Tuko tayari kupoteza mabilioni ya rada -Membe

Na Grace Michael, Dodoma

SERIKALI imesema iko tayari kupoteza mabilioni ya fedha yanayotakiwa kulipwa na Kampuni ya BAE Systems ya Uingereza endapo haitakuwa tayari kupitisha
fedha hizo serikalini.

Fedha hizo ni pauni milioni 25 sawa na sh. bilioni 75 zinatakiwa kulipwa na
BAE kama tozo ya fidia ya mauzo ya Rada baada ya uchunguzi kubaini kwamba Tanzania ilizidisha malipo ya chombo hicho.

Akisoma kauli ya serikali bungeni jana, Waziri wa Mambo ya Nje na Ushirikiano wa Kimataifa Bw. Bernard Membe, alisema pamoja na kampuni hiyo kuwa na masikio lakini imeshindwa kusikiliza kilio cha wengi na imeonesha dharau ya wazi wazi dhidi ya serikali ya Tanzania.

Waziri Membe aliwaomba wabunge bila kujali itikadi zao kuungana na serikali katika msimamo huo kulinda heshima ya nchi.

Alisema ni aibu kwa kampuni ilikwapua fedha za walipa kodi kupanga tena matumizi ya fedha hizo na kwamba kitendo hicho kinadhihirisha jinsi inavyodharau watanzania jambo ambalo haliwezi kuvumiliwa.

Alitahadharisha kuwa serikali haitaruhusu Asasi za kiraia za Uingereza kuja nchini kama Kampuni ya BAE inavyotaka kufanya kwa kisingizio cha kutoa misaada kwa asasi hizo.

“Tanzania ni nchi masikini lakini haiko tayari kudharauliwa kiasi hicho, serikali yake, Taasisi zake na Asasi zake kutoaminiwa, kuruhusu hilo kufanyika ni kuruhusu kuibiwa kwa mara ya pili, hatutaruhusu asasi hizo kuingia hapa nchini,” alisema Bw. Membe.

Alisema ili kuhakikisha serikali inafuatilia suala hilo kwa umakini na kushinikiza fedha hizo kupitia katika mfuko wa taifa bunge limetuma timu ya watu wanne kwa lengo la kukutana na Kamati husika na kufanya mazungumzo na wabunge wa Bunge la Uingereza kuhusiana na suala hilo.

Kamati hiyo pia itakutana na viongozi wengine wenye ushawishi mkubwa nchini humo kwa lengo la kuwashawishi au kuishinikiza kampuni ya BAE kutoa fedha hizo kwa serikali ya Tanzania bila masharti yoyote.

Timu ya wabunge inaongozwa na Naibu Spika wa Bunge la Tanzania Bw. Job Ndugai, Bw. Mussa Zungu ambaye pia ni Makamu Mwenyekiti wa Kamati ya Kudumu ya Bunge ya Ulinzi na Usalama, Bi. Angellah Kairuki Makamu Mwenyekiti wa Kamati ya Katiba, Sheria na Utawala na Bw. John Cheyo ambaye pia ni Mwenyekiti wa Kamati ya Kudumu ya Bunge ya Hesabu za Serikali.

Waziri Membe alieleza bunge kuwa katika kushughulikia suala hilo tayari amefanya mazungumzo na Waziri wa Uingereza anayeshughulikia masuala ya Afrika kujua kama serikali ya nchi hiyo inaunga mkono msimamo wao au la.

Alisema Waziri huyo alimhakikishia kuwa  msimamo wa nchi hiyo haujabadilika na kuwa wanaunga mkono fedha hizo kurejeshwa kwa Serikali ya Tanzania kwa matumizi yaliyoanishwa.

Alisema kuwa serikali inashangazwa na uamuzi huo wa BAE wa kutaka fedha hizo zipitie kwenye asasi za nchini Uingereza kwa kuwa fedha hizo si za misaada kama kampuni hiyo inavyotaka kuuaminisha ulimwengu.

“Fedha hizi ni za tozo kwa fedha zilizokwapuliwa na BAE kutoka Tanzania, hatuko tayari kukubaliana na uamuzi wa BAE ambao una lengo kuiondolea heshima nchi yetu.

Una sura ya makusudi ya kuonesha kutoamini dhamira ya serikali ya Tanzania kutumia fedha hizo kama zilivyopangwa,” alisema Bw.Membe.