Moto wa Katiba Mpya CHADEMA kutinga Ikulu

*KAMATI Kuu yateua kamati ndogo ya muafaka
*Maandamano yawekwa kiporo kusubiri suluhu
*Mbowe: Hotuba ya rais imetusikitisha sana
*Wanaharakati Dar kutoa msimamo mzito leo

Na Benjamin Masese

Mwenyekiti wa Chadema Bw. Freeman Mbowe akizungumza na waandishi wa habari Dar es Salaam jana kuhusu tamko la Chama hicho kutaka kuonana na Rais Jakaya Kikwete kumweleza msimamo wa kupinga rasimu ya katiba.

SIKU tatu baada ya Bunge la Tanzania kupitisha muswada wa Sheria ya kuundwa Tume ya Kukusanya maoni kuhusu
Katiba Mpya, Chama Cha Demokrasia na Maendeleo (CHADEMA) kimetangaza kusitisha maandaano ya nchi nzima kuupinga kama ilivyoeleza awali.

Badala yake chama hicho kimetangaza nia ya kutaka kuonana na Rais Jakaya Kikwete, ana kwa ana kujadili suala hilo kwa njia ya mazungumzo.

Akizungumza na waandishi wa habari Dar es Salaam jana, Mwenyekiti wa CHADEMA Bw.Freeman Mbowe, alisema baada ya Kamati Kuu ya chama hicho kujdili suala hilo kwa undani wameazimia kuunda kamati ndogo itakayokutana na Rais Kikwete kushauriana ili kufikia muafaka.

"Kamati Kuu imekaa na kushauriana na kupendekezwa kuundwa kwa kamati ndogo ambayo itakutakuna na Rais Jakaya Kikwete, kushauriana na kuwasilisha mapendekezo yao ili kuafikiana kabla ya kuchukua uamuzi kwenda kwa wananchi na wanaharakati,"alisema Bw. Mbowe.

Majina ya wajumbe

Aliwataja wajumbe wa kamati hiyo kuwa ni yeye mwenyewe, Katibu Mkuu wa chama hicho Dkt. Willibroad Slaa, Makamu Mwenyekiti Tanzania Visiwani Bw. Issa Ali Mohamed, Mbunge wa Mpanda Bw. Said Arfi, Profesa Abdala Kapala na Profesa Mwesiga Baregu.

Bw. Mbowe alisema tayari kamati hiyo ilianza kufanya mchakato wa kuonana na Rais Kikwete jana na kwamba iwapo hawatasikilizwa au kupokea ushauri na msimamo kwa kujadiliana wanaturudi mezani na kuamua rasmi kwenda kwa wananchi kueneza kile alichokiita kuwa ni sumu ya kupinga muswada huo.

Akizungumzia hotuba ya Rais Kikwete aliyoitoa mwishoni mwa wiki kupitia  wazee wa Mkoa wa Dar es Salaam, Bw. Mbowe alisema hawakubaliani na kauli kwamba CHADEMA iliahidi Katiba Mpya kwa siku 100.

"Chadema tunasikitika kuona rais na wabunge wanaendelea kupotosha umma katika suala hili. Tulisema kwamba tutaanzisha mchakato wa katiba mpya kabla ya siku 100 huu ndio usahihi.

"Suala la katiba mpya limetekwa na baadhi ya wanasiasa ambao hawajui ni fursa ya kila mtanzania, wapo wengine wanaona chadema inapinga kuwepo kwa katiba mpya, sisi tunahitaji sana na tunachokitaka wananchi washirikishwe na waamue wenyewe,"alisema Bw.Mbowe.

Alisema chama chake kimekipongeza chama cha NCCR Mageuzi kuungana nao kwa kutoka nje ya ukumbi wa bunge kwa lengo la kupinga muswada wa Katiba Mpya huku akikiponda Chama cha Wananchi (CUF) na vingine ambavyo vilishiriki mjadala huo bungeni.

CHADEMA na Polisi

Katika hatua nyingine CHADEMA imetoa mwito kwa Jeshi la Polisi kuondoa pingamizi la kufanya maandanao na mikutano ya kisiasa mara moja kwa madai kuwa kufanya hivyo ni sawa na kuvinyika haki ya msingi vyama pamoja na wananchi kwa ujumla.

Bw. Mbowe alisema baada ya taarifa kutolewa na Jeshi la polisi walitii agizo hilo lakini wamestushwa na kauli ya Rais Kikwete kuwaagiza wabunge wa CCM kufika kwenye majimbo yao na kuzungumza na wananchi juu ya muswada wa Katiba Mpya.

Alidai iwapo wabunge watafanya mikutano na wananchi watakuwa wameanzisha ligi ya mikutano na maandamano na kuliomba jeshi la polisi kuondoa pingamizi hilo.
       
 Sakata la Jairo           

Akizungumzia suala la Katibu Mkuu wa Wizara ya Nishati na Madini Bw. David Jairo, ambaye bunge liliazimia kuchukuliwa hatua Bw. Mbowe alisema msimamo wa chadema uko pale pale kama wabunge walivyopendekeza bungeni.

Alisema hakuna sababu yoyote ya Bw. Jairo, Waziri wa wizara hiyo Bw.  William Ngeleja, Katibu Mkuu Kiongozi Bw. Philemon Luhanjo, pamoja na watumishi wengine kuendelea kuwa watumishi wa umma na kwamba msimao wa CHADEMA ni kuona wakifukuzwa kazi na kufikishwa mahakamani.

Alisema hatua zisipochukuliwa mapema kabla ya bunge kuirejea Januari 31, mwakani hapatatosha kutokana na kile alichodai kuwa ni uzembe huku kukiwa na ushahidi wa ubadhirifu huo kufanywa kwa makusudi.

Kwa upande wake Dkt. Slaa pamoja na Mbunge wa Singida Mashariki Bw. Tindu Lissu, walikituhumu CCM kwa maelezo kuwa kimetumia 'ujangili' kupitisha muswada wa katiba mpya usio na maslahi kwa wananchi.

Wakati huohuo wanaharakati mbalimbali wanatarajia kutoa tamko zito kuhusu Muswada huo leo Jijini Dar es Salaam huku kukiwa na taarifa kuwa kulikuwa na vikao vya hapa na pale vya jumuiya hizo chini ya Jukwa la Katiba tangu Ijumaa wiki iliyopita.

"Tutatoa tamko letu kesho (leo) ili wananchi watuelewe na wajue wazi msimamo wetu baada ya Bunge kupitisha Muswada wa Sheria ya Kuundwa ya Katiba Mpya,"alisema mmoja wa mwanarakati ambaye hakutaka jina lake litajwe kwa kuwa si msemaji rasmi wa kundi hilo.

Awali katika mdahalo wao Jijini Dar es Salaam wiki iliyopita, Jukwa la Katiba walitishia kuhamasisha wananchi kufanya maandamano ya nchi nzima yasiyokuwa na kikomo kupinga muswada huo kwa madai kuwa ulipaswa kusomwa mara ya kwanza bungeni na sio mara ya pili.