Mwanafunzi UDOM awania uenyekiti BAVICHA

Na Peter Mwenda

ALIYEWAHI kuwa mgombea wa Ubunge wa Jimbo la Kibaha kupitia Chama cha Demokrasia na Maendeleo (CHADEMA), Bw. Habibu Mchange ametangaza kuwania
nafasi ya Uenyekiti wa Baraza la Vijana wa chama hicho (BAVICHA).

Akizungumza na waandishi wa habari jana, Bw. Mchange alisema anagombea nafasi hiyo kwa sababu uzoefu alionao katika chama ngazi ya taifa anaamini atajenga BAVICHA kukilinda chama hicho ili kushinda uchaguzi ujao na kuandaa viongozi wa baadaye wa chama.

"Matatizo yanayoikabili nchi yanaathiri sana vijana ambao mimi nataka kuwatumikia kama vile kupanda kwa gharama za maisha, bei ya umeme, kushuka kwa kiwango cha elimu, kuongezeka kwa kashfa za ufisadi, ukosefu wa ajira kwa vijana," alisema Mchange.

Alisema kumekuwa na matatizo mengi nchini ya utoaji wa ajira kwa upendeleo, kuporomoka kwa huduma bora za afya ni dhahiri kuwa Serikali na chama tawala kimeshindwa kuwatumikia wananchi wake hivyo dawa yake pekee ni kuunganisha akiwa mwenyekiti wa BAVICHA.

Bw. Mchange ambaye mbali ya kuwa mwanaharakati na mwanasiasa, ni mwanafunzi wa Chuo Kikuu cha Dodoma (UDOM) akisomea fani ya Sayansi ya Siasa na Utawala alisema anataka kuona vijana wa Chadema wanakuwa nguvu ya mabadiliko na kutoa ushauri wa kitaalamu.

Alisema anajivunia mafunzo na malezi ya kisiasa aliyoyapata kutoka kwa viongozi wa kitaifa wa Chadema akiwemo Mwenyekiti, Bw. Freeman Mbowe, Katibu Mkuu, Bw. Willibrod Slaa na Naibu Katibu Mkuu wake, Zitto Kabwe.

Alisema uwezo na uzoefu huo ndani ya CHADEMA utamsaidia kukitendea haki chama na watanzania wapate fursa ya kutumia rasilimali za nchi kwa manufaa ya wote ili kila mmoja afaidike kupitia kwa kijana wenye uchungu kama wake yeye.

Bw. Mchange alisema mafanikio aliyowahi kuyapata wakati alipogombea Ubunge Kibaha na kupata kura 10,450 kati ya 26,574 zilizopigwa na mpinzani wake kushinda kupata kura 14,028 anaamini kuwa ilikuwa dalili za wananchi kuona kuwa anao uwezo wa kufanya kazi ya kutumikia wananchi bila kutetereka.