Kambi ya upinzani yapinga mwekezaji kupewa ardhi

Na Godfrey Ismaely, Dodoma

KAMBI ya Upinzani Bungeni imelaani kitendo cha serikali kuingia kataba na mwekezaji kutoka Marekani, AGRISOL ENERGY na kumpa ardhi yenye ukubwa wa
ekari 327,755 katika Mkoa wa Ruvuma huku wananchi wakikosa sehemu ya kulima.

Msemaji Mkuu wa kambi hiyo kupitia Wizara ya Kilimo, Chakula na Ushirika Bw. Meshark Opulukwa, alieleza hayo jana wakati akiwasilisha hotuba ya kambi hiyo.

Alisema serikali imetoa ardhi hiyo kwa hoja kuwa ataongeza upatikanaji wa chakula na kutengeneza ajira, lakini katika utekelezaji wa suala hilo, wakulima wadogo wapatao 162,000 wataondolewa kwenye maeneo ambayo walikuwa wanalima na kuhamia
kusikoeleweka.

“Kambi ya upinzani hairidhishwi na hoja za uzalishaji chakula na kutengeneza ajira zinazotumiwa na serikali ili kuhalalisha mpango wa kuwapokonya wananchi ardhi yao na kumpa  mwekezaji, hoja za kumbeba mwekezaji huyo hazina ukweli wa kutosha;

“Takwimu zilizopo za hali ya chakula zinaonesha kuwa nchi  haina tatizo la chakula, ila tatizo kubwa lililopo ni miundombinu mibovu katika maeneo ya uzalishaji mkubwa wa chakula, tatizo la miundombinu ndilo linalosababisha
upungufu wa chakula kwenye maeneo ambayo uzalishaji ni mdogo.

“Hivyo hoja ya serikali kumpa mwekezaji huyo ardhi kwa kisingizio cha kuongeza uzalishaji wa chakula, haina msingi,” alisema Bw. Opulukwa.

Msemaji huyo wa kambi ya upizani alisema iwapo mwekezaji huyo ni muhimu, ingekuwa ni busara akawekeza katika kuimarisha miundombinu mibovu katika mkoa wa Rukwa, ili wakulima na wafanyabiashara waweze kuuza, kununua na kusafirisha
mazao yao kwa urahisi.

Alisema hoja nyingine ya kuongeza mazao yatokanayo na ufugaji inatia shaka, kwani ni dhahiri mwekezaji huyo hajafanya utafiti kuwa Tanzania ni nchi ya tatu kwa kuwa na mifugo mingi na kwamba kuna uwiano kati ya mifugo na idadi ya watu.

Aidha, kambi hiyo imeitaka serikali kuanzisha mamlaka inayojitegema kwa ajili ya kilimo, ili iweze kusimamia sekta hiyo kikamilifu.

Alisema mamlaka hiyo itakuwa na kazi ya kusimamia uzalishaji wa mbegu bora, na za kisasa za kilimo, usimamiaji na usambazaji wa zana za kilimo na kusimamia utumiaji wa teknolojia na zana za kisasa katika kilimo.

Bw.Oporokwa alisema ili kuongeza mchango katika sekta ya kilimo katika uchumi wa nchi, kambi hiyo inaishauri serikali kuwa makini katika kuingia mikataba ya kilimo na wawezekezaji na hasa inayowahusisha wakulima wa mazao.

“Mara nyingi mikataba hiyo inatumiwa vibaya na makampuni na kuwanyima uhuru wakulima kuuza mazao yao eneo lenye bei nzuri,” alisema.