Mnyika ataka kitita cha rais kipunguzwe

Na Grace Michael, Dodoma

MBUNGE wa Jimbo la Ubungo, Bw. John Mnyika ameijia juu serikali akiitaka kupunguza fedha katika Ofisi ya Rais zinazotengwa kwa ajili ya matumizi ya kitaifa ambazo
alisema kuwa hutumika kwa safari nyingi za rais ili zifanye kazi ya kupunguza umasikini wa wananchi.

Alisema kipindi cha Baba wa Taifa Hayati, Mwalimu Julius Nyerere, hakukuwa na safari nyingi za kitaifa kama zinazofanywa katika kipindi hiki.

Alisema kuwa safari hizo  zinatumia mabilioni ya fedha za walipa kodi huku miradi ya maendeleo kwa ajili ya wananchi ikiachwa na fedha kidogo.

Kutokana na hali hiyo, alisema hawezi kuunga hoja bajeti ya Ofisi ya Rais mpaka atakapopewa maelezo ya kutosha kuhusu na matumizi ya fedha hizo katika bajeti ya mwaka jana na matumizi yaliyopangwa katika mwaka huu wa fedha.

Msimamo wa Bw. Mnyika ulijionesha wazi jana bungeni wakati akichangia hotuba ya bajeti ya Waziri wa Nchi, Ofisi ya Rais Menejimenti na Utumishi wa umma iliyowasilishwa juzi na Waziri wake, Bi. Hawa Ghasia.

Alisema kuwa haiwezekani Ofisi ya Rais ikatengewa mabilioni ya fedha katika matumizi ya kawaida huku fedha kwa ajili ya maendeleo zikiwa kidogo.

“Kuna kasma ndogo ya matumizi ya Kitaifa ambayo imetengewa kiasi cha sh. bilioni 135 na fedha hizi hazina mchanganuo wowote...na hapa tunatakiwa kupitisha fedha hizi, sitakubali mpaka nipate maelezo ya kina kuhusu fedha za mwaka jana zimefanya nini na nichanganuliwe matumizi ya fedha hizi.

“Hizi fedha ndizo unakuta msafara mmoja wa Rais unatumia milioni 50 na msafara mwingine unatumia mpaka milioni 200, safari zimekuwa nyingi kupita kiasi, tofauti na kipindi cha baba wa Taifa ambaye ukisikia amekwenda Marekani ni kwa ajili ya Mkutano wa Umoja wa Mataifa (UN), lakini hilo kwa sasa halipo safari ni nyingi kuzidi kipimo, fedha hizi zipunguzwe na ziwekwe kwenye miradi ya kuwaondolea wananchi umasikini,” alisema Bw. Mnyika.

Alikwenda mbali zaidi kwa kuonesha bajeti ya Zambia ambayo alisema kuwa fedha zinazotengwa kwa ajili ya Ofisi ya Rais zinakuwa na mchanganuo unaoonesha wazi kuwa rais atakwenda safari ngapi  hivyo akataka maelezo zaidi katika fedha hizo zilizotengwa.

Bw. Mnyika ambaye kabla ya kuchangia chochote alimwomba Mwenyezi Mungu amlinde kwa atakayoyazungumza, ambapo mbali na hilo, aliziomba idara za Usalama wa Taifa na Taasisi ya Kupambana na Kuzuia Rushwa (PCCB) zitumike katika kuondoa kero za wananchi kwa kuwa miradi mbalimbali ikiwemo ya maji, ardhi imegubikwa na rushwa hali inayokwamisha maendeleo ya wananchi.

“Najua nikisema Usalama wa Taifa na TAKUKURU wasaidie haya, wapo watu wanaweza wakaulize hapo wanaingiaje, lakini niseme tu kwamba wanaingia kwa kuwa mnyororo mzima wa miradi imeghubikwa na rushwa hivyo watusaidie katika haya mambo,”
alisema Bw. Mnyika.

Akizungumzia uwajibikaji, alisema kuwa ili nchi iendelee ni lazima iwe na maono pamoja na maadili hivyo akasema kuwa ni lazima mazoea katika kazi naya kifisadi yaachwe na badala yake kila mmoja ajenge utamaduni wa uwajibikaji.

Kutokana na hali hiyo, alisema kuwa umefika wakati kwa Rais Jakaya Kikwete kuanza kusafisha Ikulu kwa kuwa wasaidizi wake wanamshauri vibaya hatua inayofikia kulidanganya Taifa.

“Ipo taarifa aliyotoa rais akisema kuwa ifikapo  Julai kuna megawati 260 za umeme zitakuwa zimeingizwa na makali ya mgawo wa umeme yatapungua lakini mpaka sasa ambayo ni Julai makali ya mgawo yanazidi kuongezeka...na katika hili Waziri wa Nishati na Madini na Naibu wake wanatakiwa kujiuzulu huku Ofisi ya Rais nayo
inatakiwa kufanya maamuzi magumu,” alisema Bw. Mnyika.

Akizungumzia suala la mishahara kwa watumishi wa umma, alisema kuwa maelezo yaliyoko ndani ya hotuba ya waziri ni sawa na ahadi hewa hali iliyowafanya wananchi jimboni mwake kumtaka asiunge mkono hoja.

“Kinachojaribu kuoneshwa hapa kuwa nyongeza ni asilimia 40 lakini imehusisha mambo mengi na si mishahara peke yake hivyo waziri anatakiwa katika kuhitimisha aeleze ukweli wa hali halisi ya suala hili,” alisema Bw. Mnyika.

Alisema kuwa bajeti hiyo inahusu ofisi nyeti kuliko zote, kwa kuwa hata kwa mujibu wa katiba pamoja na kasoro zake, inaeleza wazi mamlaka makubwa ya rais na kiongozi mkubwa wa nchi lakini ni mwajiri na mwajiriwa mkuu, hivyo utumishi wote wa umma bila kujali Waziri Mkuu, mawaziri na watumishi wengine wanafanya kazi
kwa niaba ya ya Rais na tafsiri yake hapo ni kuwa upungufu wowote wa utekelezaji wa bajeti iliyopita anayetakiwa kuwajibika ni ofisi ya Rais.

Kutokana na hali hiyo, alitaka maelezo ya kutosha kutoka serikalini.