Nape apania kujibu mapigo ya CHADEMA

Na Gladness Mboma

KATIBU wa Itikadi na Uenezi wa Chama cha Mapinduzi (CCM), Bw. Nape Nauye amesema leo atajibu mapigo ya Chama cha Demokrasia na Maendeleo (CHADEMA) kwa
kuanika waraka unaoonesha ufisadi mkubwa wa viongozi wake kwenye mkutano ambao utafanyika mkoani Singida .

Akizungumza na Majira kwa njia ya simu jana akiwa njiani kwenda Singida, Bw. Nnauye alisema kuwa kilichozungumzwa na Katibu Mkuu wa CHADEMA, Dkt. Willibrod Slaa kuhusu kupata waraka wa siri wa CCM zinazoelezea sababu za chama hicho kushuka umaarufu ni uzushi ambao amezoea siku zote.

Bw. Nnauye alikuwa anazungumzia 'waraka wa siri' aliodai kuwa nao Dkt. Slaa kwenye mkutano wake mkoani Rukwa, ukieleza sababu chama hicho kupoteza mvuto kwa wananchi, lakini akiuponda kuwa hauzungumzii hali ngumu ya maisha ya Watanzania.

"Mimi ninachoweza kuzungumza ni kwamba hata sisi CCM tuna waraka mkubwa unaoonyesha ufisadi mkubwa wa viongozi wa CHADEMA na ninakwenda kuuanika kwenye mkutano Singida leo na asubiri mapigo yake na siyo huo wa kutengeza," alisisitiza.

Alisema kuwa atazungumzia yote yaliyoko katika waraka huo, na mambo yote atayaweka hadharani na kusisitiza kwamba asipende kuchokoza CCM wakati wanayo mabaya yao.

Bw. Nauye alisema kuwa pamoja na madai yote ya CHADEMA kuwa wamenasa waraka wa siri wa CCM, wao ndio mafisadi namba moja na kwamba chama chao ni masikini, lakini bado wanakifanyia ufisadi mkubwa.

"Dkt. Slaa anatushangaza anapodai kwamba amekamata waraka wa siri, mbona kila kitu kipo hadharani na yote tulikwishazungumzia, tunapenda afahamu kwamba CCM hata siku moja haifanyi maamuzi ya siri,  hiki si chama cha siri ni cha Watanzania," alisema.

Alisema kuwa wenzake wamemdanganya ni waraka wa siri ambao wameutengeneza wenyewe na kusisitiza kwamba hakuna siri inayozungumziwa hadharani, kwani wakati wakiwa Dodoma, Zanzibar, Dar es Salaam, Iringa, Kibaha na pia walipozungumza na wahariri wa vyombo vya Habari walizungumza kila kitu bila kificho.

Bw. Nnauye alisema kuwa Dkt. Slaa anaweweseka hasa baada ya kukosa agenda ya kuzungumza katika mikutano yake na kuanza kuibu uongo mbao hauna manufaa yoyote kwa Watanzania na kumtaka kutoa siri ya waraka huo hadharani.

"Hakuna siri yoyote tunayoongea hadharani, ninachomuomba atoe waraka huo wa siri hadharani na tuone kama yote yaliyomo hayajazungumzwa, Slaa aache uzushi wa kuwataka kuwahadaa Watanzania wamuone kuwa ni mtu wa maana wakati si lolote na si chochote," alisema.

Jana gazeti ili lilimnukuu Dkt. Slaa akisema kuwa CCM wanasema wanajivua gamba, basi na wao CHADEMA watawavua nguo kwa kuwa uwezo wao wa kuwatumikia Watanzania umefikia mwisho na kuitaka iwapishe.

Alisema kuwa pamoja na waraka huo kupigwa mhuri mkubwa wa neno 'siri', wao CHADEMA wameupata na ndani yake CCM imeeleza sababu zilizosababisha kushuka kwa umaarufu wake, miongoni mwa Watanzania, lakini akasema kuwa chama hicho kimegundua mapungufu hayo kikiwa tayari kimechelewa, kwani wananchi wameonesha kila dalili ya kukichoka.