Wananchi waandamana kudai 'tiba ya Mbeya'

Na Charles Mwakipesile, Mbeya

SERIKALI Mkoa wa Mbeya jana ilisalimu amri kwa mganga aliyeibuka akitibu magonjwa mbalimbali, Jafari Welino (17) na kujikuta ikibariki huduma baada ya wagonjwa
wanaotegemea huduma hiyo kuandamana na kutishia kulipua Ofisi ya Mkuu wa Mkoa huo.

Taarifa ya awali iliyolifikia gazeti hili (soma uk. 9) ilisema kuwa Ofisi ya Mganga Mkuu wa Mkoa wa Mbeya ilikuwa imemzuia kijana huyo  kutoa huduma ya tiba kwa madai kuwa mazingira ya utoaji wa huduma hiyo ni machafu na kuwa dawa anayotumia ilitakiwa ifanyiwe uchunguzi ili kuona kama ni kweli inaweza kuponya magonjwa sugu bila kuleta madhara kwa afya za binadamu.

Kutokana na hali hiyo, baada ya wagonjwa waliokuwa wamefika nyumbani kwa kijana huyo eneo la Mabatini, kilomita 2.5 kutoka katikati ya Jiji la Mbeya wakiwa na vikombe mikononi walikubalina kuandamana makubwa kwenda kwa mkuu wa Mkoa  wa Mbeya.

Kutokana na hoja za nzito za wananchi hao, na ushuhuda kuwa wengine wameponywa na kijana huyo baada ya kunywa vikombe viwili vya dawa huku wakitishia kufanya fujo kubwa ikiwa hataruhusiwa, serikali ya mkoa ilisalimu amri na kumruhusu.

Mkuu wa Mkoa wa Mbeya, Bw. John Mwakipesile alitoa amri kwa kijana huyo kuendelea kutoa huduma huku idara zinazohusika zikifuatilia kuona namna ambayo itafanya, ili kijana huyo aweze kutoa huduma katika hali ya usafi wakati utafiti wa dawa hizo ukiendelea.

Tamko hilo liliamsha shangwe kwa wananchi hao, kisha Katibu Tawala Msaidizi Bw. Moses Chitama, kwa niaba ya Mkuu wa Mkoa aliongozana na waandamanaji hao kwenda nyumbani kwa kijana huyo kukagua eneo la huduma huyo, ambapo alisema kuwa ruhusa hilo ni ya muda na kuwa kijana huyo anatakiwa kuhama kwenda sehemu safi.

Bw. Chitama alisema kuwa serikali haina ugomvi na waganga wala imani za dini, na hivyo kinachotakiwa kwa kijana huyo ni kuhakikisha anafanya kazi hizo katika mazingira safi ili kutoathiri afya za wagonjwa wake.

Akijibu maswali kijana huyo aliyeonekana mwenye ujasiri alisema kuwa yeye alipewa kazi hiyo baada ya kutokewa na mizimu ambapo alikatazwa kusoma shule na kuoneshwa mti ambao aliambiwa kuwa utakuwa ukombozi kwa watu kwa kuwapa vikombe viwili kwa siku mbili bila ya malipo.

Kuhusu kuhama katika eneo hilo, alisema kuwa hawezi kufanya hivyo kwa agizo la serikali badala yake anasubiri mizimu yake iweze kumweleza jambo hilo na sehemu ya kwenda na ndipo atakapoamua kufanya hivyo.

Alisema kuwa hadi sasa amekwishatoa hudumia kwa watu wengi na miongoni mwao wapo waliopona bila ya malipo, na hivyo kufafanua kuwa hajajitokeza kwa ajili ya kumpinga Mchungaji Ambilikile Mwasapile wa Loliondo, anayedaiwa kutoa tiba ya magonjwa simu kwa kuagizwa na Mungua. Mchungaji Mwasapile wa Kanisa la KKKT, maarufu kama Babu hutoa kikombe kimoja tu cha dawa.

Kamanda wa Polisi Mkoa wa Mbeya, Bw. Advocate Nyombi alisema yeye anachoangalia ni hali ya usalama wa watu wanaomiminika katika eno hilo dogo kupata huduma, huku akitaka mamlaka nyingine zifanye kazi yake ili kudhibiti uvunjifu wa amani unaoweza kutokea.