Askofu TAG aishukia CCM

*Asema matamshi yake Igunga si salama kwa nchi
*Wanazuoni waagiza waislamu kukihama CHADEMA

Na Waandishi Wetu

ASKOFU Gloriuos Shoo wa Kanisa la Tanzania Asssemblies of God (TAG) jimbo la Kilimanjaro amesema matamshi yanayotolewa na viongozi mbalimbali wa
siasa katika uchaguzi mdogo wa Jimbo la Igunga ni kipimo pekee cha kubaini ni viongozi walioko tayari kuoa lugha za uchochezi zikitawala nchini.

Akizungumza na Majira ofisini kwake askofu huyo alisema kuwa
kumekuwepo na kauli mbalimbali za vitisho ambazo hutolewa lakini
hakuna hatua zozote zilizochukuliwa na badala yake serikali iliyopo
madarakani inadhalilika.

Akimnukuu Katibu Mkuu wa Chama Cha Mapinduzi (CCM), Bw. Wilson Mukama kwamba Chama cha Demokrasia na Maendeleo (CHADEMA) kimeingiza makomandoo 60 kutoka katika nchi mbalimbali kwa ajili ya uchaguzi wa Igunga, alisema huko ni kuidhalilisha serikali kwamba haipo makini na ulinzi wa nchi

“Matamshi haya ni kuidhalilisha serikali, sasa kama hali ni hii basi
wananchi tuamini serikali imeshindwa kutulinda hadi tunaingiliwa na
wavamizi na hakuna jitihada zinazochukuliwa na serikali au
inaogopa?" alihoj askofu Shoo.

Askofu Shoo alisema kuwa CCM kimefanya vibaya zaidi ya wale wafuasi wa CHADEMA kukamata Mkuu wa Wilaya ya Igunga, Bi. Fatma Kimario baada ya kitendo hicho kutumika katika mjukwaa ya kisiasa huku jambo hilo likihubiriwa kiudini.

Alisema kuwa kila chama kimefanya makosa ila kitendo cha kuchukuliwa
suala lile kidini tayari ni kupandikiza chuki dhidi ya waislamu na
wakristo, jambo ambalo ni baya kwa nchi yoyote ile duniani.

"Nani ambaye ni mbaya aliyemkamata mkuu wa wilaya au mtu anayetumia
muda mwingi kuhubiri suala lile katika majukwaa ya siasa kuomba ridhaa
ya wananchi wampigie kura, eti ni kuudhalilisha uislamu, hii ni sahihi
kweli?" alihoji Askofu Shoo

Hali kadhalika askofu huyo aliwataka wakazi wa Igunga kuwa makini na
kufanya maamuzi magumu dhidi ya watu ambao hawajali utu wa mtu na
kutumia lugha za vitisho kuwa watashinda kwa gharama yoyote.

Wanazuoni waikomalia CHADEMA

Umoja wa wanazuoni wa Kiislamu Tanzania wameendelea kuikomalia CHADEMA safari hii wakiwaagiza waislamu wote nchini kukihama chama hicho mara moja kwa kupuuza agizo la kuwaomba radhi waislamu.

Akizungumza na waandishi wa habari katibu wa Sekretarieti ya moja huo, Shekhe Sherally Hussein alisema wametoa tamko hilo baada ya wafuasi wa CHADEMA kumzalilisha Bi. Fatma Kimario kwa kumvua Hijab na kukataa kuomba msamaha.

Agizo hilo linakuja siku chache baada ya Mjumbe wa Halmashauri Kuu ya CHADEMA, Profesa Abdallah Safari kusema CHADEMA isingejibu hoja za wanazuoni hao kuhusiana na suala hilo kwa kuwa liko mahakamani, na mahakama ndiyo ingeweza kusema kama kweli walimvua DC Kimaria hijab, na kama walifanya hivyo makusudi au la.

Shekhe Hussein alisema waislamu na wapenda amani nchini wakihame CHADEMA  kuokana na kutoheshimu imani za wananchi na kujichukulia sheria mkononi wakati vyombo vya dola vipo.

"Tuliwapa siku nne za kuomba radhi viongozi wa CHADEMA kwa kuizalilisha Dini ya Kiislamu kwa kumvua hijabu Mkuu wa Wilaya ya Igunga, Bi. Fatma Kimario lakini wamekaidi agizo hilo ,waislamu wote hatuna budi kukihama chama hicho kwani kinalengo la kudhohofisha uislam"alisema.