Tuko radhi Shibuda atimuliwe-Lissu

Na Grace Michael, Dodoma

SAKATA la Mbunge wa Maswa Magharibi, Bw. John Shibuda na Chama cha Demokrasia na  Maendeleo (CHADEMA) limechukua sura mpya baada ya wabunge wa
chama hicho kuweka msimamo kuwa wako tayari kumfukuza uanachama na kurudi kwenye uchaguzi endapo Kamati Kuu itaridhia na kuona kuwa hafai kuwa katika chama hicho.

Msimamo huo ulitolewa jana mjini hapa na Mnidhamu wa Kambi ya Upinzani, Bw. Tundu Lissu baada ya kuhojiwa na waandishi wa habari kuhusu hatua wanazotarajia kuchukua dhidi ya mbunge huyo baada ya kutangaza vita na chama hicho.

“Tuko tayari kuachana naye na kurejea kwenye uchaguzi... hatuwezi kuvumilia tabia ya namna hiyo ambayo ameifanya wazi ya kupingana na sera ya chama na muda huu ndo namwandia barua rasmi ya kumtaka ajieleze ni kwa nini anakwenda kinyume na  msimamo wa chama,” alisema Bw. Lissu na kuongeza kuwa:

“Hatua ambayo tunaweza kwa upande wetu hapa ni kumtaka ajieleze lakini baadaye suala hili litajadiliwa katika na Kamati Kuu ya chama ambayo ina mamlaka makubwa zaidi yakiwemo ya kumfukuza uanachama na katika hili halina visingizio kwa kuwa amelifanya wazi na msimamo wetu tuko tayari kurudi kwenye uchaguzi...na kama anaweza arudi alikotoka,” alisema Bw. Lissu.

Alipohojiwa kuhusu kauli ya Bw. Shibuda ambaye alikaririwa na baadhi ya vyombo vya habari akisema yuko tayari kuanza kuhubiri mabaya ya CHADEMA na viongozi wake akiwemo, Bw. Freeman Mbowe na Bw. Zitto Kabwe, Bw. Lissu alisema kuwa hana jipya la kuhubiri dhidi ya chama hicho kwa kuwa hana anachokijua.

“Hivi Shibuda atahubiri nini kibaya cha CHADEMA? Ni muda gani aliotumia katika kuyajua hayo anayodai? Kwanza hata vikao sidhani kama kuna vikao zaidi ya vitano ambavyo amehudhuria tangu ajiunge na chama, hivyo hana jipya zaidi ya kusema matapishi ambayo yamekuwa yakihubiriwa kila siku kuwa CHADEMA ni chama cha wachaga,” alisema Bw. Lissu.

Mtafaruku huo wa Bw. Shibuda na chama chake ulitokana na msimamo wake aliouonesha wiki iliyopita bungeni wakati akichangia hotuba ya Waziri Mkuu ya bajeti ya  2011/2012 ambapo aliiomba serikali kuongeza posho za vikao hadi sh 500,000 kutoka sh 70,000 kwa siku badala ya kuziondoa kama CHADEMA kinavyotaka.

Bw. Shibuda pia alipendekeza kubadilishwa kwa jina la posho na kuitwa ‘ujira wa mwia’ ili kuondoa mawazo mabaya yanayotokana na neno posho hizo.

Hatua hiyo ya Shibuda ilikwenda kinyume na msimamo wa Kambi hiyo ya Upinzani hasa CHADEMA ambao tayari wametoa msimamo wao kutosaini posho hizo, endapo fomu zake zitatenganishwa na zile za mahudhurio.