Baraza la Kikwete lahojiwa bungeni

*Mbunge asema ni kubwa mno, linalodidimiza uchumi
*Alinganaisha Marekani yenye mawaziri 15, Japan 17
*Wazanzibari walia na muungano, wasisitiza uvunjwe

Na Grace Michael,Dodoma

MBUNGE wa Viti Maalum, Bi. Suzan Lyimo (CHADEMA) amekataa kuunga mkono hoja ya bajeti ya Ofisi ya Waziri Mkuu kwa kuwa haijazingatia
kupunguza matumizi hususan kupunguza ukubwa wa baraza la mawaziri, serikali kutokuwa na nia ya dhati ya kuhamia Dodoma pamoja na kushindwa kutoa maamuzi.

Mbali na suala hilo, baadhi ya wabunge waliochangia hotuba hiyo hasa wabunge kutoka Zanzibar waliomba kuvunjwa kwa muungano kwa kuwa umeshindwa kuzingatia maslahi ya pande zote mbili ambapo alitolea mfano katika uteuzi wa mabalozi
katika nchi mbalimbali.

Hayo yote yaliibuka bungeni jana wakati wa majadiliano ya hotuba ya bajeti ya Waziri Mkuu ya mwaka 2011/2012.

Akichangia hoja hiyo, Bi. Lyimo alisema kuwa pamoja na matatizo yanayoikabili nchi hii, lakini serikali imeshindwa kuangalia namna ya kupunguza hata ukubwa wa
baraza la mawaziri ambalo alisema linatumia fedha nyingi ambazo zingeweza kwenda katika shughuli zingine.

“Nasema siungi mkono hoja hii kwa sababu hizo tatu, moja ya kushindwa kupunguza ukubwa wa baraza la mawaziri, serikali kushindwa kutekeleza azma ya kuhamia Dodoma lakini pia kushindwa kutoa maamuzi hasa katika masuala ya kushughulikia matatizo ya wanafunzi,” alisema Bi. Lyimo.

Alisema kuwa ni ajabu kwa Tanzania kuwa na mawaziri 52 huku nchi kama Marekani ikiwa na mawaziri 15, Japan ikiwa na mawaziri 17 na Ujerumani ikiwa na mawaziri 15 nchi ambazo kiuchumi zinafanya vizuri sana.

“Fedha nyingi zinatumika kuhudumia ukubwa wa baraza hili la mawaziri hivyo suala hili ni vyema sasa likaangaliwa kwa umakini ili kwenda sambamba na wenzetu ambao pamoja na kuwa na uchumi mzuri mabaraza yao ni madogo,” alisema Bi. Lyimo.

Akizungumzia suala la serikali kutokuwa na nia ya dhati ya kuhamia Dodoma, alisema kuwa kama imeshindwa kufanya hivyo ni vyema ikawa wazi kuliko kila mwaka kuomba fedha za kuendeleza Ofisi Dodoma na Dar es Salaam.

Alisema kuwa anayo mifano ya nchi mbalimbali ambazo zimefanikiwa kuhamisha makao yake makuu, akitaja Nigeria na Malawi, hivyo akasisitiza kuwa kama nia ya dhati haipo serikali iwe wazi.

Bi. Lyimo alikwenda mbali zaidi kwa kumtaka Rais Jakaya Kikwete ndiye aanze kuhamia Dodoma kwa kuwa akifanya hivyo mawaziri nao watalazimika kumfuata.

“Wapo waliopendekeza kuwa spika ndiye aanze kuhamia hapa...mimi nadhani rais ndo anayepaswa kuanza kuhamia hapa,” alisema.

Bi. Lyimo pia alizungumzia suala la migomo ya wanafunzi ambapo alisema kuwa limeghubikwa na upotoshaji mkubwa kuwa vyama au viongozi wa upinzani ndio wanachochea hali hiyo.

Alisema kuwa migomo ya wanafunzi ilianza tangu mwaka 1965, 1966 ambapo wanafunzi walikuwa wakiandamana na katika kipindi hicho wapinzani hawakuwepo.

Kutokana na hali hiyo, alisema kuwa suala la upinzani kuchangia katika migomo ya wanafunzi si la kweli na akaeleza kuwa litamalizika endapo serikali itatimiza
wajibu wake.

Alitumia fursa hiyo pia kuelezea maandamano yanayofanywa na chama chake, ambapo alisema kuwa wataendelea kuandama hadi kieleweke kwa kuwa tayari wameishika pabaya Chama Cha Mapinduzi (CCM).

Kwa upande wa wabunge wa Zanzibar waliozungumzia suala la muungano, walisema kuwa ni vyema muungano ukavunjwa kwa kuwa umejaa upendeleo kwa Tanzania Bara.

Mbunge wa Jimbo la Micheweni, Bw. Haji Khatibu Kai (CUF) alipendekeza kuwa kuvunjwa kwa muungano kwa kuwa hakuna uwiano katika mambo mbalimbali yanayofanywa na serikali.

Alisema kuwa serikali haikueleza ni kero ngapi mpaka sasa zimeshughulikiwa hatua inayowafanya Wanzanzibari kuwa nyuma ikilinganishwa na wabara, hivyo akaomba kuwa kama Zanzibar imeonekana ni mzigo, basi muungano huo uvunjwe ili uundwe upya.

Naye Mbunge wa Magogoni, Bw. Kombo Khamis Kombo (CUF) alisema kuwa kumekuwa na uwiano usiokuwa sahihi katika mambo mbalimbali ambapo alitolea mfano uteuzi wa mabalozi katika nchi mbalimbali.

Alisema kuwa mpaka sasa mabalozi wanaotoka Zanzibar ni wanne tu ambao wako katika nchi za Kiarabu huku idadi kubwa ya mabalozi wakitoka bara hivyo akaomba kuwepo uwiano katika teuzi mbalimbali.

Alisema kuwa serikali ina wizara 26, kati ya hizo sita tu ndizo za muungano, lakini mambo mbalimbali ambayo si ya muungano yamekuwa yakitengewa fedha hivyo akahoji usawa katika masuala hayo.

Alisema kuwa kama kuna nia ya dhati ya kutatua kero za muungano ni vyema Waziri Mkuu akalisimamia vyema suala hilo ili kurejesha imani ya Wazanzibari.

Mjadala wa hotuba hiyo utamalizika Ijumaa baada ya kuongezwa siku mbili kutokana na kuwepo kwa idadi kubwa ya wabunge wanaotaka kuchangia hotuba hiyo.