Kinondoni watamba kutetea ubingwa wao

Na Mwandishi Wetu

MABINGWA watetezi wa michuano ya vijana chini ya umri wa miaka 17 'Copa Coca-Cola' Mkoa wa Kinondoni, wametamba kutetea ubingwa wao katika michuano hiyo
inayotarajiwa kuanza kwa ngazi ya taifa Juni 11 hadi Julai 2, mwaka huu Jijini Dar es Salaam.

Akizungumza Dar es Salaam jana kabla ya kikosi hicho kuondoka kwenda kambini Kibaha, Pwani, kocha Evarist Katomondo alisema wanafahamu watakutana na upinzani mkali katika ligi hiyo, lakini wana matumaini ya kushinda kutokana na maandalizi ya mapema waliyofanya.

Alisema wataanza kucheza kwa umakini tangu mchezo wa ufunguzi, dhidi ya Dodoma utakaochezwa Juni 11 ili kuweza kujihakikishia ushindi mapema na waweze kutwaa ubingwa huo.

"Hivyo basi ili tupate ushindi yunawaomba wapenzi wa soka Kinondoni, watuunge mkono kuanzia katika mechi ya ufunguzi, waje wawape moyo wachezaji wetu tuungane pamoja katika hili, tushinde kwa sababu mashabiki nao wana nafasi yao kwenye ushindi," alisema.

Akizungumzia kundi lao walilopangwa kocha huyo, alisema wanazichukulia timu zote kwa uzito mmoja na kwamba hakuna inayowanyima usingizi kutokana na maandalizi ya mapema waliyoyafanya miezi miwili iliyopita.

Katika hatua nyingine, kocha huyo ameishauri mikoa inayoshiriki michuano hiyo kujiwekea utaratibu wa kuziendeleza timu zao, pindi mashindano yatakapomalizika kukuza vipaji kutokana na lengo la mashindano hayo yalivyo.

Kinondoni imepangwa kundi A na timu za Kusini Pemba, Singida, Mbeya, Kilimanjaro na Mwanza.