Mbowe arejesha Shangingi la serikali

 *Ataka liwe la kwanza kunadiwa, kutolea mfano
*Amtaka Spika atenganishe fomu za posho, mahudhurio
*Bajeti yapita, Mkulo akubali kupunguza bei ya mafuta

Na Waandishi Wetu, Dodoma, Dar

KATIKA hatua inayoonesha Kambi Rasmi ya Upinzani inayoongozwa na
Chama Cha Demokrasia na Maendeleo (CHADEMA) kutaka kupunguza matumizi ya serikali na kuongeza fedha kwenye maendeleo ya nchi, Kiongozi wa Kambi hiyo, Bw. Freeman Mbowe, amerejesha gari la serikali aina ya Toyota Land Cruiser 'shangigi' ili lipigwe mnada.

Mbali na hiyo pia kambi hiyo imemwandikia rasmi Katibu wa Bunge Dkt. Thomas Kashilillah, kumtaka atenganishe fomu kwa ajili ya mahudhurio na orodha ya kuchukua posho ili wanaozichukua wafahamike.

"Kuhusu magari, kiongozi wa Kambi rasmi ya Upinzani Bungeni (KUB) Mhe. Freeman Mbowe, ameamua kurejesha gari yake aina ya “Shangingi” alilopewa na Bunge ili liwe la kwanza kupigwa mnada. Tunawataka wabunge wengine waunge mkono hoja hizi kwa masilahi ya wananchi na taifa kwa ujumla," alisema Bw. Mbowe.

Bw. Mbowe ambaye alizungumza baada ya bajeti ya serikali kupitishwa huku hoja yao ya kupunguza posho vikao kutupwa, alieleza kuwa lengo kuu la hatua hiyo ni kusisitiza lengo la kambi yake kutaka serikali kuongeza fedha hizo katika bajeti ya maendeleo.

Lengo lingine kwa mujibu wa Bw. Mbowe ni kutaka kuipunguzia serikali mzigo, kisha fedha hizo kuongezwa katika bajeti ya maendeleo ili kumpunguzia ukali wa maisha Mtanzania wa kawaida kwa kuboresha miradi ya maendeleo yanayosuasua kwa sasa kwa maelezo kua 'sungura ni mdogo'.

Pia taarifa hizo ilitoa ufafanuzi kuhusu sababu ya kambi yake kukataa kuunga mkono bajeti ya serikali ya sh. trilioni 13.

"Pamoja na Bajeti ya Serikali kukubali na kuzingatia baadhi ya hoja zilizotolewa na wabunge wa Kambi ya Upinzani, tuliamua kupiga kura za HAPANA kwenye mapendekezo hayo ya serikali kutokana na sababu muhimu," alisema Mbowe katika taarifa yake.

Alitaja baadhi ya sababu hizo kuwa ni pamoja na kutokubaliana na hoja yao kuhakikisha magari yote aina ya “Mashangingi” yanayotumiwa na viongozi na watumishi wa umma yauzwe kwa mnada ndani ya miezi sita na viongozi hao wakopeshwe magari kwa ajili ya kufanya majukumu yao mbalimbali.

Serikali kutokubaliana na hoja ya kufuta/kupunguza misamaha mikubwa ya kodi ambayo Makampuni ya Madini yanapata ili kuhakikisha kuwa serikali inapata mapato kwa ajili ya kugharamia miradi mbalimbali ya maendeleo.

"Serikali imekataa kuingiza pensheni kwa ajili ya wazee wote nchini ya sh. 20,000 kila mwezi kuwapunguzia ukali wa maisha wazee wetu," alisema Bw. Mbowe.

Bajeti yapita

Kabla ya tamko la Bw. Mbowe, Bunge lilipitisha bajeti ya Serikali ya mwaka wa fedha 2011/2012 ya sh. trilioni 13.5 huku ikubaliana na ushauri wa kupunguza kodi za mafuta ya dizeli na mafuta ya taa na kutolea ufafanuzi suala la posho ambalo limezua gumzo.

Katika kura zote zilizopigwa kupitisha bajeti hiyo, wabunge 81 walisema Hapana, huku 234 wakiunga mkono. Wabunge 34 hawakuwepo bungeni.

Hatua hiyo ilifikiwa jana mjini hapa baada ya mawaziri wa Wizara ya Fedha kujibu hoja zilizokuwa zimeibuliwa na wabunge kutokana na bajeti hiyo.

Katika majumuisho yake Waziri wa Fedha, Bw. Mustapha Mkulo, alisema kuwa katika suala la mafuta serikali imekubaliana na ushauri wa Kamati ya Fedha na Uchumi na kufanya marekebisho katika viwango vya ushuru kwenye mafuta ya taa na dizeli na
kupunguza tozo zinazotolewa na mamlaka mbalimbali katika mafuta.

Alisema kuwa katika kurekebisha ushuru katika mafuta ya dizeli imepunguza kodi ya sh 100 na tozo kwa sh 224 kwa lita huku wakisubiri ushauri wa Ewura kuhusu punguzo kwenye mafuta ya taa.

Alisema tozo hizo zilikuwa zinachangia upandaji wa bei ya mafuta na kusababisha upandaji wa gharama za maisha.

Alisema hatua ya kupunguzwa kwa kodi na tozo hizo itasaidia kuondoa ushawishi wa kuchakachua ambapo ushuru wa mafuta ya taa utarekebishwa baada ya Mamlaka ya Udhibiti wa Nishati na Maji (EWURA) kutoa ushauri kwa serikali baada ya kufanya hesabu na kuona ni namna gani itasaidia katika kumaliza tatizo la uchakachuaji na kuondoa kichocheo cha kukwepa kodi.

Kauli kuhusu posho

Bw. Mkulo alisema kuwa suala la posho ambalo limerindima katika vyombo vya habari takribani wiki nzima limekuzwa kutokana na
matumizi ya takwimu zisizo sahihi.

Alisema kuwa suala posho alilisoma kwenye hotuba yake katika ukurasa wa 50-54 ambayo inasema itapunza posho mbalimbali sizizo na tija, safari sizizo na tija, semina na warsha zisizo na tija.
Alisema kuwa jumla ya posho zote zinazotolewa kwa mwaka ni sh. bilioni 312 na sio sh. bilioni 980 kama ilivyodaiwa na upinzani.

Alisema kuwa posho za vikao kwa serikali nzima ni sh. bilioni 25.68 na kati ya hizo, wabunge wanatumia sh. bilioni 4.92 hivyo kama posho za vikao zitafutwa serikali itaokoa jumla ya sh. bilioni 4 tu ambazo zinatumiwa na wabunge.

Alisema kuwa kutokana na takwimu hizo wabunge wanaweza wakapima wenyewe.

Akizungumzia suala la matumizi mabaya ya fedha za serikali kama ilivyooneshwa katika taarifa ya Mkaguzi na Mdhibiti wa Fedha za Serikali, alisema kuwa serikali itaendelea kuzingatia ushauri unaotolewa na CAG ili kuimarisha nidhamu ya utunzaji wa fedha za umma.

Alisema kuwa pamoja na yaliyooneshwa na CAG lakini utunzaji wa fedha umeimarika na akaahidi kuwa serikali itaendelea kuutumia ushauri huo ili matumizi ya serikali yazingatie taratibu.