...CHADEMA yambana Pinda

Na Tumaini Makene, Dodoma

KAULI ya Waziri Mkuu aliyoitoa bungeni akionekana kutetea mfumo unaoruhusu posho za vikao, imeanza kumrudi, ambapo sasa imetakiwa kuifuta kwa
madai inakwenda kinyume na Katiba ya Tanzania, kwa kupotosha majukumu ya bunge na wabunge kama yalivyoelezwa katika Ibara ya 63(2) na (3).

Msimamo huo wa Bw. Pinda unadaiwa kukiuka maelekezo ya Rais, kama inavyoelezwa katika Ibara ya 52(3).

Pia imeelezwa namna ikulu na bunge zinavyotumia fedha nyingi kwa ajili ya posho za vikao, ambapo kwa mwaka 2009/10 Ikulu ilitengewa zaidi ya sh. bilioni 148, huku bunge likijigawia sh. bilioni 36, ambapo jumla ya fedha zote za posho za vikao kwa mwaka huo zilizotengwa na serikali, zilikuwa sh. bilioni 509, ambazo zingeweza kutumika kuwalipa mishahara walimu 109,000 kwa mwaka mzima.

Wiki iliyopita katika kipindi cha kila Alhamisi cha maswali ya papo kwa papo kwa Bw. Pinda alisema kuwa suala la posho haliepukiki kwani kuna zingine zipo kwa mujibu wa katiba, hivyo haziwezi kuondolewa bila kufuata utaratibu huo, huku akiongeza kuwa baadhi zinaweza kuondolewa kwa maagizo ya katibu mkuu akiona inafaa, huku pia akiwarushia kijembe CHADEMA kuwa wapo wanaozimezea mate lakini wanashindwa kusema.

Akijibu swali la Mbunge wa Mkanyangeni, Bw. Mohamed Habib Mnyaa (CUF), Bw. Pinda alisema kuwa ukweli ni kwamba posho hizo ambazo ni stahili za wabunge na watumishi wengine wa umma, zipo kwa mjibu wa taratibu zilizowekwa kikatiba na zimegawanyika katika makundi mawili.

Akizungumza na waandishi wa habari jana mjini Dodoma, Katibu wa Wabunge wa Chama cha Demokrasia na Maendeleo (CHADEMA), Bw. John Mnyika, mbali ya kumtaka asome Ilani ya CHADEMA ya 2010, aelewe msingi wa hoja yao, alisema kuwa kauli ya Bw. Pinda ya kuhalalisha posho za vikao, inahamasisha siasa za fadhila katika taifa, ambazo alidai zimekuwa zikitumiwa na CCM kupandikiza mbegu za rushwa katika uchaguzi.

"Kauli ya Waziri Mkuu Pinda inadhihirisha hana dhamira ya dhati ya kutekeleza kwa ukamilifu na kwa haraka maagizo ya Rais Kikwete, kinyume na Katiba Ibara ya 52(3), ambayo inamtaka atekeleze au asababishe utekelezaji wa jambo lolote au mambo yoyote ambayo rais ataagiza kwamba yatekelezwe," alisema Bw. Mnyika.

Hoja ya Bw. Mnyika ilijikita katika marejeo ya Mpango wa Kwanza wa Maendeleo wa Miaka Mitano 2011/12-2015/16, ambao Rais Kikwete ameshausaini na kuuzindua, ambapo ndani yake katika ukurasa wa 17, serikali imetamka wazi kuwa posho za vikao na nyinginezo zinapaswa kufutwa au kuwianishwa.

"Katibu wa Wabunge wa CHADEMA nimeshangazwa na kauli za Waziri Mkuu Mizengo Pinda, alizozitoa bungeni tarehe 16 Juni 2011 wakati akijibu maswali ya papo kwa papo...ametoa kauli ya kuhalalisha posho za wabunge kwa hoja kwamba zinahitajika kwa ajili ya kuwapa watu wanawaomba fedha nje ya ukumbi wa bunge.

Anapaswa kuifuta kauli yake hiyo, kwani inapotosha majukumu ya bunge na wabunge wake yaliyotajwa kwenye ibara ya 63(2) na (3) ya kusimamia serikali, kuwawakilisha wananchi, kupitisha mipango na kutunga sheria.

Ilani ya CHADEMA 2010 ilieleza lengo la kupunguza posho hizi kwa zaidi ya asilimia 80 zikiendana na nyongeza ya mishahara kwa watumishi wa umma kuendana na ujuzi, nafasi, wajibu ili wafanyakazi walipwe kwa haki kwa kile wanachofanya kwa haki.

"Nilitarajia kwamba baada ya Serikali ya CCM kuchukua msimamo huo wa kuuingiza kwenye mpango wa taifa wa maendeleo wa miaka mitano uliosainiwa na Rais Kikwete Juni 7, 2011 ambao kwenye ukurasa wa 17 unatamka bayana kwamba posho za vikao na nyinginezo zinapaswa kufutwa au kuwianishwa; waziri mkuu angeipongeza CHADEMA na wabunge wake kwa msimamo wao badala ya kubeza na kupotosha.

"Ni vizuri Waziri Mkuu Pinda na watu wengine wanaotumika ndani ya serikali kutaka kuichafua CHADEMA na wabunge wake waelewe kwamba ambacho tunataka kwa umoja wetu ni kurekebishwa kwa mfumo mzima wa posho...serikali isifanye mkakati wa kupenyeza habari ya kuupotosha umma kwa kutumia orodha na saini za wabunge za mahudhurio ya vikao sanjari na habari ya kupindisha kutaka kuonesha kuwa wabunge wa CHADEMA hawana dhamira ya dhati kuondoa posho za vikao.

"Kifungu cha 19 (d)(iv) kimempatia mamlaka rais ya kutoa posho zingine kwa wabunge kwa kadiri atakavyoelekeza; kifungu hicho kimefanya utolewe waraka wa Katibu Mkuu Kiongozi Ofisi ya Rais wa Oktoba 25, 2010...ambao umeeleza viwango vya posho, mbalimbali ikiwemo posho ya vikao.

Hivyo kwa kuwa Rais Kikwete amesaini  Mpango wa Maendeleo wa Miaka Mitano Juni 7, 2011 wenye kulenga kuondoa posho hizo rais, anapaswa kufuta posho hizo.

"Asisubiri mabadiliko ya kisheria au kikatiba kama Pinda alivyoeleza bungeni," alisema.

 Aidha hatua hiyo iende sambamba Rais Kikwete kuonesha mfano kwa kupunguza gharama za posho mbalimbali za vikao na safari za nje ambazo zinatumiwa na ikulu," alisema kwa kirefu Bw. Mnyika.