii.

...kurugenzi inasema kwa uwazi kuwa
rais hajapokea zawadi kutoka kwa Bw. Ali Albwardy na kama kuna ushahidi basi
utolewe hadharani,” alisema Bw. Rweyemamu.

Alisema Rais Kikwete hajawahi kusafirishwa na mtu yoyote kwenda London akiwa Waziri wa Mambo ya Ndani na badala yake safari zake zote ziligharamiwa na serikali.

“Suala la CCM kuchangiwa dola milioni moja, rais hakuwahi kuchangisha fedha za kampeni kwa kuwa si kazi ya mgombea, lakini hata kwenye orodha ya waliochangia kampeni hiyo Kempinski Kilimanjaro haikuwemo na wala haijaombwa kuchangia,” alisema.

Akizungumzia uamuzi wa Kempinski kununua hoteli ya Kilimanjaro na ruhusa ya kujenga
hoteli nyingine mbili mpya katika eneo la Ngorongoro Crater na Hifadhi ya Serengeti,
Bw. Rweyemamu alisema maamuzi hayo yalifanyika katika awamu ya tatu.

“Rais huyu huyu ambaye wanadai alihongwa suti lakini ndiye aliyekataa kujengwa kwa hoteli katika eneo la Ngorongoro kwa sababu ya mazingira, rais hajawahi kutembelea hoteli hiyo binafsi isipokuwa amefanya hivyo kwa shughuli za kazi,” alisema.

Alisema Ofisi ya rais imesikitishwa na tabia ya kupakazia kiongozi huyo na kwamba wahusika wanalenga kuichafua Tanzania kwa ujumla.

Meneja na Mkurugenzi wa Habari wa hoteli hiyo Bw. Lisa Pile ambaye alidaiwa kumwambia maneno hayo balozi huyo, alikanusha suala hilo.