Kawambwa atangaza dawa ya migomo vyuo vikuu

*Afichua yaliyomo katika bajeti yake
*Bodi ya mikopo kuongezewa fedha zaidi

Na Charles Mwakipesile,  Mbeya

WAZIRI wa Elimu na Mafunzoya Ufundi, Dkt.Shukuru Kawambwa, ametangaza mkakati wa kumaliza migomo na vurugu katika vyuo  vikuu
baada ya wizara yake kuongezwa bajeti katika mwaka huu wa fedha 2011/2012.

Akitoa salamu zake kabla ya kusoma hotuba kwa niaba ya Waziri Mkuu, Bw. Mizengo Pinda, ambaye alimwakilisha kwenye  hafla ya kuweka jiwe la msingi kwa ajili ya ujenzi wa  ukumbi wa kisasa wa Chuo Kikuu cha Teofili
Kisanji (TEKU), Bw. Kawambwa alisema kuongezwa kwa bajeti ya wizara yake kutasaidia kumaliza matatizo kwenye vyuo vikuu.

Huku akishangiliwa na wanafunzi wa chuo hicho, Dkt. Kawambwa,  alisema wizara yake imeamua kuongeza  bajeti  hiyo, ili zipatikane  fedha za kutosha kwa  ajili  ya Bodi ya Mikopo ya Wanafunzi wa Elimu ya Juu na kisha kuongeza posho ya chakula ambayo nayo imekuwa ikilalamikiwa  kila siku na kusababisha migomo.

Hata hivyo waziri huyo hakutaja ongezeko hilo kwa kuwa lilikuwa halijapitishwa na  bunge. Alisema ana imani kuwa bajeti hiyo  itamaliza matatizo ya wanafunzi wa vyuo vikuu. Alisema wanafunzi  wengine wamekuwa wakiofanya
vurugu kwa kufuata kasumba.

Alitoa mfano akisema wanachojua ni kuwa wanafunzi wa Chuo Kikuu cha Dodoma (UDOM) walifanya mgomo usiowa wa lazima, 
kwa kuwa madai yao yalikuwa yakishughulikiwa.

"Angalia ndugu zangu wale wa UDOM kwa kweli walifanya mgomo   wakati madai yao yanashughulikiwa," alisema.

Alisema serikali inatoa kipaumbele kwa elimu kwa kutambua
umuhimu wake,hivyo kupitia  bajeti ya mwaka huu itakapokuwa  kutakuwa na mabadiliko makubwa katika sekta ya elimu.

Alipongeza amani na utulivu uliopo katika chuo cha  kikuu cha TEKU na kushauri kiwe mfano wa kuigwa na vyuo viongine.

Mkuu  wa chuo cha TEKU Mhashamu  Askofu Alinikisa Cheyo alisema  chuo hicho kimekuwa  na nidhamu hivyo kuwa na uhakika wa kutoa wasomi wanaotegemewa. Chuo hicho kinamilikiwa na Kanisa la Moravian Tanzania.